Read Khoekhoegowab 1 Korinteǁîn 16 Bible Online

1 Korinteǁîn 16 - Khoekhoegowab bible

1 Korinteǁîn 16

¹Tsî ǃanun ra dībahe ǀhaoǀhaos xa, Galateǁîn ǀhaohâga ta ge mîmās ǁkhās khami sadu ona dī.

²Mâ ǂguro tsēs wekheb dis ai a-i mâ-i hoa-i âdo xū-e ǁî-i tawa ǁguibē, î-i ǁui-e ǀhaoǀhao, ǃgâise i hō ǁkhās kōse, îs ǀhaoǀhaosa tā ǁnāpa ta ga sī ǃnubai ǀgui ī.

³Tsî sī ta ka, o ta ge ǂgomǂgomsase du ga ǃgôa khoena ǂkhanidi ǀkha nî sî, sadu ǀkhaeban nî Jerusalems ǃoa ūsīga.

⁴Tsî ǂhâbasa i kao, tita tsîn nî ǃgûsa, on ge tita ǀkha nî ǃgû.

⁵Tsî ta ge sadu tawa nî sī, Masedoniaba ta ga ǃgûǃganuo; Masedoniaba-ū ta nî ī xui-ao.

⁶O ta ge ǀnîsi sadu tawa nî hâro, ǀnîsi ta nî saoba hâǂui, ǁnū te du nîga, ǃgû ta ka ǃkhai-i hoa-i ǁga.

⁷ǃGû-īs ǀguis ǃnâ ta mû du ǂgao tama xui-ao; o ta ra ǃâubasen, ǃKhūb ga mā-am te, ǁaeba ta nî sadu ǀkha hâsa.

⁸Xawe ta ge Efesus tawa nî hâ pinkstertsēs kōse.

⁹Kai tsî ǀgaisa dao-am-e ta ǁkhowa-ambahe hâ xui-ao, tsî mâǃoa-aon ge a ǂgui.

¹⁰Tsî Timoteub ga sī, kō, îb ǃaob ose sadu ǀkha hâ; ǃKhūb di sîsennab ra tita ǁkhā ta khami dī xuige.

¹¹A i khoe-i xare-e ǁîba tā ǃharaxū; î du ǂkhîb ǃnâ ǁîba ǁnū, tita tawab nî hāga; ǃgâsagu ǀkha ta ra ǃâu bi xuige.

¹²Tsî ǃgâsab Apolob xa ǂan, kaise ta ge ǀkhoma bi, ǃgâsagu ǀkhab nî sadu tawa sī ǃkhaisa; xaweb ge hoaragase ǂâibasen tama ge hâ i, nēsib nî sīsa; xaweb ge nîra sī, ǃgâiba bi i ga ǃnubai.

¹³ǂKhaikari hâ, ǂgoms ǃnâ mâ, aose tanisen, î du ǀgai.

¹⁴An sadu xūn hoana ǀnammi ǃnâ ī.

¹⁵Tsî ta ra ǁnama du, ǃgâsado, Stefanab di omma du ge a ǂan, Axajab di ǂgurob a ǃkhaisa, tsî ǁî-aitsaman, ǃanuna ǃoaba-aose ge māsen ǃkhaisa;

¹⁶î du sadu ona nēti īna ǃnaga māsen, tsî sîsen ǀhao rab tsî ǀhupuǀhupusen rab hoaba.

¹⁷Tsî ta ra ǃgâiaǂgao, Stefanab tsî Fortunatub tsî Axaigub tsîgu di hās ǂama; sado ta ra ǁkhui soasa gu ge ǁîga ǀoaǀoa xui-ao.

¹⁸Ti gagasa gu ge khoakhoa, tsî sadu dis ona. Nēti īga ǂanǃgâ!

¹⁹Asiab ǃnâ hâ ǀhaohâgu ra tawede du. Kaisen ra tawede du ǃKhūb ǃnâ: Akwilab tsî Prisilas tsîra tsî ǁîra oms ǃnâ hâ ǀhaohâba.

²⁰ǃGâsagu hoagu ra tawede du; tawedegu du re ǃanu ǁoa-i ǀkha.

²¹Tawede du ta ra, tita Pauluta, ǃommi ǀkha.

²²Khoe-i, ǃKhūb Jesub Xristuba ǀnam tama-i, ǁnā-i ge ǀâxarexūhe hâ; Sada ǃKhūb ra hā.

²³ǀKhommi ǃKhūb Jesub Xristub diba ab sadu ǀkha hâ!

²⁴Ti ǀnamma ab Xristub Jesub ǃnâ sadu hoadu ǀkha hâ! Amen.