Read Khoekhoegowab 1 Korinteǁîn 11 Bible Online

1 Korinteǁîn 11 - Khoekhoegowab bible

1 Korinteǁîn 11

¹Ti ǁgaeǁgae-ao kai re, tita tsîn a Xristub di ǁgaeǁgae-aos ǁkhās khami.

²Tsî ta ra koa du, ǃgâsado, hoa xūn ǃnâ du tita xa ra ǂâi ǃkhaisa, tsî ǁîde ta ge māǁnâ du khami du ǂnûiǂgāde ra ǃkhōǀgaipe ǃkhaisa.

³Tsî ta ra ǂgao, ǂan du nîsa, Xristub a mâ aob hoab di dana ǃkhaisa, tsî aob a taras di dana ǃkhaisa, tsî Elob a Xristub di dana ǃkhaisa.

⁴Mâ aob hoab, ǀgoreb kas, kēbob kas hîa xū-e danas ai ūhâba, ǁnāb ra danas âba ǃgôao kai.

⁵Tsî mâ taras hoas, ǀgores kas, kēbos kas hîa ǀōdana hâsa, ǁnās ra danas âsa ǃgôao kai; ǂkhomhes ga hâs ǁkhās khami i kom īo.

⁶Taras ga ǀgapa ǂgao tama io, as ǂkhomkaisen; xawe taras ga ǂkhomkaisens nîs xa tsî ǀûnas nî ǁara kais xa taotaosabaheo, as ǀgapa.

⁷Xawe aob ge danasa ǀgapa-ai tide, Elob di īsib tsî ǂkhaisib a amaga; tsî taras ge a aob di ǂkhaisi.

⁸Aob kom tarasa xu hâ tamao, tsîs kom tarasa aoba xu hâo.

⁹Tsîb kom aoba ǁkhāti taras ǃaroma kuruhe tamao, xawe tarasa aob ǃaroma.

¹⁰ǁNā-amagas ge tarasa ǀhau-e danas ai nî ūhâ ǀhomǃgāgu ǃaroma.

¹¹ǁNāti ī xaweb ge aoba taras ose, tsîs ge tarasa aob ose hâ tama hâ ǃKhūb ǃnâ.

¹²Taras aoba xu hâs ǁkhās khamib aoba tarasa xu hâ xui-ao; tsî hoan ge Eloba xu hâ.

¹³Sadu ǃnâ aitsama ǀgora, ise i a anu ǃkhaisa, taras nî ǀōdanase Elob ǃoa ǀgoresa.

¹⁴Tsî ǂūsib ǁkhāba kha ǁkhāǁkhā du tamab hâ, aoba i taotaosaba ǃkhaisa, gaxu ǀûnab ga ūhâo?

¹⁵Tsî tarasa i a ǃgôasaba ǃkhaisa, gaxu ǀûnas ga ūhâo? Gaxu ǀûnas kom ǃgū-ai xūse ge māheo.

¹⁶Tsî khoe-i ga ǂnoagu ǂgao, a-i ǂan, ǁnāti ī ǁnaetiba ge ūhâ tama hâsa, tsî ǀhaohâgu Elob digu ona.

¹⁷Tsî ta nēsa ra mîmā hîa ta ge ǁîsa a kare ǁoa, ǃgâi kais ǃoa tama i tsî tsū kais ǃoa du ra ǀhû ǃkhaisa.

¹⁸ǂGurosa ta ra ǁnâu, ǀhaohâb ǃnâ du kara ǀhûo, o di ge ǁhaiǃāde sadu ǃnâ hâ, tsî ta ǁîsa ǃkharese ra ǂgom.

¹⁹ǀGoradi kom sadu ǃnâ nî hâo, ǂhauǃnân nî sadu ǃnâ ǂhaiga.

²⁰ǀHû du karao, o i kom, ǃKhūb di ǃuiǂûsa du nî dīse ī tamao:

²¹ǂÛhe ra hîa i ge mâ-i hoa-e ǁî-i ǃuiǂûs ǂhanisa ra aiǂû, o i ge ǀgui-e ǃâ hâ, tsî nau-i ge ǀhoro hâ.

²²Om-e kha ūhâ tama du hâ, ǁî-i tawa du nî ǂû tsî ā-e? ǁNâi ǀhaohâb Elob diba ǃharaxū tama du hâ, tsî du ūhâ tama hâna ra tao kai? Tare-e ta nî mîba du? Koa du ta nî? Nēs ǃnâ ta koa du tide.

²³ǃKhūba xu ta ge ge ǃkhōǃoa, sado ta ge ǁkhāti mā-e: ǃKhūb Jesub ge, ǀapexūheb ge tsuxub ǃnâ pereba ū ǃkhaisa,

²⁴tsî ganganni ge, ob ge khôa bi, tsî ge mî: Ū, î go ǂû, nēs ge ti soros, sago ǃaroma ra khôahesa; dī nēsa ti ǂâiǂâisensa ǃoa.

²⁵ǁNās ǁkhās khamib ge ǁkhāti ǀgabisa tsuxuǂûs khaoǃgâ ū, tsî ge mî: Nē ǀgabis ge ǀasa ǃgaeǀhaosa ti ǀaob ǃnâ; dī go nēsa, ā bi go kas kōse ti ǂâiǂâisensa ǃoa.

²⁶Nē pereb xa ǂû tsî du ga nē ǀgabis xa ās kōse du ge ǃKhūb di ǁōba nî aoǁnâ, hāb nîs kōse.

²⁷ǁNā-amaga anu tamase ga nē pereb xa ǂû-i tsî ǃKhūb di ǀgabis xa ā-i, ǁnā-i ge ǃKhūb soros tsî ǀaob tsîra tawa ǀhapixa-e.

²⁸A-i khoe-e ôaǃnâsen, î-i ǁnāti nē pereb xa ǂû, tsî nē ǀgabis xa ā.

²⁹Anu tamase ǂû tsî ga ā-i, ǁnā-i ge ǁî-aitsama ǀgoraǃgâ-e ra ǂû tsî ābasen xuige, ǃKhūb sorosa ǀgora tamase.

³⁰ǁNā-amagan ge ǂgui ǂkhabusan tsî ǀaesen hâna sadu ǃnâ hâ, tsî ǀnîn ge ge ǁō.

³¹ǁÎ-aitsama da ga ǀgoraǃgâseno, o da ǀgoraǃgâhe tide xui-ao.

³²Tsî ǀgoraǃgâhe da kao, o da ge ǃKhūb xa ra ǁkharahe, ǃhūbaib ǀkha da ǀgoraǃgâhe tidese.

³³ǁNā-amaga, ti ǃgâsado, ǂû du nîse du ga ǀhûo, a-i nē-e nau-e ǃâu.

³⁴Tsî khoe-i ga ǃâ, a-i oms tawa ǂû, ǀgoraǃgâ-i ǃoa du ǀhao tidega. Nau xūna ta ge, sī ta ga ǁaeb ai nî dī-unu.