Read Khoekhoegowab ǃNaeǃkhaidi 28 Bible Online

ǃNaeǃkhaidi 28 - Khoekhoegowab bible

ǃNaeǃkhaidi 28

¹Tsî sâuhe ge geo, o ge ge ǁnâu, ǁnā ǃnāǃnuis Melite ti ra ǂgaihe ǃkhaisa.

²Tsîn ge ǁnāpa hâ khoena sige ǂkhari tama khoexasiba ge ǁgau, ǀae-e khau tsîn ge sige hoage ge ǃkhōǃoa, ǁnā ǀapib tsî ǃkhaib tsîn ǃaroma.

³Tsî Paulub ra ǀaena ǀhaoǀhao tsî ǀaes ai ǁgui hîa i ge ǃgāxa ǀao-e ǀgamma xu ǀkhī, tsî ǁîb ǃommi ai ge nâmâ.

⁴Tsî khoen ge ǀaob ǁîb di ǃommi ai ǂgāmâisen hâ ǃkhaisa mûo, on ge ge mîǀîgu: ǃGamaob kom nē khoeb, ǀkhaob ûi kai tamabao, huriba xub go ûi xawe.

⁵Xaweb ge ǁîba ǀaoba ǀaes ǃnâ ge ǃhaebeǁnâ, tsî tsū xū-e tsâ tama ge i.

⁶On ge ǁîna ge ǃâu, xâib nîsa, ǁō hâseb nî ǀnîsi ǁnāsa. Xawe ǂomxarosen ge ǃâu tsî mûo, tsūǃō-i xare-i ǁîb ǂama hā tamasa, on ge ǀkhara, tsî: Elo-i komo, ti ge mî.

⁷Tsî ǁnā ǃkhais ǀgūseb ge ǃnāǃnuis di ǂgurosab, Publiub ti ǀon hâba ǃauga ǁgoe ǃhanaga ge ūhâ i; ǁîb ge sige ǃkhōǃoa, tsî sige ǃnona tsēde khoexaǃnâse hâǃkhai-e ge mā.

⁸Publiub îb ge ǁkhais tsî ǃnātsûb xa ǀaesen hâse ge ǁgoe i. ǁÎb tawab ge Pauluba ǂgâ, tsî ǀgore tsî ǃomma ǁgui-ai, tsî ge ǂgauǂgau bi.

⁹Tsî ǁîs ge īo, on ge ǁkhāti naun ǃnāǃnuis ai ǀaesenga ūhâna hā tsî ge ǂgauǂgaukaisen.

¹⁰Tsîn ge sige kai ǃgôasib ǀkha ge ǃgôa, tsî ǂoa ge ge ǃnubain ge daob ai ge ǂhâ hâna ge māge.

¹¹Tsî ǃnona ǁkhâgu khaoǃgâ ge ge Aleksandriaǁî doe-om-i, ǃnāǃnuis ai saoba hâtoa hâ-i, tsî ǀgēkha di saosa ūhâ-i ǃnâ ge ǂnauǁnâ.

¹²Tsî Sirakusas tawa ge ge sīo, o ge ge ǃnona tsēde ǁnāpa ge hâ.

¹³ǁNāpa xu ge ge naru, tsî Regiums tawa ge sī; tsî ǀgui tsēs khaoǃgâ, ǃkhawagas ǂoab ge ǃgomkhâio, o ge ge ǀgamǁî tsēs ai Puteolis tawa ge sī.

¹⁴ǁNāpa ge ge ǃgâsana hō, tsî ǁîn xa ge ǂganhe, hû tsēde ge nî ǁîn ǀkha hâsa. Tsî ǁnāti ge ge Romes tawa ge sī.

¹⁵ǁNāpa xu gu ge ǃgâsaga, sige din xa gu ge ǁnâuo, sige ge ǃgûǃoa Apiub-ǁamaxūǃkhais tsî ǃNona Hâǃkhaigu kōse; tsî Paulub ge ǁîga mûo, ob ge Eloba gangan tsî ge ǃgâiǂâixa.

¹⁶Tsî Romes tawa ge ge sio, ob ge danakhoeba ǃkhōsaga ǂamkhoeba ge māǁnâ. Tsîb ge Pauluba torokhoeb ǁîba nî sâub ǀkha ǀguri hâ oms ǃnâ ǁansa ge mā-amhe.

¹⁷Tsî i ge ǃnona tsēdi khaoǃgâ ge ī, ob ge Pauluba Jodeǁîn di ǂgurosaga ge ǂgaiǀhû. Tsî ǀhû gu geo, ob ge ǁîgu ǃoa ge mî: Aogo, ǃgâsago, tita ge ǁaes ǃoagu tsî abogu ǂūgu ǃoagu hâ xū-e dī tama hâ, xawe ta ge Jerusalemsa xu ǃgaehe hâse Romeǁîn di ǃomǁae ge māǁnâhe.

¹⁸Tsî ǁîgu ge ôaǃnâ teo, o gu ge ǁnāxū te ǂgao ge hâ i, ǁōba anu hâ ǀhapi-i tita ǃnâ hâ tama ge hâ i xui-ao.

¹⁹Xawe Jodeǁîn ge ǃhoaǃoao, o ta ge Kaesara ǂgaimāsensa ge ǁgarihe, xawe ti ǁaes xa ta ga ǀanaǃgâxū-e ūhâ khami tama.

²⁰O ta ge ǁî ǃkhais ǃaroma sago go ǂgaihā, mû tsî ta nî ǃhoa-ū gose: Israeli ǃâubasens ǃaroma ta nē ǁkhammi ǀkha ǃgaehe hâ xui-ao.

²¹O gu ge ǁîb ǃoa ge mî: Sige ge Judeaba xu sats xa ǂkhani-e hō tama hâ, tsî i ge ǁkhāti ǃgâsan di ǀgui-i xare-e nēxopa hā, tsî sats xa xū-e ǂhôa tama hâ.

²²O ge ge satsa xu ra ǁnâu ǂgao, matits ra ǂâi ǃkhaisa. Nē ǀasa ǂgoms xa i ge ǂansa xui-ao, mâ ǃkhai-i hoa-i tawab ra ǃhoaǃoahe ǃkhaisa.

²³Tsî tsē-en ge mâiba bio, on ge ǂguina ǁîb tawa ǁîb hâǃkhais ǃnâ ge hā, ǁînab ge Elob gaosiba ǁguiǃā, tsî gere ǀhûǀguitimîba, tsî ǁîna Jesub din xa gere mîdanba, Moseb tsî kēbo-aogu tsîga xu, ǃnauǁgoagasa xu ǃuis kōse.

²⁴On ge ǀnîna ǁîb goro mîna ge ǂgom, xawen ge nauna ǂgom tama ge i.

²⁵Tsî ǀguiǂâi taman ge io, on ge ge bē, Paulub ge nē mîs ǀguisa mîo: ǃGâiseb ge ǃAnu Gagaba kēbo-aob Jesajaba xu sadu îna ǃoa ǃhoa

²⁶tsî ge mî: Nē ǁaes ǃoa ǃgû, î mî: ǂGaes ǀkha du nî ǁnâu, xawe du ǁnâuǃā tide, tsî mûs ǀkha du nî mû, xawe du mûǂan tide.

²⁷ǂGaob nē ǁaes dib ge a ǁau, tsî ǂgaedi ǀkhan ra tsūse ǁnâu, tsî mûdi ânan ra ǂganam, mûdi ǀkhan tātsē mû tidega, tsî ǂgaedi ǀkhan tātsē ǁnâu tidega, tsî ǂgaob ǀkhan tātsē ǁnâuǃā tidega, tsî tātsēn ǃhobasen tsî ta ǁîna ǂgauǂgau tidega.

²⁸Î du ǁnâi ǂan, Elob di ǃgâiǃōsib ge ǀūbena ge sîbahe ǃkhaisa, tsîn ge ǁîna nîra ǁnâu.

²⁹Tsî nēnab ge mîo, on ge Jodeǁîna ge ǃgûbē, ǂgui xūn xa ǁîn ǃnâ ra ǂnoaguse.

³⁰Tsîb ge Pauluba ǀgam kurikha ǁîb di ǁanǃkhais ǂûs ǃnâ ge hâtoa, tsîb ge ǁîb tawa ra hān hoana gere ǃkhōǃoa.

³¹Tsî Elob di gaosiba aoǁnâ, tsî ǁkhoaǂgaosib hoab ǀkha ǃKhūb Jesub Xristub xa gere ǁkhāǁkhā, ǂhanihe tamase.