Read Khoekhoegowab Romeǁîn 12 Bible Online

Romeǁîn 12 - Khoekhoegowab bible

Romeǁîn 12

¹O ta ra ǁnama du, ǃgâsado, Elob di ǀkhomxaǂgaosiga xu du sadu sorode nî mâi ǃkhaisa ûitsama tsî ǃanu tsî Eloba ǃgâiba ǁguibase, ǁîs ge a sadu gā-ai eloǃoaba.

²Î tā nē ǃhūbaib ǀkha ǀguiti dīsen, î du sadu ǂâis di ǀasa kaisis ǃnâ ǀkhara, ǃâitsâ ǁkhā du nîga, mâs a Elob di ǃgâi tsî ǃgâiǃgâibasensa tsî dīǀoaǀoasa ǂâi ǃkhaisa.

³Māhe ta hâ ǀkhomma xu ta mâ-i hoa-i âdo ra mîba, anu i hâsa ǃnā hâse i gā-aise ūhâsen tide ǃkhaisa; î-i ǀgaus ǀkha gā-ai, Elob ge mâ-i hoa-e ǂgoms di ǀguiroba ǂhûiǂui khami.

⁴ǀGui soros ǃnâ da ǂgui uniǁaede ūhâ khami, tsî hoa uniǁaedi ǁkhā sîsenna ūhâ tama khami,

⁵ǁnās ǁkhās khami da ge ǂguida a ǀgui soro, tsî ǀguiǀguibe da ge nē-e, nau-i di uniǁae;

⁶tsî da ge ǃkharaga hōde ūhâ, māhe da hâ ǀkhommi ǃoa.

⁷Khoe-i ga kēbosisa ūhâo, as ǂgoms ǀkha ǀguiti-ī. Khoe-i ga ǃoaba-e ūhâo, a-i ǁî-e dī. Khoe-i ga ǁkhāǁkhā, a-i ǁkhāǁkhā.

⁸Khoe-i ga ǁnama, a-i ǁnama. Khoe-i ga ǂhûiǂui, a-i ǀguiǃnâxasib ǀkha dī. Khoe-i ga gaosîsen, a-i ôasa. Khoe-i ga ǀkhomxaǂgao, a-i ǃgâiaǂgaob ǀkha dī.

⁹Ab ǀnamma hînaoǃnâ. ǂKhababa ǁkhan, î du ǃgâib tawa ǂgāmâisen.

¹⁰ǃGâsa ǀnamgusa as ǂgaob ǀkha ī. ǃGôagus ǀkha aiǃgûbagu re.

¹¹Ôasase nî dīhe xū-i ǃnâ tā ǀopesa re; gagas ǃnâ ǀaexa re; ǃKhūba ǃoaba re.

¹²ǃÂubasens ǃnâ ǃgâiaǂgao re; ǁgâiǀāb ǃnâ sâsase hâ re; hâhâ ǀgores ǃnâ re.

¹³ǃAnuna ǂhâban hâna au re, î du ǃhaokhoena sâu ǂgao re.

¹⁴ǃGôaǃgon du rana ǀkhae re; ǀkhae re, î du tā ǀâxare.

¹⁵ǃGâiaǂgao ran ǀkha ǃgâiaǂgao re; î du ā ran ǀkha ā re.

¹⁶ǀGui ǂâisa ūhâǁaegu re. Tā ǀgapi xūn xa ǂâiǂâisen, î du ǃgamǃgamsensan ǀkha ǁaeǁaesen re. Tā ǁîǃgôasen re.

¹⁷Tā khoe-e ǂkhaba-i ama ǂkhaba-e dīdawa-am re. Îǂhôase sîsen re khoen hoan aiǃâ.

¹⁸Ī ǁkhā i kao, sadu tawa i hâs kōse, hoa khoen ǀkha ǂkhîb ǃnâ ûi re.

¹⁹Tā aitsama ǀkhaobasen, ǀnamsabedo, î ǁaixasiba ǃkhai-e mā re; xoamâihe hâ xuige: ǀKhaob ge a ti, tita ge nî dīdawa-am, tib ra ǃKhūba mî.

²⁰Sa khākhoe-i ga ǃâo, ǁî-e ǂûmā re; ǁgâ-i kao, ǁî-e āsi re. Nēsats ga dīo, ots ge ǀaexa ǂnomde ǁî-i danas ai nî ǀhaoǀhao.

²¹Tā ǂkhabab xa dankaisen, î ǂkhababa ǃgâib ǀkha dan.