Read Khoekhoegowab Romeǁîn 15 Bible Online

Romeǁîn 15 - Khoekhoegowab bible

Romeǁîn 15

¹Xawe sada ǀgaisada ge a anuba ǀgaisa taman di ǂkhabusasiga tanisa, tsî sada ǃgâiǃgâibasen tidesa.

²A-i mâ-i hoa-i âda ǀgūkhoe-e ǃgâiǃgâiba ǃgâib ǃoa, ǂnubikhâisa ǃoa.

³Xristub on ge ǁîba ǃgâiǃgâibasen tama i, tsî xoamâihe hâ khami ge dī: “Satsa ra ǃkhāǃkhān di ǃkhāǃkhādi ge tita ai ge ǁnā,” timî.

⁴Aiga xoahe hân ge sada ǁkhāǁkhās ǃoa xoahe hâ, sada nî xoas di sâsasib tsî ǁkhaeǂgaos tsîra xu ǃâubasensa ūhâga.

⁵Ab Elob sâsasib tsî ǁkhaeǂgaos tsîra diba mā, î du sadu ǃnâ ǀguiǂâixa Xristub Jesub ǃoa;

⁶î du ǀgui ǂâis tsî ǀgui ams ǀkha Elob tsî sada ǃKhūb Jesub Xristub di ǁGûba ǂkhaiǂkhai.

⁷ǁNā-amaga ǃkhōǃoagu re, Xristub ge ǁkhāti sada Elob di ǂkhaisiba ǃoa ǃkhōǃoa khami.

⁸Tsî ta ra mî, Jesub Xristub ge Elob amab ǃaroma ǃgaos di ǃgā kai ǃkhaisa, ǁgûga ge ǃnaeba mîmâideb nî ǀgaiǀgaiga,

⁹xawe ǀūben ge Eloba ǂkhaiǂkhai ǃkhaisa, ǀkhomxaǂgaosib âb ǂama, xoamâihe hâ khami: “ǁNā-amaga ta ge nî satsa ǀūben ǃnâ kare, tsî nî sa ǀonsa ǁnaeba,” ti.

¹⁰Tsî ǁkhawab ra mî: “ǃGâiaǂgao, ǀūbeǁaedo, ǁîb di ǁaes ǀkha.”

¹¹Tsî ǁkhawa: “Kare ǃKhūba, ǀūbeǁaeso hoaso, î so ǁîba koa, ǁaeso hoaso.”

¹²Tsî ǁkhawab ra Jesajaba mî: “Isaib ǃnomab ge nî hâ tsîb ge khâi tsî ǀūben ǂama nî gao; ǁîban ge ǀūbena nîra ǃâu.”

¹³Tsî Elob ǃâubasens diba ab sado ǀoaǀoa ǃgâiaǂgaob tsî ǂkhîb hoab ǀkha ǂgoms ǃnâ, ǃâubasens ǃnâ du nî ǃAnu Gagab di ǀgaiba xu ǃnāǂamga.

¹⁴Tsî ta ge sadu xa ǂanǁapo hâ, ti ǃgâsado, sadu aitsama ǃgâisib xa ǀoa hâ ǃkhaisa, ǂans hoas ǀkha ǀoaǀoahe hâse, tsî ǁnamagu du nîsa ǁkhā hâse.

¹⁵O ta ge ǃnā hâ ǁkhoaǂgaosib ǀkha go xoaba du, ǃgâsado, ǂâiǂâi du ta nîga, ǁnā ǀkhommi, Elob xa ta māhe hâb xa,

¹⁶Xristub Jesub di ǃgā ta nîse ǀūben ǃnâ, ǃgâiǂhôas Elob disa ta nî ǃoabaga, ǀūben nî ǃgâi ǁguiba kaise, ǃAnu Gagab ǃnâ khaihe hâǃâ.

¹⁷ǁNā-amaga ta Elob din xa a koasen ǁkhā Xristub Jesub ǃnâ.

¹⁸Xū-i-i xare-e ta ge a mî ǁoa, Xristub ga ǁî-e tita ǃnâ sîsen tama io, mîs tsî dīb tsîra ǀkhan nî ǀūbena ǁnâuǀnamxasib ǃoa ūhāhega;

¹⁹saodi tsî buruxan tsîn di ǀgaib ǀkha, tsî Elob Gagab di ǀgaib ǀkha; î ta Jerusalems tsî xōǀkhāb hoaba, Ilirikums kōse ǃgâiǂhôas Xristub dis ǀkha ǀoaǀoa.

²⁰ǀŌ-aise ra ôa-amǃâ, Xristub di ǀons ganupe ǂgaihe tama ǃkhai-i ai ta nî ǃgâiǂhôasa aoǁnâsa, ǃhao ǃgaoǃgaos ai ta om tidese;

²¹î ta ga dī, xoahe hâ khami: “ǁNān, ǁîb xa ǂhôahe taman ge nîra mû; tsî ǁnâu taman ge nîra ǁnâuǃā,” ti.

²²Nēs ǃaroma ta ge ǁkhāti ǂgui ǃnāde ǂhanihe hâ i, sadu tawa sīsa.

²³Xawe nēsisa i ge nē ǃhūgu ǃnâ ǃaruǀî ǃkhai-e hâba te tama hâ amaga ta ge sadu tawa sīsa ǁkhore hâ ǂgui kuriga xu.

²⁴O ta ge, Spanjeb ǃoa ta ga ǃgûo, sadu tawa nî sī. ǃÂubasen ta ra xui-ao, ǃgûǃganus âtas ǃnâ ta nî sado mû ǃkhaisa, tsî ǂkharirose ta nî aibe sadu tawa ǁâǁâhes khaoǃgâ sadu xa ǁnāǀî ǁnūhe ǃkhaisa.

²⁵Tsî nēsi ta Jerusalems ǃoa ra ǃgû, ǃanuna ta nî ǃoabase.

²⁶Masedoniab tsî Axajab tsîkha din ge ge ǃgâiǂâibasen xui-ao, Jerusalems ǃnâ hâ ǃanun di ǀgâsanan nî xū-e ǀhaoǀhaobase.

²⁷Nētin ge ge ǃgâiǂâi, tsî amasen ge a ǁîn di surude-ao. ǁÎn di gagasi xūnan ga ǀūbena amǃnâxao, on ge ǁkhāti surude hâ, sorosi xūn ǀkhan nî ǁîna ǃoaba ǃkhaisa xui-ao.

²⁸Tsî nēsa ta ga dītoa, tsî ta ga ǁîna nē ǂûtanisa ǃomǁae māǁnâo, o ta ge sado-ū Spanjeb ǃoa nî dāǁnâ.

²⁹Tsî ta ge a ǂan, sadu tawa ta ga sīo, o ta ge ǀoasa ǀkhaeb Xristub ǃgâiǂhôas dib ǀkha nîra sī.

³⁰O ta ra ǁnama du, ǃgâsado, sada ǃKhūb Jesub Xristuba xu, tsî Gagab di ǀnamma xu, ǃgauguhui te du nîsa Elob aiǃâ du ra dība te ǀgoredi ǃnâ:

³¹Judeab ǃnâ hâ ǁnâuoǃnâna xu ta nî xorehega, tsîs nî Jerusalems ǃoa ta ra dī ǃoabas âtsa ǃanuna ǃgâiǃgâibaga;

³²î ta ǃgâiaǂgaob ǀkha sadu tawa sī, Elob di ǂâisa xu, î ta sadu ǀkha khoakhoasen.

³³Ab Elob ǂkhîb diba sadu hoadu ǀkha hâ! Amen.