Read Khoekhoegowab 1 Korinteǁîn 4 Bible Online

1 Korinteǁîn 4 - Khoekhoegowab bible

1 Korinteǁîn 4

¹ǁNāti īge ase, a-i mâ-i hoa-e sige ūhâ: Xristub di ǃoabasabese tsî Elob di ǂganǃgâsigu di mûǂamaose.

²Tsî ǃaruǀî mûǂamaogu ra ǂgaoǀkhