Read Khoekhoegowab ǃNaeǃkhaidi 24 Bible Online

ǃNaeǃkhaidi 24 - Khoekhoegowab bible

ǃNaeǃkhaidi 24

¹Tsî koro tsēde ǁnās khaoǃgâb ge ǀgapipristeri Ananiaba ǂnomdomgu tsî ǂanǂansa ǀanaǃgâ-aob Tertulub tsîgu ǀkha ge ǁgôa. ǁÎgu ge ǃākhōmâi-aob aiǃâ Pauluba ge ǃnuriǃgâ.

²Tsî ǂgaiheb geo, ob ge Tertuluba ǀhapimā bi tsoatsoa, tsî ge mî:

³Kai ǂkhîba da sats ǃnâ ūhâ, tsî sa aiǂhomisa xu gu koa-anusa dīga nē ǁaesa ra hāǂam ǃkhaisa da ge hugaǀgui tsî mâ ǁaeb hoab ai gangans ǀkha ra ǃkhōǃoa, ǀgapiǃgôahesa Felikstse.

⁴Xawe ǂomxase ta ǃâu kai tsi tidese amaga ta ra ǀkhoma tsi, sigets nî ǃnubuse ǃgâ ǃkhaisa, sa khoexasib ǃoa.

⁵Sige ge nē khoeba ge hō ǂhīǁōb ase, tsî ǃhūbaib hoab ai Jodeǁîn hoana ra gongonǃnâb ase, tsî Nasareǁîn kāǁhapuǂgoms di aiǃgû-aob ase,

⁶ǁkhāti ge tempelab nî ǀuriǀurisa dītsâb xase. ǁÎba ge ge ǁkhāti go ǃkhō, tsî sige ǂhanub ǃoa goro ǀgoraǃgâ bi ǂgao,

⁷xawe Lisiab ǂamkhoeb ge hā tsî ǀgaib ǀkha sige ǃomǁaeba xu go ūbē bi

⁸tsî ǁîb di ǀanaǃgâ-aoga ge mîmā, sats tawa gu nî hāsa, îts aitsama ǁîba ôaǃnâ tsî ǁnâuǃā ǁkhā, sige ǁîba ra ǀanaǃgâ xūn hoana.

⁹Tsî Jodeǁîn on ge ǃkhō-am tsî nēn ǁnāti ī ǃkhaisa ge mî.

¹⁰Ob ge Pauluba, ǃākhōmâi-aob ge ǃhoab nîse nape bi ǃnubai ge mî: ǂAn ta a xui-ao, ǂgui kurigats nē ǁaes ǂama ǂhanuǂhanu-ao ge i ǃkhaisa, o ta ǁnās ǃgâ-ai ǃgâiǂâixase ra ǃereambasen.

¹¹ǂAn ǁkhāts a xui-ao, disiǀgamǀa tsēde i ǃnā tamasa, Jerusalems ǃoa ta ge ǃapasa, ǀgoreǀî ta nîse.

¹²Tsî gu ge ǁkhāti tempeli ǃnâ khoe-i ǃoa ra ǃhoase hō te tama tsî ǁkhāti ǁaes ǃnâ gongonai-e ra dīse, sinagogegu ǃnâs kas, ǃās ǃnâs kas hoasa.

¹³Tsî gu ge ǁkhāti a ǃhoadan te ǁoa, nēsin ra ǀhapimā ten xa.

¹⁴Xawe ta nēsa sats ai ra ǁguiǁnâ, ǁnā daob kāǁhapuǂgoms tin ra ǂgaiba-ū ta, ǁgûgu di Eloba ǁnāti ra ǃoaba ǃkhaisa, ǂhanub tsî kēbo-aogu tsîn ǃnâ xoamâihe hâna ǂgom tsî.

¹⁵Tsî ta ge ǃâubasensa Elob ai ūhâ, ǁîn ǁkhāti ūhâsa, ǁō hâna xu khâi-i nîra hâ ti, ǂhanu-ain tsî ǂhanuoǃnân tsîn di-e.

¹⁶Tsî ǁîs ǃnâ ta ra ǁkhāpesen, hugaǀgui ta nî ǁgonǁgonǂgao-o ǂâi-e Elob tsî khoen tsîn aiǃâ.

¹⁷O ta ge ǀnî kurigu khaoǃgâ ge hā, ti ǁaesa ta nî aude dībase, tsî ǁguibadi tsîna.

¹⁸ǁÎna ta ra dī hîa gu ge tempeli ǃnâ ǃanuǃanuhe hâ khoese ge hō te, ǁaes ǀkha tama i tsî gongonai-e dī tamase.

¹⁹ǁÎgu Jodeǁîgu Asiab digu ga nēpa sa aiǃâ hā hâ, î gu ga ǀhapiǀhapi te, xū-e gu ga tita ǃoagu ūhâo.

²⁰A gu ǁnâi aitsama mî, īse gu tsū xū-e tita ǃnâ go hō ǃkhaisa, ǀapeǀhaos aiǃâ ta go mâ io.

²¹Nē mîs ǀguis ǃaromas, ǁîgu ǃnâ ta mâ hîa ta go ǂgaisa: ǁŌ hân di khâis ǃaroma ta nētsē sago xa ra ǀanaǃgâhe ti.

²²Tsî Feliksi ge nēna ǁnâuo, ob ge ǁîgu di ǃkhaisa ge mâiǂui, ǂōrisaseb ge nē ǁkhāǁkhāsa ǂan i xui-ao, tsîb ge ge mî: Lisiab ǂamkhoeb ga ǁgôaxao, o ta nî sago di ǃkhaisa ǁnâuǃā.

²³Tsîb ge kaidisigu danakhoeba ge mîmā, Paulub nî sâuhesa, xawe îb supusupuhe î-i tā ǁîb din di ǀgui-e ǂkhāhe, ǁîba ǃoabasa tsî ǁîb tawa sīsa.

²⁴Tsî ǀnî tsēdi khaoǃgâb ge Feliksa ǁîb taras Drusilas Jodeǁîs ǀkha hā tsî Pauluba haisi tsî Xristub Jesub ǃnâ ǂgoms din xa ge ǁnâu bi.

²⁵Tsî Paulub ge ǂhanu-aisib tsî ǀgausib tsî ǃgoaxa ǀgoraǃgâs din xa ǃhoao, ob ge Feliksa ǃhuri tsî ge ǃeream: Nē ǃnās ai ǃgû re; tsî ǃgâiǃgâ ǁaeba ta ga hō-o, o ta nî ǂgaihā kai tsi.

²⁶Tsîb ge ǁkhā ǁaeb ai ge ǃâu Paulub xab nî marina māhe ǃkhaisa xore bib nîga, ob ge ǁî ǃkhais ǃaroma ǁkhāti ǃnuriǃnāde ǁîba haisi, tsî ge ǁgamū bi.

²⁷Tsî ǀgam kurikha ge ǃgôa-īo, ob ge Feliksa Porsiub Festuba ǁîb di amǃnâs ai ge hō. Tsî Feliksi ge Jodeǁîna khoexasi-e ǁgau ǂgao amagab ge ǃkhōsab ase ge ǃgoro kai bi.