Read Khoekhoegowab ǃNaeǃkhaidi 7 Bible Online

ǃNaeǃkhaidi 7 - Khoekhoegowab bible

ǃNaeǃkhaidi 7

¹Ob ge ǀgapipristera ge dî: Nē xūna ǁnātin ī?

²Ob ge Stefanuba ge mî: Aogo, ǃgâsago tsî ǁgûgo, ǃgâ re: ǂKhaisib di Elob ge sada abob Abrahamma ge ǂhai, ganupeb Mesopotamiab ǃnâ hâ hîa, Harans ǃnâb ge ǁans aiǃâ,

³tsî ǁîb ǃoa ge mî: ǃGûǂoa sa ǃhūba xu tsî sa khoexakhoena xu, î ǁgau tsi ta nî ǃhūb ǃoa doe.

⁴ǃNubaib ge Xaldeaǁîn di ǃhūba xu ǂoa tsî Harans tawa ge ǁan. Tsî ǁgûb di ǁōb khaoǃgâb ge Eloba ǁnāpa xu nē ǃhūb, ǁîb ǃnâ du nēsi ǁan hâb ǃoa ge ūhā bi,

⁵tsî ǁîb ǃnâ ǀumi-amǃnâ-e mā bi tama ge i, ǀgui ǂaidās ǀguis kōses tsîn ose, tsî ǁîba ge mîmâiba ǁîb dise tsî ǁîb khaoǃgâ surib âb diseb nî ǁîba mā bi ǃkhaisa, ǀgôa-eb ganupe ūhâ tama hâ hîa.

⁶Tsîb ge Eloba nēti ge mî: Sa surib ge nî ǃhaokhoese ǀkhara ǃhūb ǃnâ ǁan, tsî nî khobodīhe tsî tsūse sîsenūhe, hakakaidisi kurigu kōse.

⁷Tsî ǁîna nî ǃoaba ǁaesa ta ge tita nî ǀgoraǃgâ, (tib ge Eloba ge mî:) Tsî ǁnās khaoǃgân ge ǂoa tsî nē ǃkhais ai nî ǃoaba te.

⁸Tsîb ge ǃgaos di ǃgaeǀhaosa ge mā bi, tsîb ge ǁnāti Isaka ge hō, tsî ǁkhaisaǁî tsēs ai ge ǃgao bi, tsî Isaki ge Jakoba ge hō tsî Jakoba disiǀgamǀa aboga.

⁹Tsî abogu ge Joseba suri tsî Egipteb ǃoa ge ǁamaxū, tsî Elob ge ǁîb ǀkha ge hâ i,

¹⁰tsî ge ore bi ǁîb di ǁgâiǀāgu hoaga xu, tsî ǀkhommi tsî gā-aisib tsîkha ge mā bi Faraob Egipteǁî gao-aob aiǃâ, ob ge mûǂamaose ge mâi bi Egipteb tsî ǁîb ommi hoab ǂama.

¹¹Tsî i ge ǃâtsūǀkhā-e Egipteb tsî Kanaanǃhūb hoaragab ǂama ge hā, tsî kai ǁgâiǀā-e, tsî gu ge sada îga ǂû-e hō tama ge i.

¹²Tsî Jakob ge ǁnâu, Egipteb ǃnâb ǃhoroba hâ ǃkhaisa, ob ge sada îga ǂguro ǃnās ai ge sîǂui.

¹³Tsî ǀgamǁî ǃnās aib ge Joseba ǁîb ǃgâsagu ai ge ǂanǂansen, os ge Joseb ǃhaosa Faraob tawa ge ǂansa.

¹⁴Tsîb ge Joseba sîǂui tsî ǁgûb Jakoba ge haisiba tsî ǁîb di ǀaokhoen hoana, hûdisikoroǀa nî ī ǀomde.

¹⁵Ob ge Jakoba Egipteb ǃoa doeǁgôa tsî ge ǁō, ǁîb ǂûb tsî sada îgu ona.

¹⁶Tsî gu ge Sexems ǁga ūsīhe tsî ge ǁkhōhe, ǀhobas, Abrahammi ge ǁnāpa Sexems ai ǀurimaridi ǀkha Hemori ôagu tawa ǁama hâ is ǃnâ.

¹⁷Tsî mîmâis di ǁaeb ge ǀgūo, Elob ge Abrahamma nūbaba, os ge ǁaesa ǀomkhâi tsî ge ǂguiǂguisen Egipteb ǃnâ,

¹⁸ǀkhara gao-aob, Joseba ǂan tamab ge Egipteb ǃnâ khâis kōse.

¹⁹Nēb ge sada ǃhaosa gāxaǃnâsib ǀkha dā tsî sada îga tsūse sîsenū tsî ge mîmā, în ǁîn di ǂkham ǀgôarona aoxū, aiǃâb ǃoan ûi tidese.

²⁰ǁNā ǁaeb ge Moseba ge ǃnae, tsîb ge Elob aiǃâ kaise îsa ge i, tsîb ge ǃnona ǁkhâga ǁgûb di oms ǃnâ gere kaikaihe.

²¹Tsî aoxūheb geo, os ge Faraob ôasa ǁîba ge ǃkhōǃoa, tsî ǁîs di ôase gere kaikai bi.

²²Ob ge Moseba Egipteǁîn di gā-aisib hoaba gere ǁkhāǁkhāhe, tsîb ge ge ǀgaisa i mîdi tsî sîsengu âb ǃnâ.

²³Tsî hakadisi kurixab geo, ob ge ge ǂâibasen, ǁîb ǃgâsan, Israeli ôanab nî sarisa.

²⁴Tsî ǀguib ân ra ǁgâiǀāhe ǃkhaisab ge mûo, ob ge hui bi tsî ǁgâiǀāhe raba ge ǀkhaoba Egipteǁîba ǂnauǃan tsî.

²⁵Ob ge ge ǂâi, ǃgâsagu âb nî mûǂan, Elob ra ǁîna ǁîb di ǃomma xu oresa dība ǂgao ǃkhaisa, xawe gu ge mûǂan tama ge i.

²⁶Tsî nau tsēs aib ge, ǀgamkha ra ǃkhamgu hîa, ǁîkha ǁaegu ǂhai tsî ǂkhîbagus ǃoa ǁgari kha tsî ge mî: Aokho, khoeǃgâgu kho kom sakho-o, tare xū-i ǃaroma kho ǁnâi ra tsūdīgu?

²⁷Ob ge ǁîb ǀgūkhoeba ra tsūdība Moseba ǂhāxū, tsî ge mî: Tari-e kha satsa sikhom ǂama danakhoese tsî ǂhanuǂhanu-aose ge mâi?

²⁸Tita tsînats ra ǃgam ǂgao, ǁarits go Egipteǁîba ǃgams ǁkhās xase?

²⁹Ob ge Moseba nē mîs ai ǃkhoeni tsî ge ǃhaokhoe kai Midianǃhūb ǃnâ, ǁnāpab ge ǀgam ǀgôakha ge hō.

³⁰Tsî ǁkhawa hakadisi kurigu khaoǃgâb ge ǃKhūb di ǀhomǃgāba ǁîba Sinaib di ǃgaroǃhūb ǃnâ ge ǂhai, khau ra ǀaes ǁkhūhais dis ǃnâ.

³¹Tsî Moseb ge mûb gen ǂama ge buru. Tsî ǃgûsīb geo, ǃgapab nîse, ob ge ǃKhūb di domma ge ǁnâu:

³²“Tita ge sa îgu di Elota, Abrahammi di Elota, tsî Isaki di Elota, tsî Jakob di Elota,” ti. Ob ge Moseba ǀkhū, tsî ǃgapaǀîsa dītsâ tama ge i.

³³Ob ge ǃKhūba ǁîb ǃoa ge mî: ǁHarora sa ǂaira xu ǂgaeǂui: ǁÎs aits mâ ǃkhais a ǃanu ǃhū xuige.

³⁴ǃGāsase ta ge go mû ti ǁaes Egipteb ǃnâ hâs di tsâba, tsî ta ge ǁîn di ǃgaede go ǁnâu, tsî ta ge go ǁgôaxa, ǁîna ta nî orese. Hā ǁnâi î ta Egipteb ǃoa sî tsi.

³⁵ǁNā Moseb ǁkhāb, ǁîgu ge ǃkhōǃoa tama ib: Tari-e kha satsa sige ǂama danakhoese tsî ǂhanuǂhanu-aose ge mâi? ti mî tsîb, ǁîbab ge Eloba danakhoese tsî ore-aose ge sî, ǁkhūhais ǃnâ ge ǂhai bi ǀhomǃgāb di ǃomma xu.

³⁶ǁÎb ge ǁîna gere ǂgaeǂguiǂui, buruxan tsî saodi tsîna dī Egipteb ǃnâ, tsî ǀApahurib ǃnâ tsî ǃgaroǃhūb ǃnâ hakadisi kuriga.

³⁷ǁÎb ge a ǁnā Mose, Israeli ôan ǃoa ge mîba: Kēbo-ao-eb ge ǃKhūb sadu Eloba nîra ǂkhaiǂkhaiba du sadu ǃgâsana xu, tita khami ība; ǁîba du ge nî ǁnâu.

³⁸ǁÎb ge ǁnāb, ǀhomǃgāb xa ge Sinaiǃhommi ai ǃhoa-ūheb, tsî sada îgu on ǀkha ǀhaohâb ǃnâ ǃgaroǃhūb ǃnâ ge hâ iba; ǁîb ge ûitsama mîde ge ǃkhōǃoa, sadab nî ǁîde māse.

³⁹ǁÎba gu ge sada îga ǁnâu ǂgao tama i, tsî aoxū bi tsî ǁîgu di ǂgaogu ǀkha Egipteba ǃoa ǁkhawa oa,

⁴⁰tsî Aronni ǃoa ge mî: Eloga dība da, sada ra aiǃgûbaga; sada a ǀū xuige, tare-i nē Moseb, sada Egipteba xu ge ǂgaeǂguiǂuib ǀkha go ī ǃkhaisa.

⁴¹On ge ǁnā tsēdi ai tsâu-i di ība dī, tsî ǁî-e elo-i ase ǁguibade ǁguiba tsî ǁîn ǃomgu di sîsenni ǂama gere ǃgâiaǂgao.

⁴²Ob ge Eloba ǂnan tsî ǁîna ge māǁnâ, on ge ǀhommi di ǀgamirode gere ǃoaba, kēbo-aogu di ǂkhanis ǃnâ xoamâihe hâ khami: Tita du kha, Israeli ommi dido, ǂāǁguibadi tsî ǂûǁguibadi tsîde ge ǁguiba ǁnā hakadisi kuriga ǃgaroǃhūb ǃnâ?

⁴³Tātsē, Moloxi di oms tsî sadu elob Refanni di ǀgamirosa du gere tani, tsî ǁnā īgu, ǀgoreǀîhe nîse du gere dīga, o ta ge sado Babilons nauǀkhāb ǃoa nîra ūǃgû.

⁴⁴Sada îgu ge ǃgaroǃhūb ǃnâ ǃkhō-ams di omsa ge ūhâ i, Moseb ǃoa ge ǃhoab ge ǂnûiǂgā khami, mûb ge ai-īsib ǃoab nî ǁîsa dī ǃkhaisa.

⁴⁵ǁÎsa gu ge ǁkhāti sada îgu, ǁîsa ge hōga Josuab ǀkha ge ūǂgā, ǀūben di ǃhūban ge ū ǃnubai, ǁnā ǀūben, Elob ge sada îgu di aisa xu doeǁgaǂuina, Davib di tsēdi kōse.

⁴⁶ǁÎb ge Elob aiǃâ ǀkhomma ge hō, tsîb ge ge ǀgore, Jakob di Elobab ga ǁanǃkhai-e hōba ti.

⁴⁷Xaweb ge Salomoba ǁîba om-e ge ǂnubiba.

⁴⁸Xaweb ge Hoan xa ǀGapiba ǃomgu ǀkha dīhe hâ tempelgu ǃnâ ǁan tama hâ, kēbo-aob ra mî khami:

⁴⁹ǀHommi ge a ti tron, tsî ǃhūbaib ge a ti ǂaiǃnao, mati ī om-e du kha tita nî ǂnubiba, tib ra ǃKhūba mî; tsî mâ-i a ti sâb di ǃkhai-e?

⁵⁰Ti ǃomma kha nēn hoana dī tamab hâ.

⁵¹Sa karosa ǂnîdo tsî ǂgaob tsî ǂgaedi tawa ǃgaohesa tamado, sadu ge hugaǀgui ǃAnu Gagaba ra mâǃoa, sadu îgu gere dī khami du ge sadu ona ra dī.

⁵²Mâb kēbo-aogu diba gu kha sadu îga ǃgôaǃgon tama? Tsî gu ge ǃgam gu, ǂhanu-aib di hāsa gere aiǂhôaga, ǁîb sadu ge ǀapexūb tsî a ǃgamao kaibaba;

⁵³sadu, ǂhanuba ǀhomǃgāgu di ǃoabasa xu ge hō xawe dī tamado.

⁵⁴Tsî nēna gu ge ǁnâu, o gu ge ǂgaogu âga ge ǃkhāǃganuhe tsî gu ge ǁîb ǂama ge ǁaninǁgû.

⁵⁵Ob ge ǁîba ǃAnu Gagab xa ǀoa hâse ǀhommi ǃoa ǃgapakhâi tsî Elob di ǂkhaisiba ge mû tsî Jesuba Elob amǀkhāb ai mâse,

⁵⁶tsî ge mî: Mû, ǀhomga ta ǁkhowa-amsen hâse ra mû, tsî Khoen Ôaba Elob amǀkhāb ǁôab tawa mâse.

⁵⁷O gu ge ǃgari dommi ǀkha ǂgai tsî ǂgaedi âga ǂganam tsî ǀguiǃnâxase ǁîb ai ǃkhoesī,

⁵⁸tsî ǃāsa xu ǂhāǂui tsî ge ǀuiǁhom bi. Tsî ǀhûǀguitimî-aogu ge saran âga ǂkhamkhoeb, Saulub ti ǀon hâb di ǂaira tawa ge ǁgui.

⁵⁹Tsî gu ge Stefanuba ge ǀuiǁhom, ǂgaiǂui tsî ra mîba: ǃKhū Jesutse, ǃkhōǃoa ti gagasa re!

⁶⁰Tsî ǃhonǁgoa tsîb ge ǃgari dommi ǀkha ge ǂgai: ǃKhūtse, tā ǁîna nē ǁoreba ūhâba ti. Tsî nēsa mî tsîb ge ge ǁō.