Read Khoekhoegowab Romeǁîn 3 Bible Online

Romeǁîn 3 - Khoekhoegowab bible

Romeǁîn 3

¹Mâ aiǂhanu-e i kha ǁnâi Jodeǁî-e ūhâ. Tsî mâsa kha harebes ǃgaos disa?

²ǂGuina mâ dommi hoab ai. ǂGuros ge nēs, Elob mîdi ǁîna ǂgomǃgâbahe hâ ǃkhaisa.

³Mati ǁnâi? ǀNîn ga ǂgom tama io: ǁÎn di ǂgomoǃnâsiba kha Elob di îǂhôasiba ǁauǁaub nî?

⁴Tātsē! Xawe nēti ī: Elob a ama-ai, khoen hoan a ǂhumi-ao, xoamâihe hâ khami: “Îts ga satsa ǂhanu-ai sa mîdi ǃnâ, îts ga dan, ǀgoraǃgâhets kao,” ti.

⁵Tsî sada ǂhanuoǃnâsib ga Elob di ǂhanu-aisiba ǀgaiǀgaio, tare-e da kha nî mî? ǂHanuoǃnâb kha a Eloba, ǁaibab ga sada ǂama hā kaio? (Khoen ra mî khami ta ra ǃhoa.)

⁶Tātsē! ǁNāti i ga īo, matib kha ga Eloba ǃhūbaiba ǀgoraǃgâ ǁkhā?

⁷Tsî Elob di amab ga ti ǂhumiba xu ǃnā hâo ǁîb di ǂkhaisiba ǃoa: Tare xū-i ǃaroma ta kha ganupe ǁore-aose nîra ǀgoraǃgâhe?

⁸Tsî ǁnāti da kha ga dī tide, ǃkhāǃkhāhe da ra khami, tsî ǀnîn ra mî khami, sada ra mî ǃkhaisa: “A da ǂkhababa dī, îb ǃgâiba ǁîba xu ǀkhī.” ǁÎn di ǀgoraǃgâs ge a ǂhanu.

⁹Mati ǁnâi? Aiǂhanu-e ū da hâ? Hî-î, ǀgui-i xare-e tama. Aiga ge kom go ǁgauo, Jodeǁîn tsî Grikeǁîn tsîn hoan ǁoreb ǃnâ hâ ǃkhaisao.

¹⁰Xoamâihe hâ khami: ǂHanu-ai-i xare-i ge hâ tama hâ, ǀgui-i xawe-i hâ tama;

¹¹ǁnâuǃāxa-i xare-i ge hâ tama hâ; Eloba ra ôa-i xare-i ge hâ tama hâ.

¹²Hoatsaman ge ge ǁnāǁgôa, ǀhûpen ge ge ǁkhoa tama kai; ǃgaidī ra-i hoa-i ge a ǀkhai, ǀgui-i xawe-i hâ tama.

¹³ǁÎn di dommi ge a ǁkhowa-amsa ǀhoba, ǁîn di namdi ǀkhan ra gāxaǃnâsise ǃhoa, ǀaob ǃgā-i ge ǁîn di amǁgaugu ǃnâ hâ;

¹⁴ǁîn di ams ge ǀâxareb tsî au-ausens tsîra xa ǀoa hâ.

¹⁵ǁÎn di ǂaidi ge a ǃhae ǀaoǂnâxusa;

¹⁶hîkākās tsî tsûaǂgaob tsîra ge ǁîn di daogu ai hâ;

¹⁷tsî ǂkhîb di daoban ge ǂan tama hâ;

¹⁸eloǃaoǃgâsi-i xare-i ge ǁîn mûǁae hâ tama hâ, ti.

¹⁹O da ge a ǂan, ǂhanub ra mî-eb ra ǂhanub ǃnâ hâna mîba ǃkhaisa; îs mâ ams hoasa ǂganamhe, îb ǃhūbaib hoaba Elob aiǃâ ǁkharahesa anu ti.

²⁰ǁNā-amaga i ge ǂhanub di sîsenga xu ǁgan-i xare-e ǂhanu-ai kaihe tide; ǂhanuba xus ǁoreb di mûǂansa ra ǀkhī xui-ao.

²¹Ob ge nēsi Elob di ǂhanu-aisiba ǂhanub ose ge ǂhaiǂhaihe, ǂhanub tsî kēbo-aogu tsîn xa ǃkhō-amhe hâb,

²²ǁnā ǂhanu-aisib Elob dib, Jesub Xristub ǃnâ ǂgomsa xu ǂgom hân hoan ǃoa tsî ǂgom hân hoan ǂama ra hāba.

²³ǀGora-i hâ tama xui-ao: Hoan ge a ǁore-ao, tsîn ge Elob ǂkhaisiba tôasi hâ;

²⁴tsîn ge xū-i ama tama ǀkhomma xu ra ǂhanu-ai kaihe, Xristub Jesub ǃnâ hâ oresa xu;

²⁵ǁîbab ge Eloba ǀkhomtronse ge mâi-aiǃâ, ǁîb ǀaob ǃnâ ǂgomsa xu, ǁîb ǂhanu-aisib di ǁgauǂuis ase, aiga Elob di taniǀnamxasib ǃnâ gere ī ǁoren di ǀûbas ǃaroma;

²⁶ǁîb ǂhanu-aisib di ǁgauǂuis ǃoa nē hâ ǁaeb ǃnâ, îb ǁîba ǂhanu-ai, îb ǂhanu-ai kai Jesub ǂgomsa xu hâ-e.

²⁷Mapas ǁnâi koasensa hâ? Dīǂuihe hâ. Mâ ǂhanuba xu? Sîsengu diba xu? Hî-i, xawe ǂgoms di ǂhanuba xu.

²⁸O da ra ǂgom khoe-i ǂgomsa xu ra ǂhanu-ai kaihe ǃkhaisa ǂhanub di sîsengu ose.

²⁹Eloba kha Jodeǁîn ǀguin dib a? ǁKhāti ǁnâi ǀūben di tamaba? Ā, ǁkhātib kha ǀūben tsîn di Eloba tama.

³⁰Elob a ǀgui Elo xui-ao, ǃgaohe hâna ǂgoms ǃnâ ra ǂhanu-ai kaib, tsî ǃgaohe tama hâna ǂgomsa xu ra ǂhanu-ai kaiba.

³¹ǂGoms ǀkha da kha ǁnâi ǂhanuba ra ǁaudī? Tātsē, xawe da ǂhanuba ra ǀgaiǀgai.