Read Khoekhoegowab 1 Korinteǁîn 1 Bible Online

1 Korinteǁîn 1 - Khoekhoegowab bible

1 Korinteǁîn 1

¹Pauluta, ǂgaihesa apostelta Xristub Jesub di ta Elob di ǂâisa xu, tsî ǃgâsab Sosteneb tsîkhom.

²ǀHaohâb Elob dib, Korintes ǃnâ hâba ǃoa, Xristub Jesub ǃnâ ǃanuǃanuhe hân, ǂgaihesa ǃanun tsî sada ǃKhūb Jesub Xristub di ǀonsa ra ǂgaiǀîn hoana, ǁîn tsî sada ǃkhaidi hoadi ai:

³Ab ǀkhomma sadu ǀkha hâ, tsî ǂkhîba, Elob sada Îb tsî ǃKhūb Jesub Xristuba xu.

⁴Ti Eloba ta ra gangan mâ ǁaeb hoab ai sadu ǂama, Xristub Jesub ǃnâ du māhe hâ ǀkhommi ǃaroma;

⁵hoa xūn ǃnâ du ge ǁîb ǃnâ ǃkhū ǃkhais xa, hoa ǁkhāǁkhās tsî hoa ǂans tsîra ǃnâ;

⁶Xristub xa hâ ǀhûǀguitimîs sadu ǃnâ ǀgaiǀgaihe hâ khami,

⁷ǀkhommi mā-i xare-i ǃnâ du tôasi tidese, sada ǃKhūb Jesub Xristub di ǂhaiǂhaisensa du ra ǃâus kōse,

⁸ǁîb sado ǁkhāti ǀams kōse nîra ǃkhōǀgaraba, sada ǃKhūb Jesub Xristub di tsēs ai du nî ǀanaǃgâhe ǁoasase iga.

⁹ǂGomǂgomsab ge Elob, ǁîb xa du ǂgaihe hâba ǀhûhâsib ǁîb Ôab Jesub Xristub sada ǃKhūb diba ǃoa.

¹⁰O ta ra ǁnama du, ǃgâsado, sadu ǃKhūb Jesub Xristub di ǀons ǃnâ, ǀguiǃnâxa du nî ǃkhaisa tsî ǀgoraǃāgudi sadu ǃnâ hâ tidesa, î du ǁkhā ǂâis tsî ǁkhā tsâsens ǀguis ǃnâ ǀhûpe hâ.

¹¹Tita ge sago xa ge ǂanǂanhe, ti ǃgâsago, Kloes oms din xa, ǂkhabagub sago ǁaegu hâ ǃkhaisa.

¹²Tsî ta nēs xa ra mî, mâ-i hoa-i âdu ra mî ǃkhaisa: Tita ge Paulub di ta; tita ge Apolob di ta; tita ge Kefab di ta; tsî tita ge Xristub di ta.

¹³Xristuba kha ǀgoraǃāheb hâ? Pauluba kha sado ǃgâubaheb hâ? Paulub di ǀons ǃnâ du kha ge ǁāǁnâhe?

¹⁴Eloba ta ra gangan, sadu di ǀgui-i xare-e ta ǁāǁnâ tamasa, Krispub tsî Gajub tsîkha ǀguikha,

¹⁵khoe-i xare-i mî tidese ti ǀons ǃnâ ta gere ǁāǁnâ ǃkhaisa.

¹⁶Tsî ta ge Stefanab ommi din tsîna ge ǁāǁnâ; ǃaruǀî ta ǂan tama, ise ta ge ǀnî khoe-e ǁāǁnâsa.

¹⁷Xristub tita sî tama hâ xui-ao, ǁāǁnâ ta nîse, tsîb ge ge sî te, ǃgâiǂhôasa ta nî aoǁnâse, mîdi di gā-aisib ǀkha tama, Xristub di ǃgâuhaib ǁauǁauhe tidega.

¹⁸Mîs ǃgâuhaib dis ge kaǁō rana gâresib ase ība, xawes kom sada, ǃgâiǃō kaihe rada Elob ǀgaise ībao.

¹⁹Xoamâihe hâ xui-ao: “Tita ge gā-ain di gā-aisiba nî ǁauǁau, tsî ta ge ǁnâuǃāxan di ǁnâuǃāba nî hîkākā,” ti.

²⁰Mapa i gā-ai-e hâ? Mapa i xoaǂansabe-e hâ? Mapa i hâ ǂnoagu-ao-i nē hâ ǁaeb di-e? Eloba nē ǃhūbaib di gā-aisiba gâresib ase dī tamab hâ?

²¹ǃHūbaib ge Eloba gā-aisib âba xu mûǂan tama i, amagab ge Eloba ge ǃgâiǂâibasen, aoǁnâs di gâresib ǀkhab nî ǂgom rana ǃgâiǃō kai ǃkhaisa.

²²Jodeǁîn ra sao-e ǂgao, tsî Grikeǁîn ra gā-aisiba ôa xui-ao.

²³Xawe ge ge sige Xristub ǃgâuhe geba ra aoǁnâ, Jodeǁîna ǁgonǁgonǂgaose ībaba, tsî Grikeǁîna gâresib ase ībaba.

²⁴Xawe ǁnān ǂgaihesan, Jodeǁîn karao, Grikeǁîn karao, ǁîna ge ge Xristuba Elob di ǀgaise tsî Elob di gā-aisise ra aoǁnâ.

²⁵Elob di gâresib ge khoen ǂamai a gā-ai, tsî Elob di ǂkhabusasib ge khoen ǂamai a ǀgaisa xui-ao.

²⁶Kō sago di ǂgaihesa, ǃgâsago! ǁGans ǃoa gā-ai khoen, tsî ǀgaisa khoen, tsî ǀgapiǃgôasa khoen xan ge ǂgui tamana ǂgaihe hâ.

²⁷Xawe ǃhūbaib di gâre-eb ge Eloba ǃkhōǂuibasen hâ, gā-ainab nî taotaose; tsî ǃhūbaib di ǂkhabusa-eb ge Eloba ǃkhōǂuibasen hâ, ǀgaisanab nî taotaose;

²⁸tsî ǃhūbaib di sorasa tsî ǃharaxūsa-eb ge Eloba ǃkhōǂuibasen hâ, tsî xū tamase ī-e, xūse ī-eb nî ǁauxūdīse,

²⁹ǁgan-i xare-i ǁîb aiǃâ koasen tidese.

³⁰Tsî ǁîba xu du ge sado hâ Xristub Jesub ǃnâ, Elob xa sada ge dībaheba gā-aisise, tsî ǂhanu-aisise, tsî ǃanuǃanusise, tsî oresise;

³¹xoamâihe hâ khami i nî īse: “Koasen ra-e, a-i ǃKhūb ǃnâ koasen,” ti.