Read Khoekhoegowab Romeǁîn 7 Bible Online

Romeǁîn 7 - Khoekhoegowab bible

Romeǁîn 7

¹ǂAn tama du hâ, ǃgâsado (ǂhanuba a ǂann ǃoa ta ra ǃhoa), ǂhanub ra khoe-e gaoba ǃkhaisa, ǁî-i ra ûis kōse?

²Aob ǃnaga hâ tara-i ge ǂhanub ǃoa ǁîb ǀkha ǃgaeǀhaohe hâ-e, ǁîb a ûitsama hîa xui-ao; xawe aob ga ǁō-o, os ge aob di ǂhanuba xu xorehe hâ.

³ǁNā-amaga, aob a ûitsama hîas ga ǀkhara aob di kaio, os ǃgamekhôa-aos, ti ra ǂgaihe; xawe aob ga ǁō-o, os ge ǃgamekhôa-ao tama, ǀkhara aob di kais karao.

⁴ǁNāti du ge ǁkhāti sado ǂhanuba ǃgambahe hâ, ǃgâsado, Xristub di soros ǀkha, ǀkharab, ǁō hâna xu ge khâib di kai du nîse, Eloba da nî ǂûtanibaga.

⁵ǁGans ǃnâ da ge hâ i ǃnubai gu ge ǁoreb di turagu, ǂhanuba xu ra gongonǃnâhega sada uniǁaedi ǃnâ gere sîsen xui-ao, ǁōba da nî ǂûtanibaga.

⁶Xawe da ge nēsi ǂhanuba xu ǃnoraǃnorahe hâ, ǁîb ǃnâ da ge ǃgaehe hâ iba ǁōǁnâ hâse; o da ǀasasib Gagab dib ǃnâ ra ǃoaba, tsî ǀorosib ǂkhanimûs dib ǃnâ ǃoaba tama.

⁷Tare-e da kha ǁnâi nî mî? ǂHanuba kha ǁoreba? Tātsē! Xawe ta ga ǁoreba mûǂan tama i hâ, ǂhanuba xu i ga ī tama io. Turab xa ta ga xū-i xare-e ǂan tama i hâ, ǂhanub ga: “Turats ge tide!” ti mî tama hâ io.

⁸Ob ge ǁoreba mîmās ǃnâ ǁgonaǂgao tsî mâ tura-ai-i hoa-e tita ǃnâ gere sîsen. ǂHanu-i oseb ǁoreba ǁō hâ xui-ao.

⁹Tsî ta ge tita ǀguia ǂhanu-i ose gere ûi. Tsî mîmās ge hāo, ob ge ǁoreba ge ûi,

¹⁰xawe ta ge tita ge ǁō; os ge ǁnā mîmās, ûib ǃoa hâsa tita ǁōb di xūse ge hōbahe.

¹¹ǁOreb ge mîmās ǃnâ ǁgonaǂgao, tsî ge ǂgaeǂhapu te, tsî ǁîs ǁkhās ǀkha ǃgam te xui-ao.

¹²Ob ge ǂhanuba a ǃanu, tsî mîmās ge ǃanu, ǂhanu tsî a ǃgâi.

¹³Tsîb kha ǁnâi ǃgâiba tita ge ǁō kaiba? Tātsē! Xaweb ge ǁoreba ǁō kaiba te, ǁoreb aseb nî ǂhaiga, ǃgâib ǀkhab ra ǁōba sîsenba te hîa; îb ga ǁoreba ǀgaus ose ǁorexa mîmāsa xu.

¹⁴ǂAn da a xui-ao, ǂhanub a gagasi ǃkhaisa; xawe ta ge tita a ǁgans di, ǁoreb ǃnâ ǁamaxūhe hâ ta.

¹⁵Tare-e ta ra dīsa ta kom a ǀūo; ǂgao ta ra-i, ǁnā-e ta dī tama, tsî ǁkhan ta ra-i, ǁnā-e ta ra dī xui-ao.

¹⁶Tsî ǂgao tama ta hâ-e ta ga dīo, o ta kom ǂhanub ǀkha ra ǀguio, ǃgâib a ǃkhaisa.

¹⁷O ta nēsi tita ǁî-e dī tama, xaweb kom tita ǃnâ ǁan hâ ǁoreba ǁî-e ra dīo.

¹⁸ǂAn ta a xui-ao, tita ǃnâ, ǁnās ge ti ǁgans ǃnâ i ge ǃgâi-i xare-e ǁan tama ǃkhaisa, ǂgaos ge tita tawa hâsa, xawe ǃgâiba sîsenǂuisa ta ge hō tama hâ.

¹⁹ǃGâib, ǁnā ǂgao ta raba ta kom dī tamao; xawe ǂkhabab, ǁnā ǂgao tama ta hâba ta kom ra dīo.

²⁰Tsî ǁnā ǂgao tama ta hâ-e ta kara dīo, o ta ge tita ǁî-e dī tama, xaweb kom tita ǃnâ ǁan hâ ǁoreba ǁî-e ra dīo.

²¹O ta ge nē ǂhanu-e tita ǃnâ ra hō, ǃgâiba ta ga dī ǂgao-o, ob ge ǂkhababa ra ǁgoeǀgara te.

²²Elob di ǂhanub ǃnâ ta ra ǃgâiaǂgao, ǃnāb di khoeb ǃoa;

²³xawe ta ge ti uniǁaedi ǃnâ ǀkhara ǂhanu-e ra mû, ti ǂâis di ǂhanu-e ra ǂnoagu-ū-i, tsî ǁoreb di ǂhanu-i, ti uniǁaedi ǃnâ hâ-i ǃnâ ra ǃkhō te-e.

²⁴Ti tsūǀkhāxa khoeta! Tari-e nî xore te nē ǁōb di sorosa xu?

²⁵Eloba ta ra gangan Jesub Xristub sada ǃKhūba xu.

²⁶O ta ge tita ǂâis ǀkha Elob di ǂhanuba ra ǃoaba, xawe ǁgans ǀkha ta ge ǁoreb di ǂhanuba ra ǃoaba.