Read Khoekhoegowab Romeǁîn 11 Bible Online

Romeǁîn 11 - Khoekhoegowab bible

Romeǁîn 11

¹O ta ra dî: ǂHāxub ǁnâi hâ Eloba ǁîb di ǁaesa? Tātsē! Tita on kom Israelǁîo, Abrahammi surib di ta Benjaminni ǃhaos di ta.

²Elob ge ǁîb di ǁaes, aiǂanni gesa ǂhāxu tama hâ. ǂAn tama du kha ǁnâi hâ, tare-es ra xoasa Eliab xa mî ǃkhaisa, matib ra Israelǁaesa Elob tawa ǀanaǃgâ tsî ra mî ǃkhaisa:

³“ǃKhūtse, sa kēbo-aogan go ǃgam, tsî sa altargan go hîǀhuru; tsî ta go tita ǀguri ǃgau, tsîn ra ti ûiba ôa-am?”

⁴Xawe matis ra elosi ǃereamsa mîǀî bi? “Tita ge go ǃgau kaibasen hûǀoadisi aogu, ǁîgu ǁgoade Baali aiǃâ ǃhon tamaga.”

⁵ǁNās ǁkhās khami i ge ǁkhāti ǃgau-e nēsi hâ ǁaeb ǃnâ hâ ǀkhommi di ǃkhōǂuibasens ǃoa.

⁶Tsî ǀkhomma xu i ga īo, o i kom ǃaruǀî sîsenga xu ī tamao; ǁnāti ga ī tama īo, ob ge ǀkhomma ǃaruǀî ǀkhom tide; tsî sîsenga xu i ga īo, o i kom ǃaruǀî ǀkhomma xu ī tamao; ǁnāti ga ī tama io, ob kom sîsenna ǃaruǀî sîsen tamao.

⁷Mati ǁnâi? Israelǁaes ra ôa-i, ǁnā-en ge hō tama hâ; xawe ǃkhōǂuibasenhe hân ge ǁî-e ge hō, xawe naun ge karokarosen hâ;

⁸xoamâihe hâ khami: “Elob ge ǁîna ǃgam ǂoms di gaga-e ge mā; mûdeb ge ǁîna ge mā, mûn tidega, tsî ǂgaede, ǁnâun tidega, nētsēs kōse.”

⁹Tsî Davib ra mî: Ab ǁîn di tāba ǁîna ǁnoa kaiba, îb ǁnā kaiba, îb ǁgonǁgonǂgao kaiba, îb dīdawa-am kaiba;

¹⁰ǁîn di mûde ǂgī kai, în tā mû, î ǁîn di ǁâba hugaǀgui ǁgâiǃgam.

¹¹O ta ra mî: ǃNôan ge xare, ǁnān nîga? Tātsē! Xawe ǁîn di ǁnāsa xub ge ǃgâiǃōsiba ǀūbena ge hāba, tauxasib ǃoan nî ǁîna ǂkhaiǂkhaihega.

¹²Tsî ǁîn di ǁnās ga ǃhūbaib di ǁuio, tsî ǁîn di ǀoro kais ga ǀūben di ǁuio, matikō ǃnā hâses nî ǀoa hâ ǀgaus âna ǁnāti ī?

¹³Sadu ǀūbedo ta ra mîba: ǀŪben di apostel ta amaga ta ti ǃoabasa ra ǂkhaiǂkhai,

¹⁴ise ta ga ǀnîsi ǁnān, ti ǁgans dina tauxasib ǃoa ǂkhaiǂkhai tide, î ta ga ǀnîn âna ǃgâiǃō kai, ti.

¹⁵Tsî ǁîn di aoxūhes ga ǃhūbaib di ǂkhîbagu kaio, tare-es nî ǃkhōǃoas âna ī? ǁŌ hâna xu ra ǀkhī ûib khamis kom nî īo.

¹⁶Tsî ǂgurob ga ǃanuo, ob ge ǀâpereb ona a ǃanu; tsî ǃnomab ga ǃanuo, o gu ge ǂgonagu ona a ǃanu.

¹⁷Tsî ǀnî ǂgonagu ga khôaǁnâheo, tsî sats ǃaub di ǀkherahaits ga ǁîgu ǃkhais ǃnâ ǂgāhe, tsîts ga ǂau ǀkherahaib di ǃnomab tsî tsāba amǃnâxao:

¹⁸Tā ǁnâi ǂgonagu ǃoa-ai koasen. Tsî ǁîgu ǃoa-aits ga koaseno: ǂAn, sats ǃnomaba tani tama, tsî ǃnomab ra satsa tani ǃkhaisa.

¹⁹Ots ge nî mî: ǂGonagu ge khôaǁnâhe, tita nî ǂgāǃnâhese.

²⁰Aio! ǁÎn ge ǂgomoǃnâsib ân ǃaroma ge khôaǁnâhe, tsîts ra satsa ǂgoms ǃnâ mâ; tā ǁnâi ǃguri, î ǃao.

²¹Elob ga ǂūsi ǂgonaga sâu tama io: ǂAnbasen, ǀnîsib kom sats ona sâu tideo.

²²ǁNā-amaga kō Elob di ǃgâisib tsî ǁkhōǁkhōsib tsîkha: ǁKhōǁkhōsiba ǁnā gen tawa, tsî ǃgâisiba sats tawa, ǃgâisib ǃnâts ga hâo; ǁnā tamas ga io, ots ge ǁkhāti nî ǁhāǁnâhe.

²³Tsî ǁkhāti ǁîna, ǂgomoǃnâsib ǃnân ga hâ tama io, on ge nî ǂgāǃnâhe; Elob kom ǁîna ǁkhawa ǂgāǃnâ ǁkhāo.

²⁴Sats ga ǂūsi ǀkherahaib ǃaub diba xu ǁhāǁnâhe, tsîts ga ǂūsib ǃoagu ǃgâi ǀkherahaib ǃnâ ǂgāheo, matikō ǃnāǂamsasen nē ǂūsi ǂgonana ǁîn di ǀkherahaib ǂûb ǃnâ nî ǂgāhe?

²⁵ǂGao tama ta hâ, ǃgâsado, nē ǂganǃgâsiba du nî ǀūǂamse hâsa (ǁî-aitsama du gā-aise ūhâsen tidega): Karokarosens ge ǃkhareǃkharese Israelǁîn ǂama hā ǃkhaisa, ǀūben di ǀoasib nî ǂgâs kōse.

²⁶ǁNāǃnubais ge Israelǁaes hoasa nîra ǃgâiǃō, xoamâihe hâ khami: Sionsa xub ge Ore-aoba hā, tsî nî eloxoresasiga Jakoba xu ǁkhaebē;

²⁷tsî nēs ge ti ǃgaeǀhaos ǁîn ǀkha ta ūhâsa, ǁîn di ǁorena ta nî ūbē ǃnubai, ti.

²⁸On ge a ǃgâiǂhôas di khākhoe sadu ǃaroma; xawe ǃkhōǂuibasens ǃoan ge a ǀnamǀnamsa, ǁgûgu ǃaroma.

²⁹Elob di ǀkhomhōdi tsî ǂgais tsîra a ǃhauǃhausa ǁoa xui-ao.

³⁰Sadu on ge aibe Eloba ǁnâuǀnam tama i, xawe nēsi naun di ǁnâuoǃnâsiba xu ǀkhomxaǂgaosiba a hō khami,

³¹ǁnās ǁkhās khamin ge ǁkhāti ǁîna ǁnâuǀnam tama ge i, sadu ge hō ǀkhomxaǂgaosiba xun nî ǁkhāti ǁîna ǀkhomxaǂgaosi-e hōga.

³²Elob ge ǁîn hoana ǁnâuoǃnâsib ǃnâ ge ǂganam, hoanab nî ǀkhomxaǂgaose.

³³Okha, mati ī ǃgammi ǁuib dib, Elob gā-aisib tsî ǂans tsîra diba! Matikōse di a ôaǃnâhe ǁoasa ǁîb di ǀgoraǃgâde, tsî matikōse gu a hōǂuihe ǁoasa ǁîb di daoga?

³⁴Tari-e kha Elob di ǂâisa ge mûǂan? Tsî tari-e kha ǁîb di ǀapemā-ao ge i?

³⁵Tsî tari-e kha ǁîba xū-e ge aimā, ǁkhawab nî mādawa-ambahega?

³⁶ǁÎba xu, tsî ǁîb ǃnâ, tsî ǁîb ǃoan ge xūn hoana hâ xui-ao. Ab ǁîba ǂkhaisiba ūhâ ǀamosib kōse! Amen.