Read Khoekhoegowab Romeǁîn 2 Bible Online

Romeǁîn 2 - Khoekhoegowab bible

Romeǁîn 2

¹ǁNā-amagats a ǀhapiokaisen ǁoa, ti khoetse, tarits ka xawe, nau-e ra ǀgoraǃgâts hoatsa. Nau-ets ra ǀgoraǃgâ-ū xū-i ǃnâts kom sa-aitsama ra ǀgoraǃgâseno; ǁkhā-ets ra sats ǀgoraǃgâ ratsa dī xui-ao.

²Tsî da ge a ǂan, Elob di ǀgoraǃgâs ǂhanuse nēna ra dīn hoan ǂama ra hā ǃkhaisa.

³Tsî ǂâits ra nēsa, ti khoetse, nēna ra dīna ra ǀgoraǃgâts, xawe ǁkhā-e ra dītsa, Elob di ǀgoraǃgâsats nî satsa ǁhâxū ǃkhaisa?

⁴ǁNâi ǃharaxūts ra ǁîb ǃgâixaǃnâsib tsî sâsasib tsî ǃnūǃnâxasib di ǃkhūsiba? ǂAn tamats kha hâ, Elob ǃgâisib ra ǃhobasens ǃoa ǂgaeǂgui tsi ǃkhaisa?

⁵Sa karokarosens tsî sa ǃhobasen ǂgao tama ǂgaob ǀkhats ge ǁaiba ǁuib axase ra ǀhaoǀhaobasen, ǁaib tsî Elob di ǂhanu-ai ǀgoraǃgâs ǁîb ai nîra ǂhaiǂhaihe tsēs ǃoa,

⁶mâ-i hoa-e ǁî-i di sîsenni ǃoa nîra mādawa-amma:

⁷ǁNān, sâsasib ǀkha ǃgâi dīgu ǃnâ ǂkhaisib tsî ǃgôasib tsî kāǁoasib tsîna ra ôa-amn ge ǀamo ûiba nîra mādawa-amhe;

⁸xawe ǁnān, ǂnoagu ǂgaoxan, tsî amaba ǁnâuǀnam taman, tsî ǂhanuoǃnâsiba ra ǁnâuǀnamn ge ǁaib tsî ǁaixasib tsîkha nîra mādawa-amhe.

⁹ǂŌǂōsib tsî ǁgâiǀāb tsîkha ge ǂkhababa ra dī khoe-i di ǀoms hoas ǂama nîra hā, ǂguro Jodeǁî-i tsî ǁkhāti Grikeǁî-i ǂama;

¹⁰tsî ǂkhaisib tsî ǃgôasib tsî ǂkhîb tsîn ge ǃgâi-e ra dī-i hoa-i ǂama nîra hā, ǂgurosa Jodeǁî-i, tsî ǁkhāti Grikeǁî-i ǂama.

¹¹Elob tawa i ge aisǃkhōǃoasi-e hâ tama hâ amaga.

¹²ǂHanu-i ose gere ǁoren hoan ge ǁkhāti ǂhanu-i ose nîra kāǁō; tsî ǂhanub ǃnâ gere ǁoren hoan ge ǂhanuba xu nîra ǀgoraǃgâhe.

¹³Elob aiǃân ge ǂhanuba ra ǁnâuna ǂhanu-ai tama hâ, xawe ǂhanuba ra dīn nîra ǂhanu-ai kaihe xui-ao.

¹⁴ǀŪben, ǂhanu-e ūhâ taman ga khoeǂūsiba xu ǂhanub dina dīo, on ge ǂhanu-e ūhâ tamana ǁî-aitsama a ǂhanu.

¹⁵(ǁGauǂuin ra xui-ao, ǂhanub di sîsenni ǁîn di ǂgaogu ǃnâ xoaǂgāhe hâsa, ǁîn di ǂâis ra ǁîna ǃkhō-am, tsî ǁîn di ǂâiǂâisendi ra ǀanaǃgâgu tsî ǀhapiokaisen amaga.)

¹⁶ǁNā tsēs, ǁîs aib Eloba khoen di ǂganǃgâsina Xristub Jesuba xu nîra ǀgoraǃgâsa, ti ǃgâiǂhôasa ǃoa.

¹⁷Mû Jodeǁî tits ra satsa ǂgaihe, tsîts ra ǂhanub ai ǂgomǃgâsen, tsîts ra Elob xa koasen,

¹⁸tsîts a ǂan ǁîn di ǂâisa; tsî ǂhanuba xuts ǁgauhe hâ amagats a ǀgora ǁkhā, mâ-i a ǃgâi tsî mâ-i a tsū ǃkhaisa;

¹⁹tsîts ra ǁî-aitsama ūhâsen ǂgī hân di ǂgaeǂgui-aose tsî ǃkhaenab ǃnâ hân di ǃnâse,

²⁰ǁnâuǃāoǃnân di ǂgōǀau-aose, ǀūkhoen di ǁkhāǁkhā-aose, ǂhanub ǃnâ hâ ǂans tsî amab tsîra di īsiba ūhâǃâ.

²¹Tsî nau-ets ra ǁkhāǁkhā hîats sa-aitsama ǁkhāǁkhāsen tama: ǃNarits ge tide, tits ra aoǁnâ hîats ra ǃnari.

²²ǃGamebats ge khôa tide, tits ra mî hîats ra ǃgameba khôa. ǁGôatsuiǁgoagats ra ǃharaxū hîats ge ǃanusiba xu xūna ra ǃnari.

²³ǂHanub xats ra koasen hîats ra ǂhanuba ǃûǂams ǀkha Eloba sora.

²⁴Sadu ǃaromas kom Elob ǀonsa ǀūben ǃnâ ra ǃkhāǃkhāheo, xoamâihe hâ khami.

²⁵ǃGaos ge amase a harebe, ǂhanubats ga dīo; xawe ǂhanubats ga ǃûǂamo, ots ge ǃgaohe tamats axase hâ, ǃgaohets hâ xawe.

²⁶Tsî ǃgaohe tamab ga ǂhanub di ǂhanu-aisiga dīo, ǁîb di ǃgaohe tama isa kha ǃgao-i axase ǃgôahes tide?

²⁷Ā, aikhōba ǃgaohe tamab ge, ǂhanubab ga dīo, satsa nî ǀgoraǃgâ, ǂkhanimûs tsî ǃgaos tsîrats ūhâ hîa ǂhanuba ra ǃûǂamtsa.

²⁸ǃAugasi īsib ǃnâ Jodeǁî khami ī-i kom Jodeǁî tamao, tsî ǃaugasi ǁgans tawa ra ǂhai ǃgaos kom ǃgao tamao;

²⁹xawe ǃnāb ǃnâ ǂganǃgâse hâ Jodeǁîb ge a Jodeǁî, tsî ǂgaob di ǃgaos ge a ǃgao, Gagab ǃnâ ra īs tsî ǂkhanimûs ǃnâ mâ tamasa; ǁnāti ī-i di koasens ge khoena xu hâ tama, tsî ge Eloba xu hâ.