Read Khoekhoegowab 1 Korinteǁîn 14 Bible Online

1 Korinteǁîn 14 - Khoekhoegowab bible

1 Korinteǁîn 14

¹ǀNamma ǃgôaǃgon re; î du gagasi hōde ǃhaeǃgon re, tsî hoan ǂamai, kēbo du nîsa.

²Nammi ǀkha ra ǃhoa-i ge khoena ǃhoaba tama i, tsî Eloba ra ǃhoaba-e; khoe-i xare-i ǁnâuǃā tama hâ xui-ao, xawe Gagas ǃnâ i ge ǂganǃgâsiga ra ǃhoa.

³Tsî kēbo ra-i ge khoena ǂnubikhâis tsî ǁnamas tsî ǁkhaeǂgaos tsîna ra ǃhoaba-e.

⁴Nammi ǀkha ra ǃhoa-i ge ǁî-aitsama ra ǂnubikhâisen-e, xawe kēbo ra-i ge ǀhaohâba ra ǂnubikhâi-e.

⁵Tsî ta ra ǂgao, sadu hoadu ga gowagu ǃnâ ǃhoasa; xawe ǁîs ǃgâ-ai, kēbo du nîsa. Kēbo ra-i ge gowagu ǃnâ ra ǃhoa-i ǂamai a kai xui-ao; tamas ka io i ga ǁguiǃā ǁkhāo, ǀhaohâb nî ǂnubikhâisa hōse.

⁶Tsî nēsi, ǃgâsado, sadu tawa ta ga ǃhao gowagu ǃnâ ra ǃhoase sīo, tare-e ta ga harebeba du, sadu ǃoa ta ga ǃhoa tama io ǂhaiǂhais ǃnâs kas, ǂans ǃnâs kas, kēbosis ǃnâs kas, ǁkhāǁkhās ǃnâs kas hoasa. s

⁷Ûi-o xūn, ǀō-e ra mān ǀkha i kom ǁnās ǁkhās xase īo, ǂnunib karao, siters karao, ǃkharagasen ga ǀō tama io, mati-i kha nî ǁnâuǃāhe, mâ xū-i ra ǂnunihe tsî ǀkhōhe ǃkhaisa?

⁸Tsî ǀgapadas ga ǃgāsa ǀō-e mā tama io, tari-e kha torob ǃoa nî ǂhomisen?

⁹ǁNās ǁkhās xase sadu on, nammi ǀkha du ga ǃgāsa khom-e mā tama io, mati i kha ǃhoahe ra-e nî ǁnâuǃāhe? ǂOab ǃnâ ra ǃhoadu axase du kom nî īo.

¹⁰Nētikō ǂgui gowaǃnôagu ge, ī-i a khami, ǃhūbaib ai hâ, xawe ǁîgu di ǀguib xaweb ge ǀōo tama hâ;

¹¹xawe ǀōb di ǂâibasensa ta ga ǂan tama io, o ta ge ǃhoa ra-e ǃhaokhoese nî ība, tsî ǃhoa ra-i ge tita ǃhaokhoese nî ība.

¹²ǁNās ǁkhās khami ǁkhāti sado, gagasi hōde du ra ǃhaeǃgon amaga dī, î du ǀhaohâb di ǂnubikhâis ǃoa hân ǃnâ ǃnā.

¹³ǁNā-amaga nammi ǀkha ra ǃhoa-e, a-i ǀgore, î-i ǁkhāti ǁguiǃā ǁkhā.

¹⁴Nammi ǀkha ta ga ǀgoreo, os ge ti gagasa ra ǀgore; xaweb ge ti ǁnâuǃāba ǂûtani tama hâ.

¹⁵Matisa kha ǁnâi? Gagas ǀkha ta nî ǀgore, tsî ta ge ǁkhāti ǁnâuǃāb ǀkha nî ǀgore; gagas ǀkha ta nî ǁnae, tsî ta nî ǁkhāti ǁnâuǃāb ǀkha ǁnae.

¹⁶ǁNātits ga dī tama io, mati i kha nî ǁkhāǁkhāhe tama khoe-i ǃās ǃnâ hâ-e, gagas ǀkhats ga gangan ǃnubai, sa gangans ai Amensa mî, tare-ets ra mîsa-i a ǀū amaga?

¹⁷Sats ge ama ǃgâise ra gangan, xawe nau-i ge ǂnubikhâihe tama hâ.

¹⁸Ti Eloba ta ra gangan, sadu hoadu ǂamai ta nammi ǀkha ra ǃhoa ǃkhaisa.

¹⁹Xawe ta ǀhaohâb ǃnâ koro mîde ti ǁnâuǃāb ǀkha mî ǂgao hâ, nauna ta nî ǁkhāǁkhāse, disiǀoadisi mîde nammi ǀkha ǃhoas xa.

²⁰ǃGâsado, tā ǀgôa kai re ǁnâuǃāb ǃnâ; î du ǂkhabab ǃnâ ǀgôa kai re, î du ǁnâuǃāb ǃnâ ao kai re.

²¹ǂHanub ǃnâ xoamâihe hâ: “ǀKhara namgu ǀkha tsî ǀkhara amǁgaugu ǀkha ta ge nē ǁaes ǀkha nîra ǃhoa, xawen ge ǁkhāti ǁnāti ǁnâu te tide, tib ra ǃKhūba mî,” ti.

²²O gu ge namga saose ība ǂgomsana tama i, tsî ǂgomoǃnâna; tsî kēbosis ge saose ība, ǂgomoǃnâna tama i, tsî ǂgomsana.

²³Tsî ǀhaohâb hoab ga ǀguipa ǀhûo, tsîn ga hoatsama ǃhao namgu ǃnâ ǃhoao, tsî i ga ǁkhāǁkhāhesa tama-i kas, ǂgomoǃnâ-i kas hoasa ǂgâxao, ǃkhau du hâ, tin kha mî tide?

²⁴Xawe hoan ga kēbo, tsî i ga ǁkhāǁkhāhesa tama-i kas, ǂgomoǃnâ-i kasa ǂgâxao, o i nî hoan xa ǃhoagaobahe, o i nî hoan xa ǀgoraǃgâhe.

²⁵O gu nî ǁnāti ǂganǃgâsigu ǁî-i ǂgaob diga ǂhai; o i nî ǁnāti ǁî-i ais ai ǁnāǁgoe, tsî nî Eloba ǀgorelî tsî nî ǁguiǁnâ, Elob amase sadu ǃnâ hâ ǃkhaisa.

²⁶Matisa kha ǁnâi, ǃgâsado? ǀHû du karao, mâ-i hoa-i âdo, psalm-e i ga ūhâo, ǁkhāǁkhā-e i ga ūhâo, namga i ga ūhâo, ǂhaiǂhaisi-e i ga ūhâo, ǁguiǃā-e i ga ūhâo, an hoana ǂnubikhâis ǃoa ī.

²⁷Tsî khoe-i ga nammi ǀkha ǃhoao, an ǀgamǀgameses karao, ǃnonaǃnonabeses karao, saogubes ai ǃhoa, î-i ǀgui-e ǁguiǃā.

²⁸Tsî ǁguiǃā-ao-i ga hâ tama io, a-i ǀhaohâb ǃnâ ǃnō; a-i ǁî-aitsama ǃhoabasen, tsî Elob tsîn ǃoa.

²⁹Tsî kēbo-aoga a gu ǀgamǀgamese, ǃnonaǃnonabese ǃhoa, în nauna ǀgora;

³⁰tsî ǀnîb, ǁnāpa ǂnôab ga ǂhaiǂhaisi-e hō, ab ǂguroba ǃnō.

³¹Hoadu ge saogubes ai a kēbo ǁkhā xui-ao, hoan nî ǁkhāǁkhāhese, tsî hoan nî ǁnamahese.

³²Tsî kēbo-aogu di gagadi ge kēbo-aogu ǃnaga māsen hâ.

³³Elob ge ǃkhaerasib di Elo tamaba xui-ao, xaweb ge a ǂkhîb di Elo.

³⁴ǁNās ǁkhās xase a di sadu tarade ǀhaohâb ǃnâ ǃnō; ǃhoasa di mā-amhe tama hâ xuige, tsî di ge mîmāhe hâ, ǃnaga di nî hâsa, ǂhanub on ra mî khami.

³⁵Tsî xū-e di ga ǁkhāǁkhāsen ǂgao-o, a di oms tawa ǁîdi aogu ǂûga dî; anu tama i kom hâo taradi tawa, ǀhaohâb ǃnâ ǃhoasa.

³⁶Elob mîsa sado xus ge ǂoa? Sadu ǀgui du ǃoas kha ge sī?

³⁷Khoe-i ga ǂâi, kēbo-ao i a tamas ka io, gagasi i a ǃkhaisa, a-i mûǂan, sado ta ra xoaban a ǃKhūb di mîmā ǃkhaisa;

³⁸tsî khoe-i ga ǁîsa mûǂan ǂgao tama io, o i ge ǁî-i ona ǂanǃgâhe tide.

³⁹ǁNā-amaga, ǃgâsado, kēbo du nîsa ǃhaeǃgon, î du nammi ǀkha ǃhoasa tā ǃkhâi.

⁴⁰Xawe an xūn hoana anu hâse tsî ǃamkuse dīhe.