Read Khoekhoegowab ǃNaeǃkhaidi 9 Bible Online

ǃNaeǃkhaidi 9 - Khoekhoegowab bible

ǃNaeǃkhaidi 9

¹Tsîb ge Sauluba ganupe ǃKhūb di ǁkhāǁkhāsaben ǃoagu ǁgoas tsî ǃgams xa khū hâse ǀgapipristeri tawa ge sī,

²tsî ǁîb tawa ǂkhanide ge ǂgan Damaskus sinagogegu ǃoa, îb ga, ǁnā daob dinab ga hō-o, aogu kas, taradi kas hoasa ǁîna ǃgaehe hâse Jerusalems ǃoa ūǃgû ǁkhā, ti.

³Tsî ǃgûb garu tsî Damaskusab ra ǀgū hîa i ge ge ī, o i ge ǃnapetamase ǃnâ-e ǀhomma xu ge ǃnâǃnâǂnamipe bi.

⁴Ob ge ǃhūb ai ǁnā tsî dom-e ge ǁnâu, ǁîb ǃoa Saultse, Saultse, tare xū-i ǃaromats ra ǃgôaǃgon te? ti ra mî-e.

⁵Ob ge: Taritsa, ǃKhūtse? ti ge mî. Ob ge ǃKhūba ge mî: Tita ge Jesuta, sats ra ǃgôaǃgon ta. ǃGomba tsi nîra, ǃnôara ǃkhari-ūdas ǃoagu ǂnāsa.

⁶Ob ge ǀkhū tsî ǀhū rase ge mî: ǃKhūtse, tare-e ta nî dīsats ǂgao hâ? Ob ge ǃKhūba ǁîb ǃoa ge mî: Khâi î ǃās ǃnâ ǂgâ, ǁnāpats ge nîra mîbahe, tare-ets nî dī ǃkhaisa.

⁷Tsî aogu ǁîb ǀkha daob ai hâgu ge amose ge mâ, domma gu ge ǁnâu, xawe gu khoe-e mû tama amaga.

⁸Ob ge Sauluba ǃhūba xu ge khâi, tsî mûrab ge ǁkhowa-amo, ob ge xū-i xare-e mû tama ge i. O gu ge ǁîba ǃommi ai ǃkhō tsî Damaskus ǃoa ge ūǃgû bi.

⁹Tsîb ge ǃnona tsēde mû tama tsî ǂû tsî ā tama ge i.

¹⁰Tsî Damaskus ǃnâb ge ǂanǂansa ǁkhāǁkhāsabeb, Ananiab ti ǀon hâba ge hâ i, ǁîb ǃoab ge ǃKhūba ai-i ǃnâ: Ananiatse! ti ge mî. Ob ge: Mû, nē ta a, ǃKhūtse, ti ge mî.

¹¹Ob ge ǃKhūba ǁîb ǃoa ge mî: Khâi î ǃās di daob, ǂHanub ti ra ǂgaiheb ǃnâ ǃgûsī, î Judab di ommi ǃnâ Saulub ti ǀon hâb, Tarsuǁîba dîǃgon; mû, ǀgoreb kom rao,

¹²tsîb kom ai-i ǃnâ go mûo, khoeb, Ananiab ti ǀon hâb ra ǁîb tawa ǂgâxa tsî ǃomma ǁgui-ai bi ǃkhaisa, ǁkhawab nî mûse.

¹³Ob ge Ananiaba ge ǃeream: ǃKhūtse, ǂguina xu ta ge nē khoeb xa ge ǁnâu, matikōseb sa ǃanun Jerusalems ǃnâ hâna gere tsūdīsa,

¹⁴tsîb kom nēpas ona ǀgapipristerga xu ǀgaiba ūhâo, sa ǀonsa ra ǂgaiǀîn hoana ǃkhōsao ti.

¹⁵Ob ge ǃKhūba ǁîb ǃoa ge mî: ǃGûsī, ǃkhōǂuibasen ta hâ soab a ǁî xuige, ob ge ti ǀonsa nîra tani ǀūben aiǃâ, tsî gao-aogu aiǃâ, tsî Israeli ôan tsîn aiǃâ.

¹⁶Tita ge nî ǁgau bi, matikōseb nî ti ǀons ǃaroma tsâ ǃkhaisa.

¹⁷Ob ge Ananiaba ǃgû tsî oms ǃnâ ǂgâ, tsî ǃomkha ǁgui-ai bi, tsî ge mî: Ti ǃgâ Saultse, ǃKhūb go sî te, ǁnā Jesub, hā-ūts go daob ai go ǂhai tsiba, ǁkhawa mû tsîts nî ǃAnu Gagab ǀkha ǀoaǀoahese.

¹⁸On ge ǁnātimîsi soron khami ī xūna ǁîb di mûra xu ge ǁnā, tsîb ge ǁkhawa ge mû; ob ge khâi tsî ge ǁāǁnâkaisen

¹⁹tsî ǂûna ū tsî ge ǀgaiǀgaisen. Tsîb ge ǀnî tsēde Damaskus di ǁkhāǁkhāsaben tawa ge hâ i.

²⁰Tsîb ge ǁnātimîsi sinagogegu ǃnâ Jesub xa gere aoǁnâ, Elob Ôab a ǃkhaisa.

²¹On ge ǁnâu ran hoana burugâ, tsî ge mî: ǁÎ tamaba kha ǁnāb, Jerusalems ǃnâ nē ǀonsa ra ǂgaiǀîna go hîǀhurub, tsî ǁîs ǃoa ǁkhāti nēxopa go hāba, ǁînab nî ǃgaehe hâse ǀgapipristergu ǃoa ūsīse?

²²Tsîb ge Sauluba ǃaruǀîǀgui ǀgaisa, tsî Damaskus ǃnâ ǁan hâ Jodeǁîna ge ǀgaruǀgaru Jesub a Xristu ǃkhaisa ǃhoadan tsî.

²³Tsî ǂgui tsēdi ǁnās khaoǃgân ge Jodeǁîna ǀapeǀhao-e ge dī, ǃgam bin nî ti.

²⁴Xawes ge ǂâibasens âna Sauluba ge ǂanǂanhe. Tsîn ge tsēa tsî tsuxuba ǃās di dao-amde gere ǃûi, ǁîban nî ǃgamse.

²⁵On ge ǁkhāǁkhāsabena ǁîba tsuxuba ū, tsî ǀharus ǃnâ ǂnubiǂgoaba-ū ge ǁgôa kai bi.

²⁶Tsî Saulub ge Jerusalems tawa sīo, ob ge ǁkhāǁkhāsabena ǁaeǁaesensa ge hîtsâ, xawen ge hoatsama ǁîba ge ǃao, ǁkhāǁkhāsabeb a ǃkhaisa ǂgom tama i tsî.

²⁷Ob ge Barnababa ǁîba ū tsî apostelgu tawa ge ūsī bi, tsî ǁîga ge ǃhoaba, matib ge daob ai ǃKhūba mû tsî matib ge ǃhoa-ū bi ǃkhaisa, tsî matib ge Damaskus ǃnâ ǁkhoaǂgaose Jesub ǀonsa aoǁnâ ǃkhaisa.

²⁸Ob ge ǁîn ǀkha ǂgâ tsî gere ǂoa Jerusalems tawa, tsî ǂhauǂgarose Jesub ǀons ǃnâ gere ǃhoa.

²⁹Tsîb ge ǁkhāti Jodeǁîn Grikegowaba ra ǃhoan ǀkha ǃhoa tsî ge ǂnoagu, xawen ge ǃgam bin nîsa ge ôa-am.

³⁰Tsî ǃgâsagu ge ǁnâuo, o gu ge Kaesareas ǃoa ǁnū tsî Tarsus ǃoa ge sî bi.

³¹Tsîb ge ǀhaohâba Judeab tsî Galileab tsî Samariab hoaragab ǃnâ ǂkhîba ūhâ tsî ge ǂnubikhâihe; tsîb ge ǃKhūb di ǃaoǃgâs ǃnâ tanisen, tsî ǃAnu Gagab di ǁkhaeǂgaos xa ge ǀoa.

³²Tsî i ge ge ī, Petrub ge mâ ǃkhai-i hoa-e ǃgûǃnâ ǃkhaisa, ob ge ǁkhāti Lidas ǃnâ ǁan hâ ǃanun tawa ge sī.

³³Tsîb ge ǁnāpa ǂanǂansa khoeb Eneab ti ǀon hâb, ǁkhaisa kurigu kōse kharob ai ge ǁgoe ib hîa ǃhom hâba ge hō.

³⁴Ob ge Petruba ǁîb ǃoa ge mî: Eneatse, Jesub Xristub ge ra ǂuruǂuru tsi; khâi î aitsama ǀgâibasen! Ob ge ǁnātimîsi ge khâi.

³⁵Tsîn ge Lidas tsî Sarons ǃnâ ǁan hân hoana ǁîba ge mû; on ge ǃKhūb ǃoa ge ǃhobasen.

³⁶Tsî Jopas ǃnâs ge ǂanǂansa ǁkhāǁkhāsabes, Tabitas ti ǀon hâsa ge hâ i (Dorkas ti ra ǂnûiǃkhunihesa); ǁîs ge ǃgâidīn tsî ǀgâsana huis tsîn xa ge ǀoa hâ i.

³⁷Tsî i ge ǁnā tsēdi ai ge ī, os ge ǀaesen tsî ge ǁō. On ge ǁā si, tsî oms di ǂamoms ǃnâ ge ǁgui si.

³⁸Tsî Lidas Jopas ǀgūse hâ amagan ge ǁkhāǁkhāsabena, ǁnāpab Petruba hâ ǃkhaisan ge ǁnâuo, ǀgam aokha ǁîb ǃoa sî tsî ge ǀkhoma bi, ǁîn tawab nî hāse, ǀhawe tama i tsî.

³⁹Ob ge Petruba khâi tsî ǁîkha ǀkha ge ǃgû; tsî sīb ge, on ge ǂamoms ǃoa ge ūǃapa bi; o di ge ǃoataradi hoade ǁîb tawa mâ, tsî ā rase anaǂamxūn tsî saran, Dorkas ǁîn ǀkhas hâ hîa gere dīna ge ǁgau bi.

⁴⁰Tsî Petrub ge hoana doeǁgaǂuio, ob ge ǃhonǁgoa tsî ǀgore tsî soros ǃoa dawasen tsî ge mî: Tabitase, khâi! Os ge ǁîs mûra ge ǁkhowa-am, tsî Petrubas ge mûo khuisen tsî ge ǂnû.

⁴¹Ob ge ǁîsa ǃomma mā tsî ge ǃkhōkhâi si, tsî ǃanun tsî ǃoataradi tsîna ǂgai, tsîb ge ǁîna ûitsamase ge mâi-aiǃâ si.

⁴²Tsî i ge Jopas hoaragas ǃnâ ge ǂansa, on ge ǂguina ǃKhūb ǃnâ ge ǂgom.

⁴³Tsîb ge Petruba ǂgui tsēde Jopas ǃnâ ge hâ, ǂanǂansa Simonni khōǀnoro-aob tawa.