Read Khoekhoegowab 1 Korinteǁîn 10 Bible Online

1 Korinteǁîn 10 - Khoekhoegowab bible

1 Korinteǁîn 10

¹Tsî ta ǂgao tama hâ, ǃgâsado, ǀūǂamse du nî hâsa, sada îgu hoagu ge ǀnanus ǃnaga hâ i ǃkhaisa, tsî hoagu ge huriba ǃgûǃganu ǃkhaisa;

²tsî hoagu ge Moseb ǃnâ ǁāǁnâhe ǃkhaisa ǃâus tsî hurib tsîra ǃnâ;

³tsî hoagu ǁkhā gagasi ǂû-e gere ǂû ǃkhaisa;

⁴tsî hoagu ǁkhā gagasi āxū-e gere ā ǃkhaisa (saoǀhao ge gagasi ǃhaob ǃnâ gu gere ā xui-ao, tsî ǁnā ǃhaob ge Xristu ge i;)

⁵xawe ǂguin ân ǃnâb ge Eloba ǃgâiǃgâibasen-e ūhâ tama ge hâ i; on ge ǃgaroǃhūb ǃnâ ge ǂnauǁguihe.

⁶Tsî nēn ge aiǁgause ge ǃnaeba da, sada ǂkhababa tura tidega, ǁîn gere tura khami.

⁷Î du ǁkhāti tā ǁgôatsuiǁgoan di ǃgā kai, ǀnîn ân ge ī khami; xoamâihe hâ khami: “ǁAes ge ge ǂnû, ǂû tsîn nî āse, tsîn ge ge khâi ǀhurun nîse.”

⁸Î da ǁkhāti tā ǀai, ǀnîn ân gere ǀai khami, tsîn ge ǀgui tsēs ai ǀgamdisiǃnonaǀaǀoadisise ge ǁnā.

⁹Î da ǁkhāti Xristuba tā ǃâitsâ, ǀnîn ân ge ǃâitsâ bi khami, tsîn ge ǀaon xa ge hîkākāhe.

¹⁰Î du ǁkhāti tā ǀara, ǀnîn ân gere ǀara khami, tsîn ge ǁgaoǁgao-aob xa ge hîǀhuruhe.

¹¹Tsî nēn hoan ge ǁîna aiǁgause ge hāǂam; tsîn ge sada, ǃhūbaib di ǀkhâuǀamdi ge hāǂamda ǁnamase ge xoamâibahe.

¹²ǁNā-amaga, mâ ta hâ, ti kara ǂâi-e, a-i ǂanbasen, î-i tā ǁnā.

¹³ǀNî ǃâitsâ-i ge sado gorose hāǂam tama hâ, khoesi ǃâitsâ-i ǀgui-i: Tsî Elob ge a ǂgomǂgomsa, ob ge ǁkhā du as ǂamai ǃâitsâ du tide, tsîb ge ǃâitsâb ǃnâts nî mâǃkharusa nî īǁkhā kaiba tsî, ǁîsa du nî tani ǁkhāse.

¹⁴ǁNā-amaga, ti ǀnamsabedo, ǁgôatsuiǁgoaǃoabasa ǁhâxū re.

¹⁵ǁNâuǃāxa khoe-i ǀkhas khami ta ra ǃhoa-ū du; ǁî-aitsama ǀgora mî ta ra-e.

¹⁶ǁNā ǀgabis gangans dis, ǁîsa ge ra ǀkhaesa, Xristub ǀaob di amǃnâxasi tamasa? ǁNā pereb, ǁîba ge ra khôaba, Xristub soros di amǃnâxasi tamaba?

¹⁷ǀGui pereb a khami da ge sa ǂguida a ǀgui soro; sada hoada ǀgui pereb ǃnâ ra amǃnâxa xui-ao.

¹⁸Kō Israelǁaesa ǁgans ǃoa; ǁnān, ǁguibade ra ǂûna, altars ǃnâ amǃnâxa taman hâ?

¹⁹Tare-e ta ǁnâi nî mî? ǁGôatsuiǁgoa-e, xū-e? ǁGôatsuiǁgoaǁguiba-e, xū-e?

²⁰Hî-î, xawe ta ra mî, ǀūben ra ǁguiban, ǁînan ra ǁgâuaga ǁguiba, tsîn Eloba ǁguiba tama; tsî ta ǂgao tama hâ, ǁgâuagu ǀkha du nî ǀhûhâsi-e ūhâ ǃkhaisa.

²¹ǃKhūb di ǀgabis tsî ǁgâuagu di ǀgabis tsîna du a ā ǁoa; ǃKhūb di tāb tsî ǁgâuagu di tāb tsîn ǃnâ du a amǃnâxa ǁoa.

²²Okha, ǃKhūba da ǂoeǂoe ǂgao hâ? ǁÎb ǃgâ-ai da kha ǀgaisa?

²³Hoana ta mā-amhe hâ xawen ge hoana harebe tama hâ; hoana ta mā-amhe hâ xawen ge hoana ǂnubikhâi tama hâ.

²⁴A-i khoe-i xare-e ǁî-i ǃgâiba tā ôa, î-i mâ-i hoa-e nau-i diba ôa.

²⁵ǁGanǁamaxūǃkhais ai ra ǁamaxūhen hoana ǂû, î du ǂgaoǂans ǃaroma tā xū-e ôaǃnâ,

²⁶ǃhūbaib a ǃKhūb di tsî ǁîb ai hân hoana xuige.

²⁷Tsî ǂgomoǃnân di ǀgui-i ga ǁkhau du, tsî du ga ǃgû ǂgao-o, mâi-aiǃâhe du nîn hoana ǂû, xū-i xare-e ǂgaoǂans ǃaroma ôaǃnâ tama i tsî.

²⁸Tsî khoe-i ga sadu ǃoa mîo: ǁGôatsuiǁgoab ǁguiba-i ge nē-e: Tā ǂû, ǁîsa go ǂanǂan tsi-i tsî ǂgaoǂans tsîn ǃaroma.

²⁹Tsî ta ǁîsa ra ǂâibasen, sas xa tama i tsî nau-i dis xa. Tare xū-i ǃaromab kha ti ǃnorasiba nau-i di ǂâis xa ra ǀgoraǃgâhe?

³⁰Tita ga gangans ǀkha ǂûo, tarexa ta kha ǁî-i ǂama ta ra gangan xū-i ǃaroma ra ǃkhāǃkhāhe?

³¹ǁNâi ǂû du karao, ā du karao, tsî dī du kan hoan, ǁîna Elob di ǃgôasib ǃoa dī re.

³²Tā ǃnôase ība Jodeǁîn kas, Grikeǁîn kas, Elob di ǀhaohâb kas hoasa,

³³tita on ra hoana hoa xūn ǃnâ ǃgâiǃgâiba khami, ti harebesa ôa tama i, tsî ǂguina harebeba hâ-e ra ôaǃâ, sâuhen nîga.