Read Khoekhoegowab Romeǁîn 5 Bible Online

Romeǁîn 5 - Khoekhoegowab bible

Romeǁîn 5

¹O da ge ǂgomsa xu ǂhanu-ai kaihe hâǃâ Elob ǀkha ǂkhîba ūhâ, sada ǃKhūb Jesub Xristuba xu.

²ǁÎba xu da ge ǁkhāti ǃgûsīǁkhāsiba hō hâ ǁnā ǀkhommi, ǁîb ǃnâ da mâba ǃoa; tsî da ge Elob ǂkhaisib di ǃâubasens xa ra koasen.

³Tsî ǁîs ǀguisa tama; xawe da ge ǁkhāti ǁgâiǀāgu xa ra koasen; ǂan da a xui-ao, ǁgâiǀāb ra taniǀnamxasiba ūǀkhī ǃkhaisa;

⁴tsî sâsasib ra mâǁaposasiba ūǀkhī, tsî mâǁaposasib ra ǃâubasensa ūǀkhī ǃkhaisa.

⁵Tsî ǃâubasens ge tao kai tamasa, ǀnammi Elob dib ge sada ǂgaogu ǃnâ ǁhōǂuihe hâ amaga, ǃAnu Gagab, sada māhe hâba xu.

⁶Xristub kom ganupe da a ǀgaioǃnâ hîa mîmâisa ǁaeb ai sada eloxoresada ge ǁōbao.

⁷O i kom ǁaupexa ī tamao, khoe-i nî ǂhanu-ai-e ǁōbasa; ǃgâi-e ǁōbasa i ge khoe-e ǀnîsi nî dītsâ.

⁸Ob ge Eloba ǁîb di ǀnamma sada ǃoa ra ǀgaiǀgai, sada ganupe a ǁore-ao hîab ge Xristuba sada ǁōba ǃkhais ǀkha.

⁹O da kom ǁnās ǃgâ-ai nēsi, ǁîb di ǀaob ǃnâ da ge ǂhanu-ai kaihes khaoǃgâ, ǁîba xu nîra orehe ǁaiba xu.

¹⁰Khākhoeda a hîa da ga ǁîb Ôab di ǀaoba xu ǂkhîbaguheo, matikō ǃnā hâse da kha ǂkhîbaguhe hâǃâ ǁîb di ûib ǃnâ nîra sâuhe.

¹¹Tsî nēs ǀguisa tama; xawe da ge ǁkhāti Elob xa ra koasen, sada ǃKhūb Jesub Xristub, ǁîb ǃnâ da nēsi ǂkhîbagusa hō hâba xu.

¹²ǁNā-amaga, ǀgui khoeba xub ge ǁoreba ǃhūbaib ai hā khami, tsî ǁoreba xu ǁōba, tsîb ge ǁōba ǁnāti hoa khoena ge ǃgûǃnâǃganu, hoan gere ǁore amaga,

¹³ǁoreb ge ǃhūbaib ai ge hâ i ǁkhāti ǂhanub aiǃâ; xaweb kom ǁoreba ǃgôabahe tamao, ǂhanu-i ga hâ tama io.

¹⁴Ob ge ǁōba Adamma xu Moseb kōse gere gaosîsen, ǁnān tsîn ǂama, ǁkhā ǃûǂams ǀkha ǁore taman Adammi khami; ǁîb ge hā nîb di ai-ī ge i.

¹⁵Xawe dīsās i khamis ge ǀkhommi hōsa ī tama hâ. ǁNā ǀguib di dīsāsa xun ga ǂguina ǁō-o, o ra ge ǁnātikō ǃnā hâse ǀkhommi tsî ǀkhommi hōs tsîra ǁnā ǀgui khoeb Jesub Xristub di ǀkhommi ǃnâ ǂguin ǂama ge hā.

¹⁶Tsî hōs ge ǁnā ǀguib di ǁoreba xu ge hā ǀhapis khami ī tama hâ. ǀGui dīsāsa xus ge ǀgoraǃgâsa ǀâxarexūhes ǃoa ge hā; xawe ǀkhommi hōs ge ǂgui dīsāde xu ra hui ǂhanu-aisib ǃoa.

¹⁷Tsî ǀguib di dīsās ǃaromab ga ǁōba nē ǀguiba xu gaosîseno, matikō ǃnā hâsen kha ǁnān ǀkhommi di ǀoasib tsî ǂhanu-aisib di hōs tsîra ra ǃkhōǃoana ûib ǃnâ nî gaosîsen, ǁnā ǀguib Jesub Xristuba xu.

¹⁸Tsî ǀgui dīsāsa xub ge ǀâxarexūsiba hoa khoen ǂama hā khami, ǁnās ǁkhās xaseb ge ûib di ǂhanu-ai kaisiba ǀgui ǂhanu-aisiba xu hoa khoen ǂama ge hā.

¹⁹ǁNā ǀgui khoeb di ǁnâuǁoasiba xun ge ǂguina ǁore-ao kaihe khami, ǁnās ǁkhās xasen ge ǂguina nē ǀguib di ǁnâuǀnamxasiba xu ra ǂhanu-ai kaihe.

²⁰Tsî ǂhanub ge ǁîn ǁaegu ge hāǂgâ, dīsās nî ǃnāse. Tsî ǁoreb ǃnā hâpa, ǁnāpab ge ǀkhomma kaise ǁîba ǃnā hâ;

²¹ǁoreb ge ǁōb ǃnâ gaosîsens ǁkhās khamib nî ǁkhāti ǀkhomma gaosîsen ga ǂhanu-aisiba xu ǀamo ûib ǃoa, Jesub Xristub sada ǃKhūba xu.