Read Khoekhoegowab ǃNaeǃkhaidi 27 Bible Online

ǃNaeǃkhaidi 27 - Khoekhoegowab bible

ǃNaeǃkhaidi 27

¹Tsî ǂâibasenhe i ge hâ io, Italiab ǃoa ge nî ǃgâusa, o gu ge Paulub tsî ǀnî ǃkhōsaga kaidisigu danakhoeb, Juliub ti ǀon hâb, Kaesari toroǂnubis diba ge māǁnâ.

²O ge ge Adramitiumǁî doe-om-i Asiab ǃnâ hâ ǃkhaide-ū nî ī-i ǃnâ ǂgâ tsî ge ǂnauǁnâ, tsî Aristarxub, Masedoniaǁîb, Tesalonikas dib ge sige ǀkha ge hâ i.

³Tsî ge ge sao ra tsē Sidons tawa ge sī. Tsî Juliub ge Pauluba khoexaǃnâse sîsenū, tsî ge mā-am bi, khoen tawa sī tsîb nî sîsenbahe ǃkhaisa.

⁴Tsî ǁnāpa xu ǂhāǁnâ tsî ge ge Siprusa-ū ge ī, ǂoagu ge sige ǃoagu hâ i xui-ao.

⁵Tsî Silisiab tsî Pamfiliab tawa hâ huriba ǃgâu tsî ge ge Miras, Liseab ǃās tawa ge sī.

⁶Tsî ǁnāpab ge kaidisigu danakhoeba Aleksandriaǁî doe-om-i Italiab ǃoa nî ǃgû-e hō tsî ǁî-i ǃnâ ge ǃnao ge.

⁷Tsî ǂgui tsēde ge ge ǂause ī, tsî Knidus ǃoa ǃgâus kōse ǃgomse ge sī, tsî ǂoab ge mā-am tama i xui-ao ge ge Kretasa-ū ge ī, Salmones ǃoa-ai.

⁸Tsî ǁîsa ǀase ǃnara hâǃâ ge ge ǂanǂansa ǃkhais, ǃGâi Doe-ommâ-ais, ti ra ǂgaihes, ǃās Laseas ǁîs ǀgūse hâs tawa ge sī.

⁹Tsî ǂomxa ǁaeb ge ǃgû-īo, tsî ǃgûs ge ǀnai tsūǃgâse io, ǂûtama hâs ǁaeb go ǁkhāti ǀnai ǃgû-ī xui-ao, ob ge Pauluba ǁîga ǁnama

¹⁰tsî ǁîgu ǃoa ge mî: Aogo, mû ta ra doe-ommi ǃgûs nî ǂhanis tsî kai ǂkhôas tsîra ǀkha īsa, ǃnaos tsî doe-ommi tsîra ǀguira xa tama i tsî ǁkhāti sage ûib tsîn xa.

¹¹Xaweb ge danakhoeba ǂgaeǂgui-aob tsî doe-ommi di ǀhonkhoeb tsîkha Paulub xa ge mîhes ǃgâ-ai ge ǂgom.

¹²Tsî doe-ommâ-ais ge ǁîs ǃnâ nî saoba hâtoahesa ǃgâibase ǁgoe tama hâ i xui-ao gu ge ǂguiga ge ǀapemā, ǁnāpa xu gu nî ǁkhawa ǃgû ti, ise gu ǀnîsi Feniks tawa sī tsî ǁnāpa saoba nî hâtoase, Kretas doe-ommâ-ais tawa, ǃkhawagasa xu huriǂoasǀî tsî ǀapasa xu huriǂoasǀî ǁgoesa.

¹³Tsî ǃkhawagas ǂoab ge ǂause ǃgomtsoatsoao, o gu ge ǂâibasens âga gu go hō ti ǂâi tsî ǂnauǁnâ tsî Kretas ǀgūseba-ū ge ī.

¹⁴Xawe ǂomxa tamase ǁnās khaoǃgâ i ge sare-i, Euroklidonni ti ra ǂgaihe-e ǁîb ǃoa-ai ge khâi.

¹⁵Tsî doe-ommi ge ǁîb xa ǃkhōhe tsî ǂoab ǃoagu ī ǁoa io, o ge ge ǁîba ǀû tsî ge ǃgû kai.

¹⁶Tsî ge ge ǂanǂansa ǃnāǃnuiros Kaudas ti ǀon hâsa ge ǃnara ǃnubai ge ge ǂgaurosa ǃgomse ge ǃomǂgā.

¹⁷Tsî ǁîsa gu ge ūkhâio, o gu ge hui-ain hoana ge ūǀkhī, doe-omma ǃgae-ai tsî; Sirtis ti ra ǂgaihe ǂnâsa ǃkhais ai gu nî ǁnā, ti gu ge ǃao amaga gu ge saila xamikhâi, tsî ǁnāti ge garu i.

¹⁸Tsî kai ǁgaoǂoab xa ge ge doeǁgamaheo, o gu ge sao ra tsē ǃnaohe hâ xūn xa ge aoǂuiǃā.

¹⁹Tsî ǃnonaǁî tsē gu ge ǁîga ǃomgu ǂûgu ǀkha doe-ommi sîsenūdana ge aoǂui.

²⁰Tsî sores tsî ǀgamiron tsîn ge ǂgui tsēde ǂhai tama io, tsî ǀgaisa ǂoas ge sige ai ǁgao-o, os ge ega sige sâuhes di ǃâubasens hoasa ge kā.

²¹Tsî ǂomxase gu ge ǂû tamase hâo, ob ge Pauluba ǁîgu ǁaegu khâi tsî ge mî: ǁNâuǀnamhe ta ga hâ io, aogo, tsî ge ga Kretasa xu ǂnauǁnâ tama hâ io, os ga nē ǂhanis tsî ǂkhôas tsîra ǁkhaehe hâ i.

²²Tsî nēsi ta ra ǁnama go, ǃgâiǂâixa go nî ti, ǀguib xaweb âgo ûiba ǂoaǃnâ tide xuige, doe-ommi ǀguib kom nîra hîkākāheo.

²³Nē ī go tsuxub ǁkhāb ǃnâb ge Elob di ǀhomǃgāb, ǁîb di ta ab tsî ǃoaba ta raba tita tawa mâ,

²⁴tsî go mî: Tā ǃao, Paulutse, Kaesari aiǃâts ge nîra mâihe; Elob ge sats ǀkha ǃgû garun hoana go ǀkhae tsi.

²⁵ǁNā-amaga ǃgâiǂâixa re, aogo, Eloba ta kom ra ǂgomo, mîbahe ta gos ǁkhās xase i nîra ī ǃkhaisa.

²⁶Xawe ge kom sage ǂanǂansa ǃnāǃnuiros tawa nîra aoǂuiheo.

²⁷Tsî disihakaǀaǁî tsuxub ge hāo, Adriaǁî hurib ǃnâ ge ra doeǁgamahe hîa gu ge hurikhoega tsuxuǃgâ nî ī ǁaeb ai ǃhū-e ge ra ǀgū ti ge ǂâi.

²⁸O gu ge ǀnō-ūǀurisa aoǂui tsî ge hō ǃnonadisiǃnaniǀa metergu kōse i a ǃgam ǃkhaisa, tsî ǁnāpa xu aiǃâro gu ge ǁkhawa aoǂui tsî ǀgamdisihûǀa meterga ge hō.

²⁹Tsî ǀnîsi gu nî ǀuixa ǃkhaidi tawa ǃnom ti gu ge ǃao amaga gu ge doe-ommi di khaosa xu haka ankerga ge aoǂui, ǁgoa i kasa ǁkhore tsî.

³⁰Tsî doe-ommi sîsenaogu ge doe-omma gu nî ǁhâxūsa ôa-am, tsî ǂgausa hurib ai ǁgôa kaio, ankerga gu nî aidoe-omma xu aoǂui ǂgao khami ra dīsense,

³¹ob ge Pauluba danakhoeb tsî toro-aogu tsîgu ǃoa ge mî: Nēgu ga doe-ommi ǃnâ hâ tama io, o go sago ona a sâuhe ǁoa.

³²O gu ge toro-aoga ǂgaus di tsuriga ǃkhaiǃgao, tsî ge ǁnā kai si.

³³Tsî ǁgoa i nî ǁaeb aib ge Pauluba ǁîgu hoaga ge ǁnama, ǂûna gu nî ǂûsa, tsîb ge ge mî: Disihakaǀaǁî tsēs ge nē tsēsa, ǃâu rase go ǂû tamase ge hâ isa, xū-i xare-e ū tama hâǃâ.

³⁴ǁNā-amaga ta ra ǁnama go, ǂûna go nî ǂûsa, ǁîs kom sago di sâuhes ǃoa nî huio, ǀguib âgo xaweb di ǀgui danaǀû-i xare-i kom ǁnā tideo.

³⁵Tsî nēna mî tsîb ge pereba ū, hoagu aiǃâ Eloba gangan, tsî khôa bi tsî ge ǂûtsoatsoa.

³⁶O gu ge hoatsama ǃgâiǂâixa tsî ǁkhāti ǂû-e ge ǂû.

³⁷Tsî ge ge hoage doe-ommi ǃnâ ǀgamkaidisi tsî hûdisiǃnaniǀa ǀomse ge hâ i.

³⁸Tsî ǂûǁâ gu geo, o gu ge doe-omma ge supusupu, ǃhoroba hurib ǃnâ aoǂgā tsî.

³⁹Tsî ǁgoas ge ǁgoao, o gu ge ǃhūba mûǂan tama ge i, tsî ǃgâi amǃgâ-e ūhâ ǃkhai-e gu ge mû, o gu ge īǁkhā i kao, doe-omma ǁnāǀî gere ūsī ǂgao.

⁴⁰Tsî ankerga gu ge ǃgaoǁnâo, tsî hurib ǃnâ ǁnā kaio, o gu ge ǁkhāti ǃnariǃhâuga ge xore, tsî aisaila ǂoab ǃoa dīǃā tsî amǃgâb ǃoa ge ǃgû.

⁴¹Tsî ǃnamkha hoakha ai huriba ūhâ ǃkhai-i tawa gu ge sī, o gu ge doe-omma ǁî-i tawa ge mâ kai, ob ge aisǀkhāb doe-ommi diba gon ǁoasase ge ǁapomâ, tsîb ge khaosǀkhāb doe-ommi diba ǃgabigu di ǀgaib xa ge khôaǂkhūhe.

⁴²O gu ge toro-aoga ge ǀapeǀape ǃkhōsana gu nî ǃgamsa, î-i tā ǀgui-i xare-e tsâǂoa tsî ûi.

⁴³Xaweb ge danakhoeba Pauluba sâu ǂgao ge hâ i, ob ge ǁîgu di ǂâibasensa ǃkhâi tsî ge mîmā, î gu tsâ ǁkhāga aibe uriǁgôa, î gu ǃhūb tawa sī.

⁴⁴Î gu nauga ǃnaogu ai, tsî nauga doe-ommi di ǃâdi ai sī ti. O i ge ǁnāti ge ī, hoagu ge sâusase ǃhūb tawa sī ǃkhaisa.