Read Khoekhoegowab ǃNaeǃkhaidi 26 Bible Online

ǃNaeǃkhaidi 26 - Khoekhoegowab bible

ǃNaeǃkhaidi 26

¹Ob ge Agripaba Paulub ǃoa ge mî: ǃHoabasensats mā-amhe hâ. ǃNubaib ge Pauluba ǃomma ra ǀhōǂuise nēti ge ǃereambasen:

²ǃGâiǃgâse ta ra ǃgôasen, gao-ao Agripatse, Jodeǁîn ra ǀhapiǀhapi ten hoan xa ta nētsē sa aiǃâ nî ǃereambasen ǃkhaisa.

³ǃGōsase Jodeǁîn di ǂūgu tsî ǂnoagu-aidi hoan di ǂanaots a amaga. ǁNā-amaga ta ra ǀkhoma tsi, ǃnūǃnâxasets nî ǁnâuǃgâ tesa.

⁴Ti ûib ǁnâi, ti ǂkhamsisa xu ta ge ti ǁaes Jerusalems ǃnâ tsoatsoasa xu gere ûib xan ge Jodeǁîn hoana a ǂan,

⁵hugasa xu ǂan te hân, ǃkhō-am ǂgaon karao, mati ta ge hoan xa ǁkhōǁkhōsase sekteb sada eloǃoabas dib ǃoa Fariseb ase gere ûi ǃkhaisa.

⁶O ta nēsi mâ tsî ra ǀanaǃgâhe, ǁnā ǃâubasens, Eloba xu ge ǁgûga ība mîmâis dis ǃaroma.

⁷ǁÎs ǃoa di ge disiǀgamǀa ǃhaodi sada din dide nî sī, tin ra ǃâubasen Eloba tsuxuba tsî tsēa ra ǃoabahâhâǃâ. Nē ǃâubasens ǃaroma ta Jodeǁîn xa ra ǀanaǃgâhe, gao-ao Agripatse.

⁸Okha, tare xū-i ǃaroma du sado ra mî, ǂgomǁoasa i a ǃkhaisa, Elob ra ǁō hâna ǂkhaiǂkhai ǃkhaisa?

⁹Tita on ge tita ǃnâ gere ǂâi, Jesub Nasareǁîb di ǀons ǃoagu ta ǂgui xūna nî dī ǃkhaisa.

¹⁰Jerusalems ǃnâ ta gere ǁkhāti dī khami, ǂgui ǃanuna ta ge ǃkhō-oms ǃnâ ǂganam ǃnubai, ǁîs ǃoa ǀgapipristerga xu ǀgaiba ra hōse, tsî ǃgamhen geo, o ta ge ge ǃkhō-am.

¹¹Tsî ta ge sinagogegu hoagu ǃnâ ǃnuriǃnāde ǁîna tsûtsû, tsî ǁîna gere ǃkhāǃkhāǁgari. Tsî ǃnāǂamsase ta ge ǁîn ǃoagu khâikhâisen, o ta ge ǃauga ǂnôa ǃādi kōse ǁîna gere ǃgôaǃgon.

¹²O ta ge ǁkhāti nē dīb ǃnâ Damaskus ǃoa ge ǃgû, ǀgapipristergu tawa ǁkhāsib tsî mā-ams tsîra hō hâǃâ.

¹³ǃNubai ta ge tsēǃgâǁaeb ai daob ai ǃnâ-e ǀhomma xu ge mû, gao-aotse, sores di ǂkhaib ǃgâ-ai ǂkhaisa-e, tita tsî tita ǀkha daob ai hâga ra ǃnâǃnâǂnamipe-e.

¹⁴Tsî hoage ge ǃhūb ai ǁnāǁgoe ǃnubai ta ge dom-e ge ǁnâu, Hebreǁî gowab ǃnâ tita ǃoa Saultse, Saultse, tarexats ra ǃgôaǃgon te? ti ra mî-e. ǃGomba tsî nîra ǃkhari-ūdas ǃoagu ǂnāsa.

¹⁵O ta ge tita ge mî: Taritsa kha, ǃKhūtse? Ob ge: Tita ge Jesuta, sats ra ǃgôaǃgon ta, ti ge mî.

