Read Khoekhoegowab Romeǁîn 14 Bible Online

Romeǁîn 14 - Khoekhoegowab bible

Romeǁîn 14

¹ǂGoms ǃnâ ǂkhabusa-e ǃkhōǃoa, î ǂâide tā ǀhomaxa kai.

²ǀGui-i ge ra ǂgom, xū-i hoa-e-i a ǂû ǁkhā ǃkhaisa, xawe ǂkhabusa-i ge ǃam xūn ǀguina ra ǂû-e.

³ǂÛ ra-e, a-i ǂû tama-e tā ǃharaxū, tsî ǂû tama-e a-i ǂû ra-e tā ǀgoraǃgâ; Elob ge ǁî-e ǃkhōǃoa xuige.

⁴Taritsa sats, ǃhao ǃgā-e ra ǀgoraǃgâtsa? ǁÎb ge ǁîb di ǃKhūb ǂûba ra mâba tsî ǁnāba; xaweb ge nîra mâiǀgaiǀgaihe, Elob a ǁîba mâiǀgaiǀgai ǁkhā xui-ao.

⁵ǀGui-i ge nē tsēsa nau tsēs ǂamais hâse ra ǃgôa, xawe nau-i ge tsēdi hoade ǀguiti īse ra ǃgôa. A-i mâ-i hoa-e ǁî-i ǂâis ǂûs ǃnâ ǂanǁapo.

⁶Tsēsa ra ǃgôa-i ge ǁîsa ǃKhūba ra dība-e; tsî tsēsa ǃgôa tama-i ge ǁîsa ǁkhāti ǃKhūba dība tama-e. ǂÛ ra-i ge ǃKhūba ra ǂûba-e, Eloba i ra gangan xui-ao; tsî ǂû tama ra i-i ge ǃKhūba ǂûba tama-e, tsî i ge Eloba ra gangan.

⁷ǀGui-i âda xare-i ge ǁî-aitsama ûibasen tama hâ, tsî ǀgui-i âda xare-i ge ǁî-aitsama ǁōbasen tama hâ xui-ao.

⁸Ûi da karao, o da kom ǃKhūba ra ûibao; tsî ǁō da karao, o da kom ǃKhūba ra ǁōbao. O da ge a ǃKhūb di, ûi da kas, ǁō da kas hoasa.

⁹Nēs ǃoab ge Xristuba ǁkhāti ǁō, tsî khâi, tsî ǁkhawa ge ûi, ǁō hân tsî ûitsaman ǂamab nî gaosîsenga.

¹⁰Tsî satsa tarexats ra sa ǃgâsa-e ǀgoraǃgâ? Tsî nautsa, tarexats ra sa ǃgâsa-e ǃharaxū? Hoada kom Xristub di ǂhanuǂhanuǃnaos aiǃâ nîra mâiheo.

¹¹Xoamâihe hâ xui-ao: “Tita ûi hâ, tib ra ǃKhūba mî, amaga i ge mâ ǁgoa-i hoa-e tita nîra ǃhonsenba, tsî mâ nammi hoab ge Eloba nîra ǁguiǁnâ.”

¹²O i ge mâ-i hoa-i âda ǁî-i xa aitsama Eloba nîra ǃereambasen.

¹³ǁNā-amaga a da ǃaruǀî tā ǀgoraǃgâgu; î du ǁîs ǂamai nēsa ǂâibasen, ǀgui-i xare-i ǁî-i ǃgâsa-e ǃnôa-i tsî ǁgonǁgonǂgao-e mâiba tide ǃkhaisa.

¹⁴ǂAn ta a, tsî ta ge ǃKhūb Jesub ǃnâ a ǂanǁapo, xū-i xare-i ǁî-i ǂhani-i ǃnâ ǀurisa tamasa; khoe-i ga ǁî-e ǀurisase ūhâo, ǁnā-e i ge a ǀurisaba.

¹⁵Tsî sa ǃgâsa-i ga ǂû-i ǃaroma ǃoa, ots ǃaruǀî ǀnammi ǃoa tanisen tama. Tā ǁnâi sa ǂû-i ǀkha Xristub ge ǁōba-e hîǀhuru.

¹⁶ǁNā-amaga dī, îb sadu ǃgâiba tā ǃkhāǃkhāhe.

¹⁷Elob gaosib ge ǂûs tsî ās ǃnâ mâ tama xui-ao, xaweb ge ǂhanu-aisib tsî ǂkhîb tsî ǃgâiaǂgaob ǃnâ mâ, ǃAnu Gagab ǃnâ.

¹⁸Nēn ǃnâ ga Xristuba ǃoaba-i, ǁnā-i ge Eloba ǃgâiba-e tsî khoena ǀgapiǃgôasaba-e xui-ao.

¹⁹A da ǁnâi ǂkhîb dina sauruǃgon, tsî ǂnubikhâigus ǃoa hân tsîna.

²⁰Tā ǂûs ǃaroma Elob di sîsenna hîkākā. Hoan ge a ǃanu; xawen ge a tsūba ǁnā-i, ǂâiǃnôa-i ǀkha ra ǂû-e.

²¹ǃGâiba tsi a, ǁgan-i xare-ets ǂû tidesa, tsî ǂauxûi-ets ā tidesa, tsî mâ xū-i hoa-i ǁî-i ǃnâ sa ǃgâsa-i ra ǃnôa-e tsî ǁgonǁgonǂgao-e.

²²ǂGomsats ga satsa ūhâo, sats ǃnâ ǁîsa Elob aiǃâ ūhâbasen. ǃGâiǃō i ge a, ǃgâise i ra ūhâ-i ǃnâ ǀgoraǃgâsen tama-e.

²³Xawe îganǀgē rase kara ǂû-i, ǁnā-i ge ǀgoraǃgâhe hâ ǂgoms ǀkha i ǂû tama amaga. Tsî ǂgomsa xu ǀkhī taman hoan ge a ǁore.