Read Khoekhoegowab ǃNaeǃkhaidi 8 Bible Online

ǃNaeǃkhaidi 8 - Khoekhoegowab bible

ǃNaeǃkhaidi 8

¹Tsî Saulub ge ǁîb di ǁōb ǃnâ ǀhûpe ge ǃgâibahe hâ i. Tsî i ge ǁnā tsēs ai kai ǃgôaǃgon-e Jerusalems di ǀhaohâb ǂama ge hā; on ge hoatsama ge ǀgaruǀgaruhe Judeab tsî Samariab ǃhūkha ǃnâ, apostelgu ǀguigu ose.

²Tsî gu ge ǀnî eloǃaoǃgâxa aoga Stefanuba ǁkhō tsî kai ǃoaba ge dī ǁîb ǂama.

³Tsî Saulub ge ǀhaohâba gere hîǀhuru, omdi ǃnâ ǃgûma tsî, tsîb ge aogu tsî taradi tsîna tsubuǂui tsî ǁîna ǃkhō-oms ǃnâ ge māǁnâ.

⁴On ge ǀgaruǀgaruhe hâna gere ǃgûma, mîsa ra ǂhôaǃâ.

⁵Tsîb ge Filipuba Samariaǁî ǃās ǃoa ǁgôa tsî Xristuba ǁîna gere aoǁnâba.

⁶Tsî di ge ǂnubide ǀguiǃnâxase ge ǃgaoǃgâ, Filipub gere mîna, dīb gere saoden ge ǁnâu tsî mû xui-ao.

⁷ǂGuin ǃanuoǃnâ gagaga ūhâna xu gu ge ǁnā gagaga kai dommi ǀkha ra ǃause ge ǂoa, tsî ǂgui ǃhom hân tsî ǃhoran tsîn ge ge ǂuruǂuruhe.

⁸Tsî i ge kai ǃgâiaǂgao-e ǁnā ǃās ǃnâ ge hā.

⁹Tsî ǂanǂansa khoeb, Simonni ti ǀon hâb ge aibe ǁnā ǃās ǃnâ ǃgaidīs ǀkha gere aiǃgû, tsî Samariaǁî ǁaes di ǂâide ge burugâ kai, kaiseb a ǂoaǂamsa tib gere mî xui-ao.

¹⁰On ge hoatsama ǂkhamn tsî kain tsîna ǁîb ai māsen tsî: Nēb ge Elob di ǀgaiba, kai ǀgaib ti ra mîheba, ti ge mî.

¹¹Tsîn ge ǁîb ai ge māsen ǂomxa ǁaebab ge ǃgaidīs âb ǀkha ǁîn di ǂâide burugâ kai amaga.

¹²Xawe Filipub, Elob gaosib tsî Jesub Xristub ǀons xa ra ǂhôaban ge ǂgomo, on ge ge ǁāǁnâkaisen aogu tsî taradi tsîna.

¹³Tsîb ge ǁkhāti Simonna ǂgom tsî ge ǁāǁnâkaisen, tsî Filipub tawa ge hâ; tsî ǃnae ge kai saodi tsî ǀgaigu tsînab ge mû, ob ge ge buru.

¹⁴Tsî Jerusalems ǃnâ hâ apostelgu ge ǁnâuo, Samariab ge Elob mîsa ǃkhōǃoa ǃkhaisa, o gu ge Petrub tsî Johaneb tsîkha ǁîn ǃoa ge sî;

¹⁵o kha ge, sī kha geo ǁîna ge ǀgoreba, ǃAnu Gagaban ga ǃkhōǃoasa,

¹⁶ganupeb ge khoe-i xare-i ân ai ǁnā tama ge hâ i, xawen ge ǁāǁnâs ǀguisa ge hîhe hâ i, ǃKhūb Jesub di ǀons ǃnâ.

¹⁷ǃNubai kha ge ǃomga ǁîna ge ǁgui-ai, on ge ǃAnu Gagaba ge ǃkhōǃoa.

¹⁸Tsî Simonni ge mû, apostelkha di ǃomǁgui-aisa xub ra ǃAnu Gagaba māhe ǃkhaisa, ob ge mari-e ūhāba kha,

¹⁹tsî ge mî: Tita ona nē ǀgaiba mā, î-i khoe-e, ǁî-e ta ga ǃomma ǁgui-aio, ǃAnu Gagaba ǃkhōǃoa.

²⁰Ob ge Petruba ǁîb ǃoa ge mî: A-i sa mari-e sats ǀkha kāǁōsib ǃoa ǃgû, Elob mās ra mari-e xu hōhe, tits go ǂâi amaga.

²¹Amǃnâ-i tsî ǀhûǁaresi-i xare-ets kom nē mîs ǃnâ ūhâ tamao, sa ǂgaob Elob aiǃâ ǂhanu tama hâ amaga.

²²ǃHobasen ǁnâi nē ǂkhabasiba xu, î Eloba ǀgore, ǀnîsits nē ǂâibasens sa ǂgaob disa ǀûbahe tide ǃkhaisa.

²³Mû ta kom rao, au tsaba tsîts a ǂkhabasib di ǀhûǁare-ai ǃkhaisa.

²⁴Ob ge Simonna ǃeream tsî ge mî: Sakho ǃKhūba ǀgoreba te, î-i tā sakho go mîn di ǀgui-i xare-e tita ǂama hā.

²⁵Tsî ǃKhūb mîsa kha ge ǃkhō-am tsî ǃhoao, o kha ge Jerusalems ǃoa ǁkhawa ge oa, tsî ǃgâiǂhôasa ǂgui ǃārodi Samariaǁîn didi ǃnâ gere aoǁnâ.

²⁶Tsî i ge ǃKhūb di ǀhomǃgā-e Filipub ǃoa ǃhoa, tsî ge mî: Khâi, î ǃkhawagasǀî ǃgû, Jerusalemsa xu Gasas ǃoa garu ǁgona daob, ǃū-aise ǁgoeb ai.

²⁷Ob ge khâi tsî ge ǃgû. Tsî mû, Etiopiaǁîb, ǀgapiǃgôahesa ǁuiǃkhōmâi-aob, gao-aos Kandakes Etiopiab dis di ǃgari-aob, ǁîs di ǁuib hoab ǂama ge mâihe hâ ib ge Jerusalems ǃoa ge hā, ǀgoreǀîb nîse.

²⁸Tsî ǁarub garu hîab ge ǁîb di kunis ai ǂnôase kēbo-aob Jesajab ǂkhanisa gere khomai.

²⁹Ob ge Gagaba Filipub ǃoa ge mî: ǃGûsī î nē kunisa sao.

³⁰Ob ge Filipuba ǃgûsī tsî ge ǁnâu, kēbo-aob Jesajabab ra khomai ǃkhaisa, ob ge ge mî: ǁNâuǃāts ra xare khomaits ra-e?

³¹Ob ge ge mî: Mati ta kha ga ǁkhā, khoe-i ga ǁguiǃāba te tama io? Tsîb ge Filipuba ge ǁkhau, ǃapa îb ǁîb tawa ǂnû, ti.

³²Tsî xoas di ǃkhais khomaib geres ge nēsa: Gū-i xaseb ge ǂā-aiǃnaos ǃoa ge ūǃgûhe, tsî ǁkhao-i, ǁî-e ra ǂkhom-i aiǃâ a ǃnōsas ǁkhās xaseb ge ams âba ǁkhowa-am tama hâ;

³³ǁîb di ǃgamǃgamhes ǃnâs ge ǁîb di ǀgoraǃgâsa ge ūbēhe. Tari-e nî ǁîb di ǃhaosa ǂgaikhâi ǁkhā? ǁÎb di ûib ge ǃhūbaiba xu ūbēhe hâ xui-ao.

³⁴Ob ge ǁuiǃkhōmâi-aoba Filipuba ǃeream tsî ge mî: ǀKhoma tsi ta ra, tari-i xab kha kēbo-aoba ǁîsa ra mî? ǁÎb ǂûb xa? Nau khoe-i xa?

³⁵Ob ge Filipuba ams âba khowa tsî nē xoasa xu tsoatsoa tsî Jesub di ǃgâiǂhôasa gere ǂhôa bi.

³⁶Tsî daoba-ū kha garu hîa kha ge ǁgam-i tawa ge sī. Ob ge ǁuiǃkhōmâi-aoba ge mî: Kō, nē i ge ǁgam-e hâ. Tare-e nî ǂhani te, ǁāǁnâkaisen ta nîsa?

³⁷Ob ge Filipuba ge mî: ǂGaob hoaragaba xuts ga ǂgomo, o-i ge a īǁkhā. Ob ge ǃeream tsî ge mî: ǂGom ta ra, Jesub Xristub a Elob Ôa ǃkhaisa.

³⁸Ob ge kunisa as mâ, ti ge mîmā, tsî kha ge hoakha ǁgam-i ǃnâ ge ǁgôa, Filipub tsî ǁuiǃkhōmâi-aob tsîkha; tsîb ge ǁîba ge ǁāǁnâ.

³⁹Tsî ǁgamma xu kha ge ǂoa, ob ge ǃKhūb di Gagaba Filipuba ge tsububē, tsî ǁuiǃkhōmâi-aob ge ǃaruǀî mû bi tama ge i; xaweb ge ǁîb daoba ǃgâiaǂgaob ǀkha ge ǃgû.

⁴⁰Tsî Filipub ge Asodus tawa ge hōhe; tsî ǃhūba ra ǃgûmaǃnâǃâb ge ǃgâiǂhôasa ǃādi hoadi ǃnâ gere aoǁnâ, Kaesareas tawab ge sīs kōse.