Read Khoekhoegowab Romeǁîn 10 Bible Online

Romeǁîn 10 - Khoekhoegowab bible

Romeǁîn 10

¹ǃGâsado, ti ǂgaob di turab tsî ti ǀgores, Israelǁaesa ta Elob aiǃâ ra dības ge ǁîn di ǃgâiǃōsib ǃoa hâ.

²ǁÎna ta kom ra ǃkhō-ambao, Elob ǂaman ra tau ǃkhaisao, xawen kom ǁnâuǃāb ose ra dīo.

³Elob di ǂhanu-aisiban mûǂan tama, tsî ǁîn di ǂhanu-aisiban nî ǃkhōkhâi ǃkhaisan ra ôa-am amagan ge Elob di ǂhanu-aisib ǃnaga māsen tama hâ.

⁴Xristub ge a ǂhanub di ǀam xui-ao; ǁîb ǃnâ kara ǂgom-i hoa-i, ǁnā-i ge a ǂhanu-ai.

⁵Moseb ǂhanuba xu hâ ǂhanu-aisib xa nēti ra xoa xui-ao: Nē xūna kara dī khoe-i ge ǁîn ǃnâ nîra ûi-e, ti.

⁶Xawe ǂgomsa xu hâ ǂhanu-aisib ge nēti ra mî: Tā sa ǂgaob ǃnâ mî: Tari-e nî ǀhommi ǃoa ǃapa? ǁNās ge Xristuba ūǁgôaxasa.

⁷Tsî: Tari-e nî ǃgammi ǃoa ǁgôa? ǁNās ge Xristuba ǁō hâna xu ūǃapasa.

⁸Xawe matib ra mî? Mîs ge sats ǀgūse hâ, sa ams ǃnâ tsî sa ǂgaob ǃnâ. ǁNās ge ǂgoms di mîs sige ra aoǁnâsa.

⁹Sa ams ǀkhats ga ǃKhūb Jesuba ǁguiǁnâo, tsî sa ǂgaob ǀkhats ga ǂgomo, Elob ge ǁîba ǁō hâna xu ǂkhaiǂkhai ǃkhaisa, ots kom nîra ǃgâiǃō-o.

¹⁰ǂGaob ǀkhats ra ǂhanu-aisib ǃoa ǂgom, tsî ams ǀkhats ra ǃgâiǃōsib ǃoa ǁguiǁnâ xui-ao.

¹¹Xoas ra mî xui-ao: ǁÎb ǃnâ kara ǂgom-i hoa-i ge taotaohe tide-e.

¹²ǀGora-i xare-i Jodeǁîn tsî Grikeǁîn ǁaegu hâ tama xui-ao; ǁkhāb ge hoan di ǃKhū, ǂgaiǀî bi ran hoan ǂamai ǃkhū hâba;

¹³mâ-i hoa-i ǃKhūb ǀonsa ra ǂgaiǀî-i nîra ǃgâiǃō xui-ao.

¹⁴Matin kha ǁnâi nî ǂgaiǀî ǁîb ǃnân ǂgom tamaba? Tsî matin kha nî ǂgom, ǁîb xan ǁnâu tamab ǃnâ? Tsî matin kha nî ǁnâu, aoǁnân rab ose?

¹⁵Tsî mati gu kha nî aoǁnâ, sîhe tama gu ga io? Xoamâihe hâ khami: Matikōse di a ǀnamǀnamsa ǂkhîba ra aoǁnâgu tsî ǃgâiba ra ǂhôagu di ǂaide? ti.

¹⁶Xawen ge hoana ǃgâiǂhôasa ǁnâuǀnam tama hâ. Jesajab ra mî xui-ao: ǃKhūtse, tari-e sige aoǁnâsa ǂgom hâ?

¹⁷Os ge ǂgomsa ǁnâusa xu hâ, tsî ǁnâus ge Xristub mîsa xu hâ.

¹⁸O ta ra mî: ǁNâu taman kha hâ ǁnâu go: ǁÎs di ǀōb kom ǃhūgu hoagu ǃoa ge ǃgûǂoa, tsî ǃhūbaib di ǀamdi kōse di ge ǁîs di mîde ge sīo.

¹⁹O ta ra mî: Israelǁîna ǁnâuǃā taman hâ? ǂGurosab ra Moseba mî: Tita ge sado nî tau kai ǁae tamase ina xu; ǁnâuǃāoǃnâ ǁaesa xu ta nî ǁaiǁai du.

²⁰Tsî Jesajab ra hîtsâ tsî ra mî: Tita ôa taman xa ta ge hōhe, tsî tita dîǃgon tamana ta ge ǂhaisaba.

²¹Tsî Israelǁaes ǃoab ra mî: Tsēs hoasa ta ge ti ǃomkha ge ǀhōǂui ǁnâuǀnamoǃnâ tsî ǃhoaǃoaxa ǁae-i ǃoa.