Read Khoekhoegowab 1 Korinteǁîn 3 Bible Online

1 Korinteǁîn 3 - Khoekhoegowab bible

1 Korinteǁîn 3

¹Tsî tita ge ǁkhā tama ge hâ i, ǃgâsado, gagasidu ase sadu ǃoa ǃhoasa, xawe ǁgans didu ase, Xristub ǃnâ ǂkham ǀgôarose īdu ǃoa.

²Dai-e ta ge āsi du, tsî ta ǀgaisa ǂû-e mā du tama, ǁîsa du ge ǁkhāba tama hâ i xui-ao; tsî amase, nēsis kōse xawe du komo ǁîsa ǁkhāba tamao,

³ganupe du a ǁgans di xui-ao. Surib tsî ǂnoagus tsî ǁhaiǃādi tsîn sadu ǃnâ hâ, hîa du kha ǁgans di tama, tsî du kha ǁgans ǃoa tanisen tama hâ?

⁴Nē-i ga mî: Tita ge Paulub di ta tsî nau-e: Tita ge Apolob di ta, ǁnâi ǁgans di tama du hâ?

⁵Tariba kha Pauluba? Tsî tariba kha Apoloba? ǃOabasabekha ge ǁîkha, ǁîkha xu du ge ǂgomsa kai kha; tsî kha ge ǁîsa ge dī, ǃKhūb ge mâb hoaba ǀkhae khami.

⁶Tita ge ge ǂgā, tsî Apolob ge ge ǂnâ; xawe Elob ge ǁîsa ge ǀom kai.

⁷Ob ge xū tama, ǂgā rab karao, ǂnâ rab karao; xawe Elob, ǀom kai rab ǀguib.

⁸Tsî ǂgā rab tsî ǂnâ rab tsîkha ge a ǀgui; tsî mâb hoab ge ǁîb di amǃnâsa ǁîb di sîsenni ǂûb ǃoa nîra ǃkhōǃoa.

⁹Elob di ǀhaosîsenao khom ge sikhoma; sadu ge a Elob di ǃhana-ai, sadu ge a Elob di om.

¹⁰Elob di ǀkhommi, tita māhe hâba ǃoa ta ge gā-ai omkuru-aose ǃgaoǃgaoba ge ǁgui, tsî ǀnîb ge ǁîb ai nî om; ab mâb hoaba kō, matib ra ǁîb ai om ǀgausa.

¹¹ǀNî ǃgaoǃgao-e-i khoe-i xare-e a ǁgui ǁoa xui-ao, ǁguihe hâb ǀguib, ǁnāb ge Jesub Xristuba.

¹²Tsîb ga khoeba nē ǃgaoǃgaob ai om ǃhuniǀurib, tsî ǀhaiǀurib, tsî ǃgomǀgausa ǀuidi, tsî hain tsî ǀgân tsî ǃhoroǃgaodi tsîn ǀkha,

¹³ob ge mâb hoab di sîsenna nîra ǂhai; ǁnā tsēs kom nîra ǂhaiǂhai bio, ǀaes ǀkhab nîra ǂhaiǂhaihe xui-ao, tsî matib mâb hoab di sîsenna ī ǃkhaisas ge ǀaesa nîra ǃâitsâ.

¹⁴Khoeb di sîsenni ga hâhâo, ǁîb aib ge omma, ob ge amǃnâ-e nîra ǃkhōǃoa.

¹⁵Tsî khoeb di sîsenni ga khauǃkhūheo, ob ge amǃnâsa nîra ǂoaǃnâ; xaweb ge ǁîb ǂûba nîra sâuhe ǀaes ǀkhas axase.

¹⁶ǂAn tama du kha hâ, Elob di tempel du a ǃkhaisa, tsî Elob Gagab sadu ǃnâ ǁan hâ ǃkhaisa?

¹⁷Elob di tempela ga ǀuriǀuri-i, ǁnā-eb ge Eloba nîra ǀuriǀuri; Elob di tempeli ge a ǃanu xui-ao, tsî sadu ge a ǁî.

¹⁸A-i tā khoe-e ǁî-aitsama garasen, khoe-i ga sadu ǃnâ ǂâi, gā-ai- i a ǃkhaisa nē ǃhūbaib ai, a-i gâre, gā-ai-i nîga.

¹⁹Nē ǃhūbaib di gā-aisib Elob tawa gâresise i xui-ao. Xoamâihe hâ amaga: “Gā-ainab ra ǃkhō ǁîn di gāxaǃnâsib ǃnâ,” ti.

²⁰Tsî ǁkhawa: “ǃKhūb ge gā-ain di ǂâide a ǂan ǁau di a ǃkhaisa,” ti.

²¹ǁNā-amaga a-i tā khoe-e khoen ai koasen, hoa xūn a sadu di xuige:

²²Paulub karao, Apolob karao, Kefab karao, ǃhūbaib karao, ûib karao, ǁōb karao, hâ a xūn karao, ǃgoaxa xūn karao; ǁîn hoan ge a sadu di.

²³Xawe du ge sado a Xristub di, tsîb ge Xristuba a Elob di.