Read Khoekhoegowab Romeǁîn 9 Bible Online

Romeǁîn 9 - Khoekhoegowab bible

Romeǁîn 9

¹Amaba ta ra mî Xristub ǃnâ, tsî ta ǂhumi tama hâ, ǁîs xas ra ti ǂâisa ǀhûǀguitimîba te ǃAnu Gagab ǃnâ:

²Kaise ta ǃoa hâ ǃkhaisa, tsî hugaǀgui ta tsûaǂgao hâ ǃkhaisa.

³Tita tura hâ xui-ao, Xristuba xu ta ga tita ǀâxarexūhe ti ǃgâsan, hîa ǁgans ǃoa ti ǀaokhoen di amǃnâs ǃnâ;

⁴ǁîn hîa ge Israelǁîn, ǁîn din ge a ǀgôasis, tsî ǂkhaisib, tsî ǃgaeǀhaodi, tsî ǂhanub ǂnûiǂgās, tsî eloǃoabas tsî mîmâidi tsîna.

⁵ǁÎn digu ge ǁgûga, tsî ǁîna xub ge Xristuba ǁgans ǃoa ge ǀkhī, hoan ǂamai a Elob, ǀamosib kōse ra kareheba, Amen.

⁶Xawe ǁnāti ī tama, Elob mîs ǀû hâ khami. Israela xu hân hoan kom Israelǁî tamao;

⁷tsî ǁkhāti Abrahammi surib din hoan kom ǀgôa tamao xawe: “Isaki ǃnâts ge sa suriba nîra ǂgaibahe,” ti.

⁸ǁNās ge, ǁgans di ôan ge Elob ôa tamana, xawe mîmâis di ôan ge surib ase nîra ǃgôahe.

⁹Tsî mîmâis di mîs ge nēsa: “Nē ǁaeb ǁkhāb ai ta nîra hā, os ge Sarasa ǀgôaba nîra ūhâ,” ti.

¹⁰Tsî nēs ǀguisa tama; xawe ǁkhāti Rebekas ra ǁkhā-e ǁgauǂui, ǀguib sada îb Isaka xus ge ǀgamǀkhāo.

¹¹ǀGôakha ganupe ǃnae tama hâ hîa, tsî ǃgâi-i tsî ǂkhaba-i xare-e kha dī tama hâ hîa Elob di ǂâibasens ǃkhōǂuibasens dis nî hâǀgaiǀgaise, sîsenga xu tama, xawe ǂgai rab di ǀkhomma xu,

¹²hîas ge ge mîǀîhe: “Kaib ge ǂkhamma nîra ǃoaba.”

¹³Xoamâihe hâ khami: “Jakoba ta ge ǀnam, tsî Esauba ta ge ǁkhan” ti.

¹⁴Tare-e da ǁnâi nî mî: Elob tawa i kha ǂhanuoǃnâsi-e hâ i a? Tātsē!

¹⁵Moseb ǃoab kom ra mîo: “ǀKhom ta nî ǀkhom ǂgao ta hâ-i hoa-e; tsî ǀkhomxaǂgao ta nî ǀkhomxaǂgao ǂgao ta hâ-i hoa-e.”

¹⁶ǁNā-amaga i ge ǂgao ra-i tsî ǃkhoe ra-i tawa hâ tama hâ, xawe i ge ǀkhomxaǂgao ra Elob tawa hâ.

¹⁷Xoas ra Faraob ǃoa mî xui-ao: “Nēs ǃaroma ta ge ǂkhaiǂkhai tsî, sa tawa ta nî ti ǀgaiba ǁgauga, îs ti ǀonsa ǃhūbaib hoab ai aoǁnâhe.”

¹⁸Ob ge ǂgaob ra-i hoa-e ǀkhom, tsî ǂgaob ra-i hoa-e ra karokaro.

¹⁹Ots ra tita ǃoa mî: Tarexab ra ganupe ǀau da? Tari-e kha ǁîb di ǂâisa ge mâǃoa?

²⁰Okha, ti khoetse, taritsa kha sats Elob ǃoagu ra ǃereamtsa? Kurusabe-e kha kuru-aob ǃoa mî i ra: Tarexats nēti ge dī te?

²¹Sūǂnubi-aoba kha ǂgoab ǂama ǀgai-e ūhâ tamab hâ, ǁkhā ǂgoab ǀkhab nî ǀgui soa-e ǃgôasib ǃoa tsî nau-e ǃgôaoǃnâsib ǃoa dīsa?

²²Tsî Elob ge, ǁîb di ǁaibab ra ǁgau ǂgao tsî ǁîb di ǀgaibab ra ǂanǂan ǂgao hîa, ǁaib di soadi, kāǁōsiba ǂhomibahe hâde ǃnūǃnâxasib ǀkha gere tani,

²³ǂanǂanni nîga ǁîb ǂkhaisib di ǁuiba, ǀkhomxaǂgaosib di soadi tawa, ǂkhaisibab ge aiǂhomibade,

²⁴ǁîb ǃoa da ge ǁkhāti sada ǂgaihe hâ, Jodeǁîda ǀguida tama, tsî ǁkhāti ǀūbeǁîda.

²⁵Hoseab ǃnâb ra ǁkhāti mî khami: ǁNās ti ǁae tama ge isa ta nî ti ǁaese ǂgai, tsî ǀnamhe tama ge hâ isa ta ti ǀnamse, ti nî ǂgai.

²⁶Tsî i ge nîra ī, ǁnā ǃkhais ǁîs ain ge: Ti ǁae tama du ti a mîǀîhes, ǁnāpan ge ûitsama Elob ôan ti nîra ǂgaihe.

²⁷Tsî Jesajab ra Israeli ǂama ǂgai: Tsî Israeli ôan di ǀgaus ga hurib ammi ai hâ ǀgopab di ǀgaus xase ī, xawes ge ǃgoros ǀguisa nîra ǃgâiǃō;

²⁸ǃKhūb nî ǁîb di mîsa hoaragase dītoa tsîb nî ǁîsa ǃhaese dītoa ǃhūbaib ai amaga.

²⁹Tsî Jesajab ra aiǃâ mî khami: “ǃKhūb ǂnubidi dib ga sada suri-e ǃgauba tama io, o da ga Sodoms khami ī hâ, tsî da ga Gomoras ǀkha ǀguiti-ī hâ.”

³⁰Tare-e da kha ǁnâi nî mî? Nēs: ǀŪben, ǂhanu-aisiba ǃgôaǃgon taman, ǁîn ge ǂhanu-aisiba ge ǃkhōǃoa, ǂgomsa xu ra ǀkhī ǂhanu-aisiba.

³¹Xawe Israelǁîn, ǂhanu-aisib di ǂhanuba gere ǃgôaǃgonn, ǁîn ge ǂhanu-aisib di ǂhanub tawa sī tama hâ.

³²Tare xū-i ǃaromasa? ǂGomsa xun ǁîba ôa tama, tsî ǂhanub di sîsenga xun ra ôa bi amaga. ǃNôa-aiǀuis tawan ge ǃnôa xui-ao;

³³xoamâihe hâ khami: “Mû, Sions tawa ta ǃnôa-aiǀuis tsî ǁgonǁgonǂgaos di ǃhaoba ra ǁgui; tsî ǁîb ǃnâ ra ǂgom-i hoa-i ge taotaohe tide-e.”