Read Khoekhoegowab Romeǁîn 4 Bible Online

Romeǁîn 4 - Khoekhoegowab bible

Romeǁîn 4

¹Tare-e da ǁnâi nî mî Abrahammi, ǁgans ǃoa sada îb xa? Mâ xū-eb ge hō?

²Nēti da ra mî: Abrahammi ga sîsenga xu ǂhanu-ai kaiheo, ob ge koasen-e ūhâ, xawe Elob tawa tama.

³Tare-es ra xoasa mî? Abrahammi ge Eloba ge ǂgom, tsî ǁîs ge ǁîba ǂhanu-aisise ge ǃgôabahe.

⁴Sîsen ra-i ge amǃnâsa ǀkhommi ǃoa ǃgôabahe tama hâ, xawe ǃoaǂuibasens ǃoa.

⁵Tsî sîsen tama-i tsî eloxoresana ra ǂhanu-ai kaib ǃnâ ra ǂgom-i ge ǁî-i ǂgomsa ǂhanu-aisise ra ǃgôabahe-e.

⁶Davib on ra ǁnā khoe-e ǃgâiǃōse kare khami, Elob ra ǁî-e ǂhanu-aisiba sîsengu ose ǃgôaba-e:

⁷ǃGâiǃōn ge hâ ǂhanuoǃnâsigu âna ǀûbahe hân tsî ǁoren âna ǃgū-aihe hâna;

⁸ǃgâiǃōb ge hâ ǁnā khoeb, ǃKhūb ǁore-i xare-e ǃgôaba tama hâba, ti.

⁹Nē ǃgâiǃōse karesa kha ǃgaohe hân ǀguina hâba tsî ǃgaohe tamana hâba tama hâ? Mî da kom rao, Abrahammi ge ǂgomsa ǂhanu-aisise ǃgôabahe hâ ǃkhaisao.

¹⁰Matib ǁnâi ǃgôabahe hâ? ǃGaos ǃnâb hâ hîasa? Aikhōb ǃnâb hâ hîasa? ǃGaos ǃnâb hâ hîa tamas, xawe aikhōb ǃnâb hâ hîas komo.

¹¹Tsîb ge ǃgaos di saosa ǂgoms di ǂhanu-aisib, aikhōb ǃnâb hâ hîab ge ūhâ ib di ǀgaiǀgais ase ge hō, aikhōb ǃnâ ra ǂgomn hoan di ǁgû kaib nîga, în ǁîn tsîna ǂhanu-aisiba ǃgôabahe ti;

¹²tsîb nî ǁkhāti ǃgaos di ǁgû kaiga, ǁnān ǃgaosa xu hân ǀguin di tamab, xawe ǁkhāti sada îb Abrahammi di ǂgoms, aikhōb ǃnâb ge ūhâ is di daogu ǃnâ ra ǃgûn diba.

¹³ǂHanuba xu tamas ge ǁnā mîmâisa Abrahammi tsî ǁîb suriba ge hāba, ǃhūbaib di ǀumi-ao kaib nîsa ti mîsa; xawe ǂgoms di ǂhanu-aisiba xus kom ge io.

¹⁴ǂHanub din ga ǀumi-ao kaio, os ga ǂgomsa a ǁau, os ga mîmâisa hîkākāhe hâ,

¹⁵ǂhanub ra ǁî-e sîsen amaga; ǂhanu-i hâ tamapa, ǁnāpa i ǁkhāti ǃûǂam-e hâ tama.

¹⁶ǁNā-amagan ge ǂgomsa xu hâna a ǀumi-ao, ǀkhommi ǃoas nî hâse, tsîs nî mîmâisa surib hoaba ǁaposase hâbaga, ǂhanub di-i ǀgui tama i tsî ǁkhāti Abrahammi ǂgoms di-i, ǁîb a sada hoada di ǁgû.

¹⁷(Xoamâihe hâ khami: Tita ge satsa ǂgui ǁaedi ǁgûse ge mâi) ǁnā Elob, ǁîb ǃnâb gere ǂgommi aiǃâ, ǁō hâna ra ûi-ûib, tsî hâ tamana hân a khami ra ǂgaiba.

¹⁸Tsîb ge Abrahamma ǃâus ǃoagu ǃâus ai gere ǂgom, ǂgui ǁaedi di ǁgû kaib nîsa, mîbaheb ge khami: “Nētib ge sa suriba nîra ī.”

¹⁹Tsî ǂgoms ǃnâ ǂkhabu tama tsîb ge ǁîb di soros ǂûs, ǀnai ǁō hâ ge isa kōǀî tama (ǀguikaidisi nî ī kurixab ge i xui-ao), tsîb ge ǁkhāti Saras di ǁō hâ ǃnāba kōǀî tama;

²⁰tsîb ge ǂgomoǃnâsiba xu Elob di mîmâidi ǃnâ îganǀgē tama, xaweb ge ǂgoms ǃnâ ǀgai, tsî Eloba ǃgôaba ge mā;

²¹tsîb ge ǁaposase ge ǂan, mîmâib ge xū-eb ǁkhāti a dī ǁkhā ǃkhaisa.

²²ǁNā-amagab ge ǁkhāti ǁîsa ǂhanu-aisise ǃgôabahe hâ.

²³Tsîs ge ǁîb ǀguib ǃaroma xoahe tama hâ, ǁîsab ǃgôabahe hâ ǃkhaisa,

²⁴xawe ǁkhāti sada ǃaroma, ǁîsa nî ǃgôabaheda, ǁNāb, sada ǃKhūb Jesuba ǁō hâna xu ge ǂkhaiǂkhaib ǃnâ da ga ǂgomo;

²⁵ǁîb ge sada ǁoren ǃaroma ge māǁnâhe, tsîb ge sada ǂhanu-aisib ǃaroma ge ǂkhaiǂkhaihe.