Read Khoekhoegowab ǃNaeǃkhaidi 5 Bible Online

ǃNaeǃkhaidi 5 - Khoekhoegowab bible

ǃNaeǃkhaidi 5

¹Tsî ǂanǂansa khoeb, Ananiab ti ǀon hâb ge Safiras ǁîb di taras ǀkha ǃhana-e ge ǁamaxū.

²Tsîb ge taras âb on di ǂans ǀkha hōǂgās xa ge ǃgaubasen, tsî ǃâs ǀguisa ūsī, tsî apostelgu di ǂaidi tawa ge ǁgui.

³Ob ge Petruba ge mî: Ananiatse, tare xū-i ǃaromab kha Satanna ǂgaob âtsa go ǀoaǀoa, ots ǃAnu Gagaba go ǂhumiba, tsî ǃhanab di hōǂgās xa go ǃgaubasen?

⁴Sa ǃhanab ase tarexats ūhâ bi tama ge hâ i? Tsî ǁamaxū bits go ǃnubai sa ǀgaib ǃnâ hâ tamab go hâ i? Tare-e kha, ots sa ǂgaob ǃnâ nē dīsa go ǂâibasen? Khoenats ǂhumiba tama, tsîts kom Eloba go ǂhumibao.

⁵Tsî Ananiab ge nē mîde ǁnâuo, ob ge ǁnā tsî ge ǁō. Tsî kai ǃaob ge nēna ge ǁnâun hoan ǂama ge hā.

⁶O gu ge ǂkhamkhoega khâi, tsî ǃgami bi tsî taniǂui tsî ge ǁkhō bi.

⁷Tsî i ge ǃnona nî ī irga ǁnās khaoǃgâ ge ī, os ge tarasa ge hāǂgâ, ī go-e ǀū tsî.

⁸Ob ge Petruba ge ǃeream si: Mîba te re, ise ro go nētikō hōǂgās ai ǃhanaba ǁamaxūsa? Os ge: Ā, ǁnātikō hōǂgās ai, ti ge mî.

⁹Ob ge Petruba ǁîs ǃoa ge mî: Tarexa ro go ǀhûǀgui, ǃKhūb di Gagaba ǃâitsâsa? Mû, sa aoba go ǁkhōgu di ǂaidi ge dao-ams aiǃâ hâ, tsî nî sas ona taniǂui.

¹⁰Os ge ǁnātimîsi ǁîb di ǂaira tawa ǁnā, tsî ge tôasi. O gu ge ǂkhamkhoega ǂgâ tsî ǁîsa ǁō hâse hō tsî taniǂui, tsî aob âs tawa sī ge ǁkhō si.

¹¹O i ge kai ǃao-e ǀhaohâb hoab tsî nēna ge ǁnâun hoan ǂama ge hā.

¹²Tsî apostelgu di ǃomga xun ge ǂgui saodi tsî buruxan tsîna ǁaes ǃnâ gere ī. Tsîn ge hoa ǂgomsabena ǀguiǂâixase Salomob di omǃnāb ǃnâ ge hâ i.

¹³Tsî naun xa i ge ǀgui-i xare-e ǁîn ǀkha ǁaeǁaesensa hîtsâ tama ge hâ i, xawe ǁaes ge ǁîna gere ǀgapiǃgôa.

¹⁴Tsî ǃaruǀîǀguin ge ǃnāsana ge ǀaroǃnâhe, ǃKhūb ǃnâ ra ǂgomn, aogu tsî taradi tsîna.

¹⁵ǁNātikōse i ge ge ī, on ge ǀaesen hâna ǃās di ǃgangu ai taniǂui tsî ǁîna kharogu tsî sâ-aidan ai gere ǁgui, îb Petrub di somma, hāb kao, ǀgui-i âna somsomǂam, ti.

¹⁶Tsîn ge ǁkhāti ǁgoeǂnamipe hâ ǃādi di ǂguina Jerusalems tawa ǀhû, tsî ǀaesen hân tsî ǃanuoǃnâ gagagu xa ra tsûtsûhen tsîna gere ūhā, tsîn ge hoana ge ǂgau.

¹⁷Ob ge ǀgapipristeri tsî ǁîb ǀkha ge hâ igu hoagu Saduseǁîǃnans diga khâi tsî surixasib xa ǀoa,

¹⁸tsî ǁîgu ǃomga apostelgu ai ǁgui tsî ǁîga ǁaes di ǃkhō-oms ǃnâ ge ǂnûi.

¹⁹Xawe ǃKhūb di ǀhomǃgā-i ge tsuxuba ǃkhō-oms di dao-amde ǁkhowa-am, tsî ǁîga ǂgaeǂguiǂui tsî ge mî:

²⁰ǃGûsī, î mâ, î tempeli ǃnâ ǁaes ǃoa mîdi nē ûib didi hoade ǃhoa.

²¹Tsî ǁnâu gu ge, o gu ge ǃnauǁgoaga tempeli ǃnâ ǂgâ tsî gere ǁkhāǁkhā. Tsîb ge ǀgapipristeri tsî ǁîb ǀkha ge hâ igu ona hā tsî ǀapeǀhaos tsî Israeli ôan di kaigu hoaga ge ǂgaiǀhû, o gu ge ǃkhō-oms ǃoa ge sî, ǁîgu nî ūhāhega.

²²Tsî ǃgāgu ge sī, o gu ge ǁîga ǃkhō-oms ǃnâ hō tama ge i, o gu ge ǁkhawa oa, tsî ǂhôa,

²³tsî ge mî: ǃKhō-omsa ge ge ǂōrisase ǂganamhe hâse go hō tsî ǃûi-aoga dao-amdi ǃauga mâse, xawe ǁkhowa-am ge go, o ge kom ǃnāb ǃnâ khoe-i xare-e hō tama go io.

²⁴Tsî tempelǃûi-aogu di danakhoeb tsî ǂampristergu tsîgu ge nē mîde ǁnâuo, o gu ge ge ǀūa-ai tare-i nē-e nî ī ǃkhaisa.

²⁵O i ge ǀgui-e hā tsî ǁîga ge ǂhôa: Mû, ǃkhō-oms ǃnâ go go ǂnûi aogu ge tempeli ǃnâ ǁaesa mâ ra ǁkhāǁkhā ti.

²⁶Ob ge danakhoeba ǃgāgu ǀkha ǃgû tsî ge ūhā gu, xawe ǀgaib ǀkha tama, ǁaesa gu ge ǃao xui-ao, ǀuiǁhomhe gu tidega.

²⁷Tsî ǁîga gu ge ūhāo, o gu ge ǀapeǀhaos aiǃâ ge mâi gu. Ob ge ǀgapipristera ǁîga dî tsî ge mî:

²⁸ǁKhōse ge ǁnâi sago ǃkhâi tama hâ, nē ǀons ǃnâ go ǁkhāǁkhā tide ǃkhaisa? Tsî mû, o go kom Jerusalems hoaragasa sago ǁkhāǁkhās ǀkha go ǀoaǀoao, tsî go kom nē khoeb di ǀaoba sige ai ūhā ǂgao hâo.

²⁹O gu ge Petrub tsî nau apostelgu tsîga ǃeream tsî ge mî: Anu i kom ao, Elob nî khoen ǃgâ-ai ǁnâuǀnamhe ǃkhaisao.

³⁰Elob sada îgu dib ge Jesuba ge ǂkhaiǂkhai, sadu ge ǃgamma, ǁîba ǃgâuhaib ai ǂgā tsî.

³¹ǁÎbab ge Eloba ǁîb di amǀkhāb ǁôab tawa ge ǀgapiǀgapi, ǂAmkhoese tsî ǃGâiǃōdī-aose, Israelab nî ǃhobasens tsî ǁoren ǀûbasa māse.

³²Tsî sige ge a ǁîb di ǀhûǀguitimî-ao nē mîdi ǂama, tsî ǃAnu Gagab, Elob ge ǁîba ra ǁnâuǀnamna a māb on.

³³Tsî ǁnâu gu geo, o gu ge kaise ǁaixa tsî ge ǀapeǀape, ǁîga gu nî ǃgam, ti.

³⁴Ob ge ǀgui Fariseb, Gamaliel ti ǀon hâb, ǂhanuǁkhāǁkhā-aob, ǁaes hoas tawa ǀgapiǃgôahe hâba khâi tsî ge mîmā, apostelgu nî ǂkharirose ǂoa kaihe ǃkhaisa.

³⁵Ob ge ǁîgu ǃoa ge mî: Israelǁî aogo, ǂanbasen re tare-e go nē khoegu ǀkha ra dī ǂgaosa.

³⁶ǁAero-i aiǃâb ge Teudaba khâi tsî ǂamkhoeb a ti gere mî, o gu ge hakakaidisi nî ī khoega ge ǂae-ai bi; ǁîb ge ge ǃgamhe tsî ǁîba ge ǁnâuǀnamgu hoagu ge ǀgaruǀgaruhe, tsî ge ǁauxū kai.

³⁷ǁÎb khaoǃgâb ge Judab, Galileaǁîba, xoamâis di tsēdi ai khâi, tsî ǂgui khoena ǁîb ǃoa ge ǁnāǁgôa kai; ǁîb on ge ge ǁō, tsî hoan ǁîba ge ǁnâuǀnamn ge ge ǀgaruǀgaruhe.

³⁸O ta ra mîba go: Nē khoegu ǀkha ǀû, î ǁîga ǃgû kai. Nē ǂâibasens tsî nē sîsenni tsîra ga khoena xu hâo, o ra kom nî kāo.

³⁹Tsî Eloba xu ra ga hâo, o go kom sago ǁîra a hîkākā ǁoao, î go tā ǀnîsi Eloba ra ǃkhamūgo ase hōhe.

⁴⁰O gu ge ǁîba ǃkhō-am tsî apostelga ǂgai tsî ǂnau tsî ge ǃkhâi gu, Jesub ǀons ǃnâ gu ǃhoa tide ti, tsî ge ǁnāxū gu.

⁴¹O gu ge ǁîga ǀapemāǃnans di aisa xu ǃgâiaǂgao hâse ge ǃgû, Jesub di ǀons ǃaroma ǃharaxūhesa tsâsa gu ge anuǃgôahe ǃkhais ǃaroma.

⁴²Tsî gu ge ǀû tama ge hâ i mâ tsēs hoasa tempeli ǃnâ tsî omdi tawa ǁkhāǁkhā, tsî Jesub Xristub xa hâ ǃgâiǂhôasa aoǁnâsa.