Read Khoekhoegowab ǃNaeǃkhaidi 25 Bible Online

ǃNaeǃkhaidi 25 - Khoekhoegowab bible

ǃNaeǃkhaidi 25

¹Tsî Festub ge ǁîb gaosîsenna ǃkhōǃoao, ob ge ǃnona tsēdi khaoǃgâ Kaesareasa xu Jerusalems ǁga ge ǃapa.

²ǃNubai gu ge ǀgapipristergu tsî Jodeǁîn di ǂgurosaga Pauluba ǀanaǃgâ tsî Festuba ge ǀkhoma,

³khoexasi-e Paulub ǃoagu ra ǂganbasenǃâ, îb ǁîba Jerusalems ǃoa hā kai ti, daob ai gu nî ǁnoa-e ǁguiba bi tsî ǃgam bi, ti ǂâibasen tsî.

⁴Ob ge Festuba ge ǃeream, Paulub nî Kaesareas tawa sâuhe, tsîb nî ǁî-aitsama ǃhaese ǁnāǀî ǃgûsa.

⁵Sago ǃnâ ǁnâi ga sī ǁkhāga, a gu ǁgôaǀhao tib ge ge mî, î gu ǀanaǃgâ bi, xū-i ga nē khoeb ǃnâ hâo.

⁶Tsî disi tsēdi ǀguideb ge ǁîn ǀkha hâ io, ob ge Kaesareas ǃoa ge ǁgôa, tsî sao ra tsēs aib ge ǂhanuǂhanuǃnaos ai ǂnôa io, ob ge Paulub nî ǀkhī-ūhesa ge mîmā.

⁷Tsî hāb geo, o gu ge Jerusalemsa xu go hā Jodeǁîga mâǂnamipe bi, tsî ǂgui tsî ǃgom ǀhapiǀhapi-aina Paulub ǃoagu ge ūhā, ǁgauǃā ǁoa gu ge ina.

⁸ǃEreambasen raǃâb ge mî xui-ao: Tita ge ǁore tama hâ Jodeǁî ǂhanub ǃoagus kas, tempeli ǃoagus kas, Kaesari ǃoagus kas hoasa.

⁹Ob ge Festuba Jodeǁîna khoexasi-e ǁgau ǂgao tsî Pauluba ǃeream tsî ge mî: Jerusalems ǃoa ǃapa ǂgaots ra, ǁnāpats nî tita aiǃâ nēn ǃaroma ǀgoraǃgâhega?

¹⁰Ob ge Pauluba ge mî: Tita ge Kaesari di ǂhanuǂhanuǃnaos ai mâta, ǁnāpa ta nî ǂhanuǂhanuhe; Jodeǁîna ta tsū-e dī tama hâ, sats ǁkhāti îsase ǂan khami.

¹¹ǂHanuo xū-i tsî ǁōba anu hâ xū-e ta ga dī hâo, o ta ǁō ta nîsa ǂkhā tama; xawe nēgu ra ǀhapiǀhapi ten di ǀgui-i xare-i ga ti ī tama io, o i kom khoe-i xare-e khoexasiba xu tita ǁîna a māǁnâ ǁoao. Kaesari ai ta ra ǂgaimāsen.

¹²ǃNubaib ge Festuba ǀapemāǃnans ǀkha ǁgamǀhao, tsî ge ǃeream: Kaesarats go ǂgaimāsen, ots ge Kaesari ǃoa nî ǃgû.

¹³Tsî ǀnî tsēdi ge ǃgû-īo, o ra ge gao-aob Agripab tsî Bernises tsîra Kaesareas tawa ge hā, Festuba ra nî tawedese.

¹⁴Tsî ǀnî tsēde ra ge ǁnāpa hâ io, ob ge Festuba gao-aoba Paulub dina ǁgui-aiǃâ, tsî ge mî: ǂAnǂansa khoeb ge ǃkhōsab ase Feliksi xa ge ǃgorohe.

¹⁵ǁÎb ǃaroma gu ge ǀgapipristergu tsî Jodeǁîn di ǂnomdomga ge ǂhai, Jerusalems tawa ta hâ hîa, ǁîb ǃoagu ǀgoraǃgâ-e ra ǂgaoǀkhāǃâ.

¹⁶O ta ge ǁîga ge ǃeream, Romeǁîn di ǀgau tamab a ǃkhaisa khoe-i nî khoexasiba xu ǃgamhes ǃoa māǁnâhesa, ǀanaǃgâhe ra-i ǀanaǃgâ-aona ǁî-i ǃoa-ai ūhâ tama hîa, tsî ǀanaǃgâs ǃaroma i nî ǃereambasen ǃkhaisa i hō tama hâ hîa.

¹⁷Tsî ǀhûpe gu ge nēxopa hāo, o ta ge ǃkhaisa mâiǂui tamase sao ra tsē ǂhanuǂhanuǃnaos ai ǂnû, tsî khoeb nî ūhāhesa ge mîmā.

¹⁸Tsî gu ge ǀanaǃgâ-aoga, khâi gu geo, ǁîb ǃoagu ǀhapiǀhapixū-i xare-e ūhā tama ge i, tita gere ǂâi xūn xa.

¹⁹Xawe gu ge ǀnî ǂnoagu-aidi, ǁîn eloǃoabas didi xa ǁîb ǃoagu ge ūhâ i, tsî ǂanǂansa ǁō hâ Jesub xa, ǁîb xab ra Pauluba ûib hâ ti mîba.

²⁰Tsî nē ǂnoagu-ais ǂama ta ge areo, o ta ge ge mî, iseb Jerusalems ǃoa ǃgû, tsî ǁnāpa nē xūn ǃaroma ǀgoraǃgâhe ǂgao hâsa.

²¹Xawe Paulub ge ǂgaimāseno, Kaesari di ǁnâuǃgâsab nî sâubahe ǃkhaisa, o ta ge sâuheb nîsa ge mîmā, Kaesari ǃoa ta nî sî bis kōse.

²²Ob ge Agripaba Festub ǃoa ge mî: Tita ge ǁkhāti nē khoeba aitsama ra ǁnâu ǂgao. Ob ge: ǁArits ge nî ǁnâu bi, ti ge mî.

²³Sao ra tsē ǁnâi Agripab tsî Bernises tsîra ge kai ǂkhaib ǀkha hā tsî ǁnâuǃgâ-ommi ǃnâ ǂgâo, toroǂamkhoegu tsî ǃās di ǂgurosagu tsîgu ǀkha ǃnubaib ge Pauluba Festub di mîmās ai ge ūhāhe.

²⁴Ob ge Festuba ge mî: Gao-ao Agripatse, tsî sida ǀkha ǀhû hâ aogo hoago, kō nēb, ǁîb ǃaromab ge Jodeǁîn di ǂguib hoaba ǂgaoǀkhā teba, Jerusalems tawas kas, nēpas kas hoasa, aiǃâb ǃoab nî ûisa anu tama, ti ǂgai tsî.

²⁵Xawe ta ge tita ǁōba anu hâ xū-eb dī tama ǃkhaisa ta ge hō, tsî ǁî-aitsamab ge Kaesara ǂgaimāsen ǃkhais ǃaroma ge ǂâibasen, sî bi ta nî, ti.

²⁶O ta ge ǁaposa xū-i, ǁîb xa ta nî ǃkhūkhoeba xoaba-e ta ūhâ tama amaga ǁîba sago aiǃâ go ūhā kai, ǀō-aisase, sats gao-ao Agripats aiǃâ, î ta ôaǃnâheb kas khaoǃgâ xoa ta nî xū-e ūhâ ti.

²⁷ǂÂioxūse i kom ra ība teo, ǃkhōsabe-e sî tsîts ga ǁî-i ǃoagu hâ ǀhapiǀhapixū-e ǂanǂan ǁkhā tama io.