Read Khoekhoegowab 1 Korinteǁîn 12 Bible Online

1 Korinteǁîn 12 - Khoekhoegowab bible

1 Korinteǁîn 12

¹Tsî gagasi hōdi xa du nî ǀūǂamse hâsa ta ǂgao tama hâ, ǃgâsado.

²ǂAn du a, ǀūbe du ge isa, tsî ǃhoa ǁoa ǁgôatsuiǁgoan ǃoa du ge ǃgû-ūhesa, ǂgaeǂguihe du ge khami.

³ǁNā-amaga ta ra ǂanǂan du, ǀgui-i xare-i, Elob Gagab ǃnâ ra ǃhoa-i Jesuba ǀâxareb ase ǂgai tama hâ ǃkhaisa; tsî ǀgui-i xare-i ge Jesuba ǃKhūb ase a ǂgai ǁoa, ǃAnu Gagaba xu i ga ī tama io.

⁴Tsî hōdi ge a ǃkharaga, xaweb ge a ǁkhā Gaga.

⁵Tsî ǃoabadi ge a ǃkharaga, xaweb ge a ǁkhā ǃKhū.

⁶Tsî sîsenǂuidi ge a ǃkharaga, xaweb ge a ǁkhā, Elo hoa xūna hoan ǃnâ ra sîsenna.

⁷Tsî mâ-i hoa-i ge Gagab di ǂhaiǂhaisa hoan di harebes ǃoa ra māhe:

⁸ǀGui-i ge Gagaba xu gā-aisib di mîsa ra māhe; tsî nau-e ǂans di mîsa, ǁkhā Gagaba xu;

⁹tsî nau-e ǂgomsa, ǁkhā Gagaba xu; tsî nau-e ǂgauǂgaus di hōde, ǁkhā Gagaba xu;

¹⁰tsî nau-e buruxa ǀgaiga sîsenǂuisa; tsî nau-e kēbosisa; tsî nau-e gagade i nî ǀgorasa; tsî nau-e ǃkharaga gowaga ǂansa; tsî nau-e gowaga ǁguiǃāsa.

¹¹Tsî nēn hoanab ra ǁkhā Gagab ǀguiba sîsen, mâ-i hoa-e ǀguiǀguibes ai ra ǀgorabaǃâ, ǁîb ra ǂgao khami.

¹²Soros a ǀgui, tsî ǂgui uniǁaedes ūhâ khami, tsî ǁnā ǀgui soros di uniǁaedi a ǂgui xawes a ǀgui soros ǁkhās khamib ge Xristuba ī.

¹³Sada hoada ge ǀgui Gagaba xu ǀgui soros ǃoa ǁāǁnâhe hâ xui-ao, Jodeǁîda karao, Grikeǁîda karao, ǃgāda karao, ǃnorasada karao; tsî da ge hoada ǀgui Gagaba xu āsihe hâ.

¹⁴Soros ge ǁkhāti ǀgui uniǁae tamasa, tsîs a ǂgui uniǁae xui-ao.

¹⁵ǂAis ga mîo: ǃOm tama ta, o ta kom soros di tamao, ǁîs ǃaromas kha soros di tama?

¹⁶Tsî ǂgaes ga mîo: Mû tama ta, o ta kom soros di tamao, ǁîs ǃaromas kha soros di tama?

¹⁷Tsî soros hoas ga mûo, mapas kha ga ǁnâusa hâ? Tsî hoaragases ga ǁnâuo, mapas kha ǃkhapasa nî hâ?

¹⁸Ob ge Eloba uniǁaede ge mâi, mâs hoasa ǁîs di ǃkhais ai soros ai, ǂgaob ge khami.

¹⁹Tsî hoadi ga ǀgui uniǁaeo, mapas kha ga sorosa hâ?

²⁰O di ge uniǁaede a ǂgui, xawes ge sorosa a ǀgui.

²¹Os ge mûsa ǃommi ǃoa: Satsa ta ǂhâba tama hâ, ti a mî ǁoa, tsîs ge ǁkhāti danasa ǂaira ǃoa: Saro ta ǂhâba tama hâ, ti a mî ǁoa.

²²Hî-î, xawe soros di uniǁaedi xa ǂkhabusase da ra ūhâdi, ge hoadi ǃgâ-ai a ǂhâǂhâsade;

²³tsî hoadi xa ǃharaxūhesase ra ība dadi, ǁnāde da ge hoadi ǂamai ra ǃgôa; tsî sada anu tamase ība uniǁaede da ǃnāǂamsase ra ani;

²⁴sada anuse ībadi kom ǁîsa ǂhâba tamao; tsî Elob ge sorosa ǁnāti ge ǃamǁare, tôasi hâ uniǁae-e ǃnāǂamsa ǃgôasi-e mā hâǃâ,

²⁵ǁhaiǃāgu-i soros ǃnâ hâ tidese, î di uniǁaede nēsa nausa ǀguitikōse ǂhansenba ti.

²⁶Tsî ǀgui uniǁae-i ga tsâo, o di ge uniǁaedi hoade ra tsâǀhao; tsî ǀgui uniǁae-i ga ǃgôasiba ǁgauheo, o di ge uniǁaedi hoade ra ǃgâiaǂgaoǀhao.

²⁷Sadu ge a Xristub di soro, tsî ǀguiǀguibes ai du ge a uniǁae.

²⁸Tsî Elob ge ǀnîga ǀhaohâb ǃnâ ge mâi ǂgurose apostelse, tsî ǀgamǁîse kēbo-aose, tsî ǃnonaǁîse ǁkhāǁkhā-aose, ǁnās khaoǃgâ buruxa ǀgaiga, ǁnās khaoǃgâ ǂgauǂgaus hōde, huigude, gaosîsensa, ǃkharaga gowaga ǂansa.

²⁹Hoaga kha a apostel? Hoaga kha a kēbo-ao? Hoaga kha a ǁkhāǁkhā-ao? Hoaga kha a buruxa ǀgai?

³⁰Hoaga kha ǂgauǂgaus hōde ūhâ? Hoaga kha ǃkharaga gowagu ǀkha ra ǃhoa? Hoaga kha a ǁguiǃā-ao?

³¹Î du hoan xa ǃgâi hōde ôa-am; o ta ge ǁîde ǃnā hâ dao-e nî ǁgau du.