Read Khoekhoegowab ǃNaeǃkhaidi 3 Bible Online

ǃNaeǃkhaidi 3 - Khoekhoegowab bible

ǃNaeǃkhaidi 3

¹Tsî kha ge Petrub tsî Johaneb tsîkha khoeseǁî iri ai tempeli ǃoa ge ǃgû, ǀgorehe ra ǁaeb ai.

²Tsî ǂanǂansa khoeb ge ǃnaesa xu ge ǃhora i, tsî gere tanihe; on ge ǁîba tsēkorobe tempeli dao-ams, Îsa ti ra ǂgaihes tawa gere ǂnûi, tempeli ǃnâ ra ǂgâ khoen aib nî auheb nîsa ǂganbasense.

³Tsî Petrub tsî Johaneb tsîkhab ge mû tempeli ǃnâ kha ra ǂgâǁga hîa, ob ge auheb nîsa ge ǂganbasen.

⁴O kha ge Petrub tsî Johaneb tsîkha ǃgabe bi, tsî ge mî: Sikhoma kō!

⁵Ob ge kō tsî ge ǃâu, xū-eb nî ǁîkha xu hō ǃkhaisa.

⁶Xaweb ge Petruba ge mî: ǀHaiǀurimari-i tsî ǃhuniǀurimari-e ta ūhâ tama hâ, xawe ta ū ta hâ-e ra mâ tsi: Jesub Xristub Nasareǁîb di ǀons ǃnâ khâi î ǃgû!

⁷Tsîb ge amǀkhāb ǁôab tawa ǃkhō tsî ge ǂgaekhâi bi. On ge ǁîb di ǂaira tsî ǃnôara tsîna ǁnātimîsi ge ǀgai.

⁸Ob ge urikhâi tsî mâ tsî ge ǃgû, tsî ǁîkha ǀkha tempeli ǃnâ ge ǂgâ, ǃgûma tsî uri tsî Eloba ra karese.

⁹Tsîs ge ǁaes hoasa ǃgûma tsîb ra Eloba kare ǃkhaisa ge mû.

¹⁰Tsîn ge ǁkhāti ge mûǂan bi, ǁnāb hîa auhes ǃaroma tempeli di îsa dao-ams tawa go ǂnôa iba, on ge burus tsî ǃhurib tsîra xa ge ǀoa, ǁîb ǀkha go ī ǃkhais xa.

¹¹Tsî ǂuru go ǃhorab ge Petrub tsî Johaneb tsîkha tawa hâǁapo-o, os ge ǁaes hoasa ǁîgu tawa omǃnāb, Salomob dib ti ra ǂgaiheb ǃnâ ǃkhoeǀhao tsî ge buru.

¹²Tsî Petrub ge mûo, ob ge ǁaesa ge ǃeream: Israelǁîdo, tarexa du kha ǁîs ǂama ra buru? Tsî tarexa du kha sikhoma ra ǃgapalî, ǁîǀgaib tsî ǁî-eloǃaoǃgâsiba xu khom go ǃgû kai bi khami?

¹³Elob, Abrahammi tsî Isaki tsî Jakob tsîgu dib, Elob sada abogu dib ge ǁîb di Ôab Jesuba ge ǂkhaiǂkhai, ǁîb, sadu ge māǁnâb, tsî Pontiub Pilatub di ais aiǃâ du ge ǀūxūb, ǁnāxūheb nî, tib gere ǀgoraǃgâhe ǃnubai.

¹⁴O du ge ǃAnub tsî ǂHanu-aiba ǀūxū tsî ge ǂgaoǀkhā, khoeb hîa ǃgamaoba du nî xūbahe ǃkhaisa.

¹⁵Xawe ûib di ǂgaeǂgui-aoba du ge ge ǃgam. ǁÎbab ge Eloba ǁō hâna xu ge ǂkhaiǂkhai, ǁî ǃkhais xa ge ge sige a ǀhûǀguitimî-ao.

¹⁶Tsî ǁîb di ǀons ǃnâ ǂgomsa xub ge Jesuba nēb, mû tsî du ǂan hâba go ǀgaiǀgai; tsî ǂgoms ǁîba xu go ǀkhīs ge ǁîba sadu hoadu aiǃâ nē ǂurusiba go mā.

¹⁷Tsî nēsi, ǃgâsado, ǂan ta a, ǀūsa xu du ge ǁnāsa dī ǃkhaisa, sadu ǂamkhoegu on khami.

¹⁸Xaweb ge Eloba ǁîb di kēbo-aogu hoagu di amsa xub gere aiǂhôan, Xristub nî tsâ tina, ǁnāti go ǀoaǀoa.

¹⁹ǃHausen ǁnâi î du ǃhobasen, sadu ǁoren nî ǀarihese, î gu khoakhoahes di ǁaega hā ǃKhūb di aisa xu,

²⁰îb sî Jesub Xristub, sadu ǀnai aoǁnâhe hâb,

²¹ǀhommi nîra ǃkhōǂgāba, hoa xūn nîra ǃkhō-ūnuhe ǁaegu kōse, ǁnān Elob ge hugasa xu ǁîb ǃanu kēbo-aogu di amsa xu gere ǃhoana.

²²ǀNaib ge Moseba mî xui-ao: Kēbo-aobab ge ǃKhūb sadu Eloba, sadu ǃgâsaga xu nî ǂkhaiǂkhaiba du, tita khami ība; ǁîba du ge nî ǃgâ, mîba dub ka xūn hoan ǃnâ.

²³Tsî i ge nîra ī, mâ ǀoms hoas, ǁnā kēbo-aoba ga ǁnâu tama is nî ǁaesa xu ǃhaeǂuihe tsî hîkākāhe ǃkhaisa.

²⁴Tsî kēbo-aogu hoagu Samuela xu tsî ǁnās khaoǃgâ gere ǃhoagu, ge nē tsēdi xa gere aiǂhôa.

²⁵Sadu ge kēbo-aogu tsî ǃgaeǀhaos di ôado, Elob ge ǁgûgu ǀkha dīsa, Abrahammi ǃoab ge mîo: “Tsî sa surib ǃnâ di ge ǃhūbaib di ǃhaodi hoade nîra ǀkhaehe.”

²⁶ǂGurosab ge Eloba ǁîb Ôab Jesuba sado ǂkhaiǂkhaiba, tsî ge sî bi, sadob nî ǀkhaese, mâ-i hoa-e ǁî-i di ǂkhabasiba xu ra ǃhobasen kaiǃâ.