¹⁶Xawe khâi î sa ǂaira ai mâ! Nēs ǃoa ta go ǂhai tsi xuige, mûts gen tsî ganupe ta nîra ǂhaiǂhaiba tsin di ǃoaba tsî ǀhûǀguitimî-aose ta nî mâi tsise.

¹⁷Tsî ta ge nē ǁaes tsî ǀūben tsîna xu nîra ore tsi, ǁîn ǃoa ta nēsi ra sî tsina,

¹⁸mûdi ânats nî khobaga, în ǃhobasen ǃkhaenaba xu ǃnâb ǃoa, tsî Satanni di ǀgaiba xu Elob ǃoa, în ǁoren ǀûbasa hō, tsî ǀumisa tita ǃnâ ǂgomsa xu ǃanuǃanuhe hân ǃnâ.

¹⁹ǁNā-amaga, gao-ao Agripatse, ta ge nē ǀhommi aisa ǁnâuǀnamoǃnâ tama ge i.

²⁰Tsî ta ge aibe Damaskus din tsî Jerusalems din tsî Judeaǃhūb hoaragab din tsî ǀūben tsîna gere ǂhôa, ǃhausen tsîn nî Elob ǃoa ǃhobasen ti, ǃhobasensa anu hâ sîsenga ra dīse.

²¹ǁÎ ǃkhais ǃaroma gu ge Jodeǁîga tempeli ǃnâ ǃkhō te tsî gere ǃgam te ǂgao.

²²Xawe Elob xa huihe hâǃâ ta nētsēs kōse mâ tsî ra ǀhûǀguitimîba ǂkharin tsî kain tsîn hoana, tsî ta ge ǀnî xū-e mî tama kēbo-aogu tsî Moseb tsîgu ge īn nîra ti mîn ǀguina:

²³Xristub nîra tsâ ti, tsîb nîra ǂguro ǁō hâna xu khâi ti, tsîb nîra ǃnâba aoǁnâba nē ǁaes tsî ǀūben tsîna.

²⁴Tsî nēnab ge ǃereambasen ǃnubaib ge Festuba ǃgari dommi ǀkha ge mî: ǃKhauts hâ Paulutse, kai ǂans âts ge ra ǃkhau kai tsi.

²⁵Ob ge Pauluba ge mî: ǃKhau tama ta hâ, ǀgapiǃgôasa Festutse, tsî ta ge ama tsî ǁnâuǃāxa mîde ra ǃhoa.

²⁶Gao-aob kom nēn xa a ǂano, o ta kom ǂhauǂgarose ǁîb ǃoa ra ǃhoao, nē xūn di ǀgui-i xare-i kom ǂganǃgâsaba bi tama hâo, tita ra ǂgom ǁîn ǁhôa-i ǃnâ ī tama hâ xui-ao.

²⁷ǂGomts ra, gao-ao Agripatse, kēbo-aoga? ǂAn ta ge a, ǂgomts ra ǃkhaisa.

²⁸Ob ge Agripaba Paulub ǃoa ge mî: ǁAupets ra mîdan te, Xristeǁî kai ta nî ǃkhaisa.

²⁹Ob ge Pauluba ge mî: Ab Eloba dī, în sats ǀguitsa tama i tsî nētsē ra ǁnâu ten hoana ǁaupe tama i tsî xawe hoaragase ǁnāti ī kaihe, tita ǁkhā ta ī khami, nē ǃgae-ūdan ǀguin ose.

³⁰Tsî nēnab ge mîo, on ge gao-aob tsî ǃāǃkhōmâi-aob tsî Bernises tsî ǁîn ǀkha go ǂnôa ina khâi,

³¹tsî ǀgui ǀkhāb ai ge ǂgō, tsî ǁgamǁare tsî ge mî: Nē khoeb ge ǁōb di ǃgae-ūdana anu hâ xū-e dī tama hâ.

³²Ob ge Agripaba Festub ǃoa ge mî: Xūheb ge ga hâ nē khoeba, Kaesarab ga ǂgaimāsen tama hâ io.