Read Khoekhoegowab Romeǁîn 6 Bible Online

Romeǁîn 6 - Khoekhoegowab bible

Romeǁîn 6

¹Tare-e da kha ǁnâi nî mî? Hâhâ da nî ǁoreb ǃnâ, ǀkhommi nî ǃnāse?

²Tātsē! Mati da kha sada, ǁoreba ge ǁōǁnâ da ǁîb ǃnâ nî ûi?

³ǂAn tama du ǁnâi hâ, Xristub Jesub ǃnâ ǁāǁnâhe hâda hoada ǁîb di ǁōb ǃnâ ǁāǁnâhe hâ ǃkhaisa?

⁴O da ǁnâi ǁîb ǀkha ǁkhōhe hâ ǁāǁnâs ǀkha ǁōb ǃnâ: Xristub ge ǁō hâna xu ǂkhaiǂkhaihe khami ǁGûb di ǂkhaisiba xu, ǁnāti da nî ǁkhāti ǀasasib ûib dib ǃnâ ûiga.

⁵(ǁÎb ǁōb di ǀguiti-īsib ǃnâ da ga ǁîb ǀkha ǀgui ǂgā kaio, o da kom khâis ǃnâ ǁnās ǁkhās xase nîra io;)

⁶ǂan da komo, sada ǀoro khoeb ǁîb ǀkha ǃgâuhe hâ ǃkhaisa, ǁoreb di soros nî hîkākāhese, aiǃâb ǃoa da ǁoreba ǃoaba tidega.

⁷ǁŌ ge-i ge ǁoreba xu ǂhanu-ai kaihe hâ-e xui-ao.

⁸Tsî Xristub ǀkha da ga ǁō-o, o da ra ǂgom, ǁîb ǀkha da nî ǁkhāti ûi ǃkhaisa;

⁹tsî da a ǂan, Xristub ǁō hâna xub ge khâis khaoǃgâ ǃaruǀî ǁō tide ǃkhaisa; ǁōb ge ǃaruǀî ǁîb ǂama a gao ǁoa.

¹⁰ǁŌb geo, ob ge ǀgui ǃnās ǀguis ai ǁoreba ge ǁōba, tsî ûib geo, ob ge Eloba ge ûiba.

¹¹ǁNās ǁkhās xase ǁkhāti sado ǁoreba ǁōba hâdu axase ūhâsen, î du Eloba ra ûiba du axase ūhâsen Jesub Xristub sada ǃKhūb ǃnâ.

¹²Tā ǁnâi ǁoreba sadu ǁōsa soros ǃnâ gao kai, î du ǁîba turagu âb ǃnâ tā ǁnâuǀnam.

¹³Î du ǁkhāti uniǁaedi âdo ǂhanuoǃnâsib di sîsenūdan axase ǁoreba tā mâiba; î du ǁî-aitsama ǁō hâna xu ge ûi kaihe du axase Eloba mâisenba, î du uniǁaedi âdo Eloba ǂhanu-aisib di sîsenūdan axase mâiba.

¹⁴ǁOreb kom sadu ǂama gao ǁkhā tideo; ǂhanub ǃnâ hâ tama tsî du ǀkhommi ǃnâ hâ amaga.

¹⁵Mati ǁnâi? ǁOre da nî xare, ǂhanub ǃnâ hâ tama i tsî da ǀkhommi ǃnâ hâ amaga? Tātsē!

¹⁶ǂAn tama du kha hâ, ǁî-aitsama du ǃgāse ǁnâuǀnamxasib ǃoa mâisenba hâ-i, ǁnā-i ǁnâuǀnam du hâ-i di ǃgā du asa; ǁoreb karao: ǁŌb ǃoa, ǁnâuǀnamxasib karao: ǂHanu-aisib ǃoa.

¹⁷Tsî Eloba ab ganganhe, ǁoreb di ǃgā du ge i, xawe du nēsi ǂgaob ǀkha ǁkhāǁkhās di aiǁgaus, ǁîsa du māǁnâsen hâsa ǁnâuǀnam kaihe hâ ǃkhaisa.

¹⁸Tsî ǁoreba xu ǃnoraǃnorahe hâse du ge ǂhanu-aisib di ǃgā kaihe.

¹⁹Khoe-i dommi ai ta ra ǃhoa sadu ǁgans di ǂkhabusasib ǃaroma. Sadu uniǁaede du ge ǃanuoǃnâsiba ǃgāse mâiba khami ǀgui ǂhanuoǃnâsiba xu naub kōse, ǁnās ǁkhās xase ǁkhāti nēsi sadu uniǁaede ǂhanu-aisiba ǃgāse mâiba ǃanuǃanusis ǃoa.

²⁰ǁOreb di ǃgā du ge i ǃnubai du ge ǂhanu-aisiba xu ǃnoraǃnorahe hâ i xui-ao.

²¹Tarebe ǂû-e du ǁnâi ǁnā ǁaeb ai ge ūhâ i? ǁÎ-i xa du nēsi ra tao-e, ǁî-i di ǀams a ǁō xui-ao.

²²Xawe nēsisa ǁōba xu ǃnoraǃnorahe hâse tsî Elob di ǃgā kaihe hâse du ge sadu ǂû-e ūhâ ǃanuǃanusis ǃoa, tsî ǀams ge a ǀamo ûi.

²³ǁŌb ge a ǁoreb di mādawa-am xui-ao, xawe ǀkhommi hōs ge a ǀamo ûi, Xristub Jesub sada ǃKhūb ǃnâ.