Read Khoekhoegowab 1 Korinteǁîn 15 Bible Online

1 Korinteǁîn 15 - Khoekhoegowab bible

1 Korinteǁîn 15

¹Tsî ta ra ǂanǂan du, ǃgâsado, ǁnā ǃgâiǂhôas, ǁîsa ta sado gere aoǁnâbas, ǁîsa du ge ǁkhāti ǃkhōǃoas, ǁîs ǃnâ du ǁkhāti mâs,

²ǁîsa xu du ǁkhāti nîra ǃgâiǃōsa, ǁîsa ta ge aoǁnâba du dommi ai du ga ǁîsa ūhâbaseno; ǁnāti i ga i tama io, ǁause du ge ǂgom ǃkhaisa.

³ǂGurosa ta ge tita sado ge māǁnâ, tita tsîn ge ǃkhōǃoa-e, Xristub ge sada ǁoren ǃaroma ǁō ǃkhaisa, xoadi ǃoa;

⁴tsîb ge ǁkhōhe, tsîb ge ǃnonaǁî tsēs ai khâi ǃkhaisa, xoadi ǃoa;

⁵tsîb ge Kefab xa mûhe ǃkhaisa, ǁnās khaoǃgâ disiǀgamǀagu xa;

⁶ǁnās khaoǃgâb ge ǀgui ǃnās ai korokaidisisa ǃnā hâ ǃgâsadu xa ge mûhe, kai-am ǃâs ân nēsis kōse hâna, tsî ǀnîn ge ǁkhāti ǀnai a ǁōna;

⁷ǁnās khaoǃgâb ge Jakobub xa ge mûhe, ǁnās khaoǃgâ apostelgu hoagu xa;

⁸tsî hoan ǀunis aib ge ǁkhāti tita, ǁaeb ai ǃnae tama ta xa ge mûhe.

⁹Tita ge apostelgu hoagu xa ǂkharita, tita apostelse ǂgaihesa anu tama ta, Elob di ǀhaohâba ta gere ǃgôaǃgon amaga;

¹⁰xawe Elob di ǀkhomma xu ta nē ta īse ī, tsî ǀkhommi âb ge tita tawa ǁause ī tama ge i; o ta ge ǁîgu hoagu xa ǃnāsase gere sîsen; tsî tita ge ǁîsa dī tama, xawe Elob ǀkhommi, tita ǀkha hâb ge ǁîsa ge dī.

¹¹O tita karao, ǁîgu karao, ǁnāti ge ge ra aoǁnâ, tsî ǁnāti du ge ge ǂgom.

¹²Tsî Xristub ga aoǁnâheo, ǁō hâna xub ge khâi ǃkhaisa, matin ǁnâi ǀnîn âdo a mî ǁkhā, ǁō hân khâis hâ tamasa?

¹³Tsî ǁō hân khâis ga ī tama io, ob ge Xristub ona khâi tama hâ.

¹⁴Tsî Xristub ga khâi tama io, os ge sige aoǁnâsa a ǁau, os ge ǁkhāti sadu ǂgomsa a ǁau;

¹⁵o ge ga ǁkhāti sige Elob di ǂkhaba ǀhûǀguitimî-aose hōhe, Elob xa ge ge ǃkhō-am xui-ao, Xristubab ge ǂkhaiǂkhai ǃkhaisa, ǁîbab ǂkhaiǂkhai tamaba, ǁō hân ga khâi tama io.

¹⁶Tsî ǁō hân ga khâi tama io, ob ge Xristub ona khâi tama hâ.

¹⁷Tsî Xristub ga khâi tama hâ io, os ge sadu ǂgomsa a ǁau, o du ge gorose sadu ǁoren ǃnâ hâ;

¹⁸on ge ǁkhāti Xristub ǃnâ ge ǁōn ona ge kāǁō.

¹⁹Nē ûihâb ǀguib ǃnâ ta ga Xristub ǃnâ ǃâubaseno, o da ge khoen hoan xa a ǀkhomǀkhomsa khoe.

²⁰Xaweb ge nēsi Xristuba ǁō hâna xu khâi hâ, tsîb ge ǁō gen di ǂguro kai.

²¹ǀGui khoeba xub ge ǁōba hâ amagas ge ǁkhāti ǁō hân khâisa ǀgui khoeba xu hâ.

²²Adammi ǃnân ra hoana ǁō khamin ge ǁkhāti hoana Xristub ǃnâ nîra ûi-ûihe xui-ao.

²³Tsî mâ-i hoa-i ǁî-i saogub ai: ǂGurob ge Xristuba, ǁnās khaoǃgâ Xristub dina, hās âb ǃnâ.

²⁴ǁNās khaoǃgâs ge ǀamsa nîra hā, gaosibab ga Elob ǁGûba māǁnâ ǃnubai, hoa ǂamkhoesib tsî ǁkhāsib, tsî ǀgaib tsînab ga hîkākā ǃnubai.

²⁵ǁÎb ge nî gaosîsen xui-ao, ǁîb di khākhoen hoanab nîra ǁîb ǂaira ǃnaga ǁguis kōse.

²⁶ǀUni khākhoeb, hîkākāhe nîb ge ǁōba.

²⁷Hoanab ge ǁîb di ǂaira ǃnaga mâi xui-ao. Tsî hoan ǁîb ǃnaga mâihe hân ga mîo, o i ge a ǂhaisa, hoana ǁîb ǃnaga ge mâib a ǃkhōǂuihesa ǃkhaisa.

²⁸Tsî hoan ga ǁîb ǃnaga hâ, ǃnubaib ge ǀGôab ǂûb ona hoana ǁîb ǃnaga ge mâiba nîra ǃnaga hâba, îb Eloba hoan ǃnâ hū ti.

²⁹ǁNā tamas ga io, tare-en ǁnâi ǁnāna ra dī, ǁō hân ǂama ra ǁāǁnâkaisenna, ǁō hân ga khâi tama io? Tarexan kha ǁō hân ǂama ra ǁāǁnâkaisen?

³⁰Tsî tarexa ge ǁkhāti sige mâ iri hoaba tsūǃgâb ǃnâ hâ?

³¹Tita ge tsēkorobe ra ǁō ta, ǁîsa ta sige koasens Xristub Jesub sada ǃKhūb ǃnâ ta ūhâs tawa ra mî.

³²Khoe-i dommi ai ta ga Efesus tawa ǀgurun ǀkha ǃkham hâo, mâ xū-e i kha nî harebeba te? ǁŌ hân ga khâi tama io: “A da ǂû, î da ā; ǁari da nî ǁō xuige!”

³³Tā ǁhapu re: “ǂKhaba ǃhoa-ūgu-aidi ge ǃgâi ǂūga ra ǁgaoǁgao.”

³⁴Î du ǀguia ǂhanuse ǂkhaikhâi, î du tā ǁore; ǀnîn ge Elob ǂansa ūhâ tama hâ; taos ase ta ǁîsa ra mîba du.

³⁵Xawe: Matin kha ǁō hâna nî khâi? ti i ga khoe-e mî; tsî mâ soro-i ǀkhan kha nî hā?

³⁶Gâretse, tsorots ra-i kom ûi tideo, aibe i ga ǁō tama io.

³⁷Tsî tsorots ra-i ǀkhats kom ī nî sorosa tsoro tamao, tsîts kom ǃkhom-i ǀgui-e ra tsoro-o, ǃhorob di-i kas, nau ǃkhomǃnôan kas hoasa.

³⁸Tsîb ge Eloba ǁî-e ǂgaob ra khami ī soro-e ra mā, tsîb ge mâ ǃkhomǃnôa-i hoa-e ǁî-i soros ǂûsa ra mā.

³⁹ǁGans hoas ge ǁkhā ǁgan tamasa; xawe ǀkhara ǁgan-i ge khoen di-e, ǀkhara ǁgan-i ge ǀgoan di-e, ǀkhara-i ge ǁaun di-e, ǀkhara-i ge anin di-e.

⁴⁰Tsî di ge ǀhomsi sorode hâ, tsî di ge ǃhūsi sorode hâ; xawe ǀkhara ǂkhaisi-i ge ǀhomsi sorodi di-e; tsî ǀkhara ǂkhaisi-i ge ǃhūsi sorodi di-e.

⁴¹ǀKhara ǂkhaisi-i ge sores di-e, ǀkhara ǂkhaisi-i ge ǁkhâb di-e, ǀkhara ǂkhaisi-i ge ǀgamiron di-e; ǀgui ǀgamiro-i ge nau ǀgamiro-e ǂkhaisib ǃnâ ra ǃnā xui-ao.

⁴²ǁNās ǁkhās khamis ge ǁkhāti ǁō hân di khâisa nîra ī. ǁGaoǁgaosa xūse i ra tsorohe, tsî i ge ǁgaoǁoasa xūse nîra khâi.

⁴³ǃGôao xūse i ra tsorohe, tsî i ge ǂkhaisib ǃnâ nîra khâi; ǂkhabusasib ǃnâ i ra tsorohe, tsî i ge ǀgaib ǃnâ nîra khâi.

⁴⁴ǂŪsi soro-i ra tsorohe, tsî i ge gagasi soro-e nîra khâi. ǂŪsi soro-i hâ, tsî gagasi soro-i hâ.

⁴⁵ǁNāti i ge ǁkhāti xoamâihe hâ: “ǂGuro khoeb Adammi ge ûitsama ǀom kai;” ǀgamǁî Adammi ge ûi-ûi ra Gaga kai.

⁴⁶Tsî ǂguro tamas ge gagasi sorosa, xawe ǂūsi soros ge a ǂguro; ǁnās khaoǃgâ gagasisa.

⁴⁷ǂGuro khoeb, ǃhūbaiba xu hâb ge a ǃhūb di; ǀgamǁî khoeb ge ǀhomma xu hâ ǃKhūba.

⁴⁸ǃHūb dib īs ǁkhās khamin ge ǃhūb dina ī; tsî ǀhommi dib īs ǁkhās khamin ge ǁkhāti ǀhommi dina ī.

⁴⁹Tsî ǃhūb dib di īsiba da gere tanis ǁkhās khami da ge ǁkhāti ǀhommi di īsiba nîra tani.

⁵⁰Tsî nēsa ta ra mî, ǃgâsado, ǁgans tsî ǀaob tsîra ge Elob gaosiba a ǀumi ǁoa ǃkhaisa, tsî ǁgaoǁgaosib ge ǁgaoǁoasiba a ǀumi ǁoa ǃkhaisa.

⁵¹Mû, ǂganǃgâsi-e ta sado ra mîba: Hoada ge ǁō tide, xawe da ge hoada nîra ǀkharaǀkharahe.

⁵²ǃNubu ǁaerob ǃnâ, ǀgui mûsǀapirob ǃnâ, ǀuni ǀgapadas ra ǀō hîa; ǀgapadas ge nîra xâihe xui-ao, on ge ǁō hâna ǁgaoǁoasase nîra khâi, o da sada nîra ǀkharaǀkharahe.

⁵³Nē ǁgaoǁgaosib nî ǁgaoǁoasiba ana tsî nē ǁōǁkhāsib nî ǁōǁoasiba ana xui-ao.

⁵⁴Tsî nē ǁgaoǁgaosib ga ǁgaoǁoasiba ana ǃnubai, tsî nē ǁōǁkhāsib ga ǁōǁoasiba ana ǃnubais ge xoamâihe hâ mîsa nîra ǃnae:

⁵⁵ǁŌb ge ge harahe dansa ǃoa. “ǁŌtse, mapas sa dansa hâ? ǁŌtse, mapab sa ǃkhāǁkhūba hâ?”

⁵⁶ǃKhāǁkhūb ǁōb dib ge ǁoreba; tsî ǀgaib ǁoreb dib ge ǂhanuba.

⁵⁷Ab Eloba ganganhe, dansa sada ge māba sada ǃKhūb Jesub Xristuba xu.

⁵⁸ǁNā-amaga, ti ǀnamǀnamsa ǃgâsado, mâhō, ǁnobeǁoasase, î du ǃaruǀîǀgui ǀaro ǃKhūb di sîsenni ǃnâ, sadu sîsenni ǃKhūb ǃnâ ǁau tama ǃkhaisa du a ǂan xuige.