Read Khoekhoegowab Romeǁîn 1 Bible Online

Romeǁîn 1 - Khoekhoegowab bible

Romeǁîn 1

¹Pauluta, Jesub Xristub ǃgāta, ǂgaihesa apostelta, Elob di ǃgâiǂhôasa ǁhûiǂuibahe hâ ta,

²ǁîb di kēbo-aoga xub ge aiga mîmâisa ǃanu xoadi ǃnâ,

³ǁîb di Ôab xa, ǁgans ǃoa Davib di suriba xu ǃnae hâb,

⁴tsî ǀgaisase Elob Ôab ase ǁgauǂuisen hâba ǃanuǃanusis di Gagaba ǃoa, ǁō hâna xub ge khâio, Jesub Xristub sada ǃKhūb;

⁵ǁîba xu ge ge sige ǀkhommi tsî apostelsis tsîra hōba, ǁnâuǀnamxasib ǂgoms diba ge hoa ǀūben ǃnâ nî ǀkhī kaise ǁîb di ǀons ǂama;

⁶ǁîn ǃnâ du ge ǁkhāti sadu Jesub Xristub di ǂgaihesado;

⁷Romes ǃnâ hâdu hoado, Elob di ǀnamǀnamsa tsî ǂgaihesa ǃanudo: ǀKhomma ab hâǀkhā du, tsî ǂkhîba, Elob sada Îb, tsî ǃKhūb Jesub Xristuba xu!

⁸ǂGurosa ta ge ti Eloba Jesub Xristuba xu ra gangan sadu hoadu ǃaroma, sadu ǂgoms xan ra ǃhūbaib hoab ai ǂhôa ǃkhaisa.

⁹Elob ge a ti ǀhûǀguitimî-ao, ǁîb Ôab di ǃgâiǂhôas ǃnâ ta ti gagas ǀkha ra ǃoababa, mati ta ǀûs ose sadu xa ra ǂâi ǃkhaisa.

¹⁰Tsî mati ta mâ ǁaeb hoab ai ra ǀkhoma ǃkhaisa, īse ta ga ǀnîsi ǃgâiǃgâbahe tide ǃkhaisa, Elob ǂâisa xu ta nî sadu tawa sī ti.

¹¹Kaise ta ra ǁkhore, mû tsî ta nî sado ǀnî gagasi hō-e ause, ǀgaiǀgaiǃnâhe du nîga;

¹²ǁnās ge sadu ǃnâ ta nî ǁkhaeǂgaoǀhaohega, sada ǁaegu hâ ǂgoms, sadu dis tsî tis tsîra xu.

¹³Xawe ta ǂgao tama, ǀūǂamse du nî hâsa, ǃgâsado, ǃnurise ta gere ǂâibasen ǃkhaisa, sadu tawa ta nî sīse (xawe ta go nēsis kōse ǂhanihe hâ i), î ta sadu on ǃnâ ǀnî ǂû-e hō ti, nau ǀūben ǃnâ ta ūhâ khami.

¹⁴Tita ge surude-aota, Grikeǁîn tsî Grikeǁî taman, gā-ain tsî gâren tsîn hoan di ta.

¹⁵ǁNā-amaga ta ge a māsenxa, tita tawa i hâs kōse, ǁkhāti sadu Romes tawa hâdo ǃgâiǂhôasa aoǁnâbasa.

¹⁶ǃGâiǂhôas Xristub dis xa ta tao tama xui-ao; Elob ǀgais kom a ǁîs, ǂgom hân hoana ǃgâiǃōsib ǃoa hâbasao, ǂgurosa Jodeǁîn tsî ǁkhāti Grikeǁîn tsîna.

¹⁷ǂHanu-aisib Elob dib ra ǂgomsa xu ǂgoms ǃoa ǁîs ǃnâ ǂhaiǂhaihe xui-ao; xoamâihe hâ khami: “ǂHanu-ai-i ge ǂgomsa xu nîra ûi,” ti.

¹⁸Elob di ǁaib ge ǀhomma xu ge ǂhaiǂhaihe hoa eloxoresasib tsî ǂhanuoǃnâsib ǁnā khoen, amaba ǂhanuoǃnâsib ǃnâ ra ǃkhōdawan dib ǂama.

¹⁹Elob xan a ǂan ǁkhā xū-en a ǂan xui-ao; Elob kom ǁî-e ǁîna gere ǂhaiǂhaibao.

²⁰ǁÎb di mûǁoasa īsib, ǁnāb ge ǁîb di ǀamo ǀgaib tsî elosib tsîkha ge ǃhūbaib di kurusa xu sîsengu âb tawa ra mûǂanhe amaga; ǀhapiokaisen-i xare-en ūhâ tidese.

²¹Eloban ge ǂan i xui-ao, xawe Elosen ge ǁîba kaikai tsî gangan tama i, tsî ǂâidi ân ǃnân ge ǃguri, tsî ǁnâuǃāoǃnâ ǂgaob ân ge ǃkhae,

²²on ge gā-aisen ra dīsen hîa ge gâre;

²³tsîn ge kāǁoasa Elob di ǂkhaisiba kā ra khoe-i khami ī īsib ǃnâ gere ǀkharaǀkhara, tsî anin dib ǃnâ, tsî hakaǀnūn tsî ǂhanaben tsîn dib ǃnâ.

²⁴ǁNā-amagab ge ǁkhāti Eloba ǁîna ǁîn ǂgaogu di turagu ǃnâ ge māǁnâ ǃanuoǃnâsib ǃoa, ǁîn di soroden nî ǁîn ǃnâ ǃgôa-o kaise;

²⁵ǁîn Elob di amaba ǂhumib ǃnâ gere ǀkharaǀkharan, tsî kurusabe-e kuru-aob ǂamai ǃgôa tsî gere ǃoaban, ǁnāb ǀamosib kōse karehesa a anuba, Amen.

²⁶ǁNā-amagab ge Eloba ǁîna taotaosa tura-aigu ǃnâ ge māǁnâ. O di ge ǁîn di tarade khoeǂūsi dī-ūgusa khoeǂūsib ǃoagu hâs ǃnâ gere ǀkharaǀkhara.

²⁷ǁNās ǁkhās xase gu ge ǁkhāti aoga khoeǂūsi sîsenūs taras disa ǁnāxū, tsî ǁîgu di tura-aib ǃnâ gere ǀaixaǀîgu; o gu ge aorega aoregu ǀkha taotaosana gere dī, o gu ge anu i a khami ǁîga ǁhapus di dīdawa-amsa ǁîgu ǂûgu ǃnâ ge hō.

²⁸Tsî ǁîn ge Eloba ǂanǃgâs ǃnâ ūhâ tama hâ i khamib ge ǁkhāti Eloba ǁîna ǂkhaba ǂâis ǃnâ ge māǁnâ, anu tama hânan nî dīse;

²⁹on ge ǂhanuoǃnâsib hoab ǀkha ge ǀoa: ǀAib, gāxaǃnâsib, xūǃgunuxasib, ǂkhabasib, surixasib, ǃgams, ǃkhamgus, ǀhôagaosib tsî ǁaixasib tsîn ǀkha.

³⁰ǂGāǃnâ-aon, ǀhoe-aon, Elob ǁkhanaon, ǃkhāǃkhā-aon, ǃgurixan, koasenxan, ǂkhabana ra ôaǂuin, ǁgûna ǁnâuǀnam taman,

³¹ǁnâuǃāoǃnân, mîmâikhôa-aon, khoeǂūsi ǀnamoǃnân, ǂkhîbaguoǃnân, tsî ǀkhomoǃnân tsîna.

³²Elob ǂhanuban a ǂan, nēti ī xūna ra dīn a ǁōba anusa, xawen ge ǁîna dīs ǀguisa hî tama, tsîn kom ǁkhāti ǁîna ra dīn ǃnâ ǃgâiǃgâibasen-e ūhâo.