Read Khoekhoegowab 1 Korinteǁîn 13 Bible Online

1 Korinteǁîn 13 - Khoekhoegowab bible

1 Korinteǁîn 13

¹Khoen tsî ǀhomǃgāgu di gowaga ta ga ǃhoao, tsî ta ga ǀnamma ūhâ tama io, o ta ge ǀō ra ǀurise tsî ǂnauhe ra simbalse ī.

²Tsî kēbo ǁkhā ta kao, tsî ǂganǃgâsigu hoaga ta ga ǂano, tsî ǂans hoasa ta ga ǂano, tsî ǂgoms hoasa ta ga ūhâo, ǃhomga ta a ǂnûiǃkhuni ǁkhā-ūsa, tsî ta ga ǀnamma ūhâ tama io, o ta ge xū tama hâ.

³Tsî ū ta hân hoana ta ga ǀgâsana ǂhûiǂuio, tsî ti sorosa ta ga khauǃkhūhes nîse māǁnâo, tsî ta ga ǀnamma ūhâ tama io, o i ge xū-e harebeba te tide.

⁴ǀNammi ge ǃnūǃnâxa, tsîb ge a ǃgâi; ǀnammi ge suri tama hâ; ǀnammi ge koasen tama hâ; ǁîb ge khūkhūsen tama hâ;

⁵ǁîb ge anu tamase tanisen tama hâ; ǁîb di ǃgâi-eb ôabasen tama hâ, ǀarakaisen tamab hâ; ǂkhaba-i xare-eb ǂâi tama hâ.

⁶ǂHanuoǃnâsib ǃnâb ǃgâiaǂgao tama tsîb ra amab ǃnâ ǃgâiaǂgao.

⁷Hoanab ra ǃgū-ai, hoanab ra ǂgom, hoanab ra ǃâubasen, hoanab ra taniǀnam.

⁸ǀNammi ge tātsē ǀuni tideba; xawe kēbosidi karao, ǁîdi ge nîra ǀuni, gowagu karao, ǁîgu ge nîra ǀuni, ǂans karao, ǁîs ge nîra ǃgû-ī.

⁹ǃKhareǃkharese da a ǂan, tsî ǃkhareǃkharese da ra kēbo xui-ao.

¹⁰Xawe dīǀoaǀoasib ga hāo, os ge ǃkhareǃkharesa nîra ǃgû-ī.

¹¹ǀGôa ta ge i ǃnubai ta ge ǀgôa-i axase gere ǃhoa; ǃnubai ta ge ǀgôa-i axase gere ǂâi, ǃnubai ta ge ǀgôa-i axase gere ǀgora. Xawe ao kai ta ge ǃnubai ta ge ǀgôasi xūna ge ǁguiǁnâ.

¹²Mûsenxūs ǃnâs a khami da nēsi ǀhoese ra mû; xawe ǁnāǃnubai da ge aisa xu ais ǃoa nîra mû. Nēsi ta ǃkhareǃkharese a ǂan, xawe ǁnāǃnubai ta ge ǀoasase nîra ǂan, ǀoasase ta a ǂanhes ǁkhās khami.

¹³On ge nēsi ra hâ ǂgoms tsî ǃâubasens tsî ǀnammi tsîn, nē ǃnonana; xawe ǀnammi ge nēn hoan ǃnâ a kai.