Read Khoekhoegowab Romeǁîn 8 Bible Online

Romeǁîn 8 - Khoekhoegowab bible

Romeǁîn 8

¹O i ge nēsi ǀâxarexūsi-i xare-e Xristub Jesub ǃnâ hâna hâba tama hâ, ǁgans ǃoa tanisen taman, tsî Gagab ǃoa ra tanisenna.

²ǂHanub Gagab dib, Xristub Jesub ǃnâ hâ ûib dib ge ǁoreb tsî ǁōb tsîkha di ǂhanuba xu ǃnoraǃnora te hâ xui-ao.

³ǂHanub ge dī ǁoa i-i, ǁgans xab ge ǂkhabuǂkhabuhe hâ i amaga, ǁnā-eb ge Eloba dī, tsî ǁîb di Ôaba ge sî ǁorexa ǁgans di ǀguiti-īsib ǃnâ, ǁoreba ǁgans ǃnâ ǀgoraǃgâ tsî;

⁴ǂhanub di ǂhanu-aisib nî sada ǃnâ ǀoaǀoahega ǁgans ǃoa tanisen tamada, tsî Gagab ǃoa ra tanisenda.

⁵ǁGans ǃoa hân ge ǁgans din xa ra ǂâiǂâisen; xawe Gagab ǃoa hân ge Gagab din xa ra ǂâiǂâisen xui-ao.

⁶Tsî ǁgans di ǂâiǂâisens ge a ǁō; xawe Gagab di ǂâiǂâisens ge ûi tsî a ǂkhî xui-ao.

⁷ǁNā-amagas ge ǁgans di ǂâiǂâisensa a khākhoesi Elob ǃoagu, Elob di ǂhanub ǃnagas māsen tama amaga; tsîs kom ǁnāsa ǁkhāti dī ǁkhā tamao.

⁸Tsî ǁgans ǃnâ hân ge Eloba a ǃgâiǃgâiba ǁoa.

⁹Xawe du ge sado ǁgans ǃnâ hâ tama, tsî du ge Gagab ǃnâ hâ, Elob Gagab ga sadu ǃnâ ǁano; xawe Xristub di Gagaba ūhâ tama-i ge ǁîb di tama-e.

¹⁰Tsî Xristub ga sadu ǃnâ hâo, os ge sorosa ǁō hâ ǁoreb ǃaroma, xawes ge gagasa a ûitsama ǂhanu-aisib ǃaroma.

¹¹Tsî Jesuba ǁō hâna xu ge ǂkhaiǂkhaib di Gagab ga sadu ǃnâ ǁano, ob ge ǁnāb, Xristub Jesuba ǁō hâna xu ge ǂkhaiǂkhaiba sadu ǁōsa sorode ǁkhāti nîra ûi-ûi, sadu ǃnâ ǁan hâ Gagab âb ǃaroma.

¹²ǁNā-amaga, ǃgâsado, surude-aoda ge sada, ǁgans di tama, ǁgans ǃoa da nî ûise tama.

¹³ǁGans ǃoa du ga ûio, o du ge nîra ǁō xui-ao; xawe gagas ǀkha du ga ǁgans di dīga ǃgamo, o du ge nîra ûi.

¹⁴Elob Gagab xa ra ǂgaeǂguihen hoan, ǁîn a Elob ôa xui-ao.

¹⁵ǃGāsis di gagasa du ǃkhōǃoa tama hâ xui-ao, ǁkhawa du nî ǃaose; xawe du ge ǀgôasis di Gagaba ge ǃkhōǃoa, ǁîb ǃnâ du Abba, ti Îtse, ti ra ǂgaiba.

¹⁶Nē Gagab ǁkhāb ge sada gagas ǀkha ra ǀhûǀguitimî, Elob ôa da a ǃkhaisa.

¹⁷Tsî ǀgôada kao, o da ge ǁkhāti a ǀumi-ao, o da ge Elob di ǀumi-ao, tsî Xristub di ǀhûǀumi-ao ǁîb ǀkha da ga tsâo, ǁîb ǀkha da nî ǁkhāti ǂkhaiǂkhaihega.

¹⁸Nēti ta ra ǂâi xui-ao, nē hâ ǁaeb di tsūǀkhāgu ǁnā ǂkhaisib, sada tawa nîra ǂhaiǂhaiheb ǃoa-ai xū tamase ī ǃkhaisa.

¹⁹Kurusaben ge danasa ǃhâ tsî Elob ôan di ǂhaiǂhaihesa ra ǁkhore xui-ao.

²⁰Kurusaben ge ǁauǁausib ǃnaga mâihe hâ amaga, ǁîn di ǂâis ǀkha tama, xawe ǁîna ǁauǁausib ǃnaga ge mâib di ǂâis ǃaroma, ǃâubasens ǃoa:

²¹Kurusaben on nîra ǁauǁausib di ǃgaesa xu ǃnoraǃnorahe ǃkhaisa, Elob ôan ǂkhaisib di ǃnorasis ǃoa.

²²ǂAn da a xui-ao, kurusaben hoan ra ǀhûpe ǀhâimâinǀom tsî ǀhûpe nēsis kōse ǁoratsûb ǃnâ hâ ǃkhaisa.

²³Tsî ǁîn ǀguina tama i tsî da kom ǁkhāti sada, Gagab di ǂguro hōde ūhâ da sada ǃnâ ra ǀhâimâinǀomo, ǀgôase ǃkhōǃoahesa ra ǃâubasenǃâ, ǁnās ge sada soros di orehesa.

²⁴ǃÂubasens ǃnâ da ǀnai ǃgâiǃō hâ xui-ao. Tsî khoe-i ra mû ǃâubasens ge ǃâubasen tamasa; khoe-i ra mû xū-e, mati i kha nî ǁî-e ǃâubasen?

²⁵Xawe mû tama da hâ xū-e da ga ǃâubaseno, o du ge ǁî-e sâsasib ǀkha ra ǃâubasen.

²⁶ǁNātib ge ǁkhāti Gagaba sada ǂkhabusasiga ra hui; tare xū-e da nî anu i hâ khami ǀgoresa da ǂan tama amaga; ob ge Gagab ǂûba ra ǀgoreba da mîǂuiheǁoasa ǀhâimâinǀomdi ǀkha.

²⁷Tsî ǂgaoga ra ôaǃnâb ge a ǂan, mâ-i a Gagab di ǂâi ǃkhaisa; Elob ǂâis ǃoab ra ǃanuna ǀgoreba amaga.

²⁸Tsî da ge a ǂan, Eloba ǀnam hânan ra hoa xūna ǃgâiba ǃoa sîsenba ǃkhaisa, Elob di ǂâibasens ǃoa ǂgaihe hâna.

²⁹Tsî aiǂanni genab ge ǁkhāti ge aiǂnûiǂgā, ǁîb Ôab di īsib ǀkhan nî ǀguiti-īse, ǁîb nî ǂgui ǃgâsagu ǃnâ ǂguroǃnaesabega.

³⁰Tsî aiǂnûiǂgāb genab ge ǁkhāti ge ǂgai; tsî ǂgaib gen, ǁînab ge ǁkhāti ge ǂhanu-ai kai; tsî ǂhanu-ai kaib gen, ǁînab ge ǁkhāti ge ǂkhaisa kai.

³¹Tare-e da ǁnâi nēn xa nî mî? Elob ga sada ǀkha hâo, tari-e kha sada ǃoagu nî hâ?

³²ǁÎb di Ôab ǂûba ge sâu tama ib, tsî ǁîba sada hoada ǃaroma ge māǁnâba: Matib kha ǁnâi ǁîb ǀkha hoana ǀkhae da tide?

³³Tari-e kha Elob di ǃkhōǂuibasensana nî ǀanaǃgâ? Elob ge a ǁnāb ǂhanu-ai kai raba.

³⁴Tari-e kha ra ǀâxarexū? Xristub Jesub ge a ǁnāb, ǁō geb, ā, nēs ǃgâ-ai: ǁKhāti ge ǂkhaiǂkhaiheb, ǁkhāti Elob di amǀkhāb ǁôab tawa hâb, sada ǁkhāti ra ǀgorebaba.

³⁵Tari-e nî sada Xristub di ǀnamma xu ǀgora? ǁGâiǀāba? ǂŌǂōsiba? ǃGôaǃgonsa? ǃÂtsūǀkhāba? ǀŌǀkhāsiba? Tsūǃgâba? Gôaba?

³⁶Xoamâihe hâ khami: “Sats ǃaroma da ge tsēs hoasa ra ǃgamhe, tsî da ge ǂāgūn axase ǃgôahe hâ,” ti.

³⁷Xawe da ge nēn hoan ǃnâ ǃnāǂamsase ra dan, ǁnāb sada ge ǀnam hâ iba xu.

³⁸ǂAnǁapo ta hâ xui-ao, ǁōb kas, ûib kas, ǀhomǃgā-i kas, ǂamkhoegu kas, ǁkhāsigu kas, nēsi hân tsî ǃgoaxan kas,

³⁹ǀgapib kas, ǃgammi kas, tsî ǀnî kurusabe-i kas hoasa i sada Elob ǀnammi, Xristub Jesub sada ǃKhūb ǃnâ hâba xu a ǀgora ǁoa ǃkhaisa.