Read Khoekhoegowab ǃNaeǃkhaidi 4 Bible Online

ǃNaeǃkhaidi 4 - Khoekhoegowab bible

ǃNaeǃkhaidi 4

¹Tsî ǁaes ǃoa kha ra ǃhoa hîa gu ge pristergu tsî tempeli di ǂamkhoeb tsî Sadusegu tsîga ǁîkha tawa ge hā,

²ǀara hâse, ǁaesa kha ra ǁkhāǁkhā tsî kha Jesub ǃnâ ǁō hâna xu khâisa ra aoǁnâ ǃkhais ǃaroma.

³Tsî gu ge ǃomga ǁîkha ǁgui-ai tsî ǃkhō-oms ǃnâ ge ǂnûi kha nau ǁgoas kōse, ǀnai i ge ǃui i xui-ao.

⁴Xawe ǂguin mîsa ge ǁnâun ge ge ǂgom, ob ge ǃgôab aogu diba ge ǁaupexa koroǀoadisis kōse sī.

⁵Tsî i ge nau ǁgoas ai ge ī, o gu ge ǁîn di danakhoegu tsî kaigu tsî xoaǂansabegu tsîga Jerusalems tawa ge ǀhao,

⁶Annab ǀgapipristeri tsî Kajafab tsî Johaneb tsî Aleksanderi tsî ǀgapipristeri ǃhaosa xu ge hâ igu kōse.

⁷Tsî gu ge ǁîkha ǁaegub ǃnâ mâi tsî ge dî kha: Mâ ǀgaiba xu tsî mâ ǀons ǃnâ kho kha nēsa go dī?

⁸Ob ge Petruba ǃAnu Gagab xa ǀoa hâse ǁîgu ǃoa ge mî: ǁAes di ǂamsago tsî Israeli di kaigo!

⁹Sikhom ga nētsē ǃeream kaiheo, ǀaesen hâ khoeb tawa go ī ǃgâidīs ǃaroma, tari-e xub go ǁîba ǂgau ǃkhaisa,

¹⁰o go sago hoago tsî Israeli ǁaes didu hoado nî ǂan, Jesub Xristub, Nasareǁîb, sadu ge ǃgâub, Elob ge ǁō hâna xu ǂkhaiǂkhaib di ǀons ǃnâ, ā, ǁîba xub ge nēba ǂgause sadu aiǃâ mâ ǃkhaisa.

¹¹ǁÎb ge ǁnā ǀuib, sadu om radu xa ge ǃharaxūheb xawe ge ǁhôas di danaǀui kaiba.

¹²Tsî ǀnî-i ǃnâs oresa hâ tama hâ, tsî i ǁkhāti ǀnî ǀon-e ǀhommi ǃnaga khoena māhe tama hâ, ǁî-i ǃnâ da nî orehe-e.

¹³Tsî Petrub tsî Johaneb tsîkha di ǂhauǃnâsiba mû tsî gu ge hōǃâo, ǁkhāǁkhāhe tama tsî ǀūǂam khoekha asa, o gu ge ge buru, mûǂan kha gu ge xui-ao, Jesub ǀkha kha ge hâ i ǃkhaisa.

¹⁴Tsî ǂgau go khoeb ǁîkha tawa mâsa gu ge mûo, o gu ge ǃhoaǃoa gu nî xū-e ūhâ tama ge hâ i.

¹⁵O gu ge ǀapeǀhaosa xu kha nî ǂoa ti ge mîmā, tsî ǀapeǀape tsî ge mî:

¹⁶Tare-e ge kha nē khoekha nî dī? ǂAnǂansa sao-i go ǁîkha xu a ī ǃkhais kom Jerusalems ǃnâ ǁan hân hoan tawa a ǂhaisao tsî ge kom ǁîsa a ǀoa ǁoao.

¹⁷Xawe ǃaruǀîs ǁaes ǃnâ khoraǂuihe tidese, a ge ǁîkha ǁkhōse ǃkhâi, ǃaruǀî kha nē ǀons ǃnâ khoe-i xare-i ǀkha ǃhoa tide ǃkhaisa.

¹⁸O gu ge ǁîkha ǂgai tsî ge mîmā kha, hoaragase kha Jesub ǀons ǃnâ ǃhoa tsî ǁkhāǁkhā tide ǃkhaisa.

¹⁹O kha ge Petrub tsî Johaneb tsîkha ǃeream tsî ǁîgu ǃoa ge mî: Aitsama ǀgora, ise i Elob aiǃâ a ǂhanu ǃkhaisa, sago Elob ǂamai nî ǁnâuǀnamsa?

²⁰ǀÛ ǁoa khom kom ao, mû tsî khom ge ǁnâun xa ǃhoasa.

²¹O gu ge ǁîkha ǁgari tsî ge xū kha, mati gu nî ǁîkha ǁkhara ǃkhaisa ǀū tsî, ǁaes ǃaroma, hoan ī gos xa Eloba gere kare xui-ao.

²²Hakadisi kuriga ǃnā hâ khoeb ge i xui-ao, nē saos ǂuru kais dis go ībaba.

²³Tsî xūhe kha geo, o kha ge ǁîkha din tawa sī, tsî ǁîna ge ǂhôa, ǀgapipristergu tsî kaigu go mîba kha xūn hoana.

²⁴Tsî ǁnâun geo, on ge ǀguiǂâixase domma Elob ǃoa ǃhâkhâi tsî ge mî: ǃKhūtse, sats ge a ǁnā Elo, ǀhommi tsî ǃhūbaib tsî hurib tsî ǁîb ǃnâ hân hoana ge dītsa,

²⁵Davib, sa ǃgāb di amsa xu ge mîtsa: Tare xū-i ǃaroman ra ǀūbena ǂkhupi, tsî di ǁaede ǁau xūna ra ǂâi?

²⁶ǃHūbaib di gao-aogu ge ra khâi, tsî ǂamsagu ge ra ǀhû, ǃKhūb ǃoagu, tsî ǁîb di Xristub ǃoagu.

²⁷Amab ǃnân kom sa ǃanu ǀGôab Jesub, sats ge ǂkhauǀkhāb ǃoagu ǀhû hâo, Herodeb tsî Pontiub Pilatub ǀūben tsî Israelǁîn tsîn ǀkha,

²⁸dīn nîse, sa ǃommi tsî sa ǂâibasens tsîra ge īn nîs ǃoa ǂnûiǂgān hoana.

²⁹Tsî nēsi, ǃKhūtse, ǁîn di ǁgarisa kō, î sa ǃgāga mā, ǂhauǃnâsib hoab ǀkha sa mîsa ǃhoasa.

³⁰Sa ǃomma ǂgauǂgaus ǃoa ǀhōǂui, î saodi tsî buruxan tsîna ī kai re, sa ǃanu ǀGôab Jesub di ǀons ǃnâ.

³¹Tsî ǀgoren geo, os ge ǀhaon ge hâ i ǃkhaisa ge gongonhe, on ge hoana ǃAnu Gagab xa ǀoa, tsî Elob mîsa ǁkhoaǂgaosib ǀkha gere ǃhoa.

³²Tsî ǂgom hân di ǂnubis ge ǀgui ǂgao tsî ǀgui ǀom ge i, tsî i ge ǁkhāti ǀgui-i xare-e mî tama hâ, ū i hâ xūn a ǁî-i di ǃkhaisa, xawen ge hoa xūna ǀhûpe ge ūhâ i.

³³Tsî gu ge apostelga kai ǀgaib ǀkha ǃKhūb Jesub di khâis xa gere ǃkhō-am, tsî kai ǀkhommi ge ǁîn hoan ǀkha ge hâ i.

³⁴ǀGui-i xare-i, tôasi hâ-i ge ǁîn ǃnâ ge hâ tama hâ i, ǃhanagu tsî omdi tsîna ge ūhâ in kōsen ge ǁîna gere ǁamaxū xui-ao, tsî ǁamaxūhe hâ xū-i di hōǂgāsa ūhā,

³⁵tsî apostelgu di ǂaidi tawa gere ǁgui, o i ge mâ-i hoa-e ǂhâ i ge hâ is ǃoa gere māhe.

³⁶Tsî Joseb, apostelgu xa ǁkhāti Barnabab ti gere ǂgaiheb, (ǁnās ge ǁkhaeǂgaos di ôab ti ra ǂâibasen) Leviǁîb, Siprus dib,

³⁷ge ǃhanaba ge ūhâ i; tsîb ge ǁîba ǁamaxū, tsî mari-e ūhā tsî apostelgu di ǂaidi tawa ge ǁgui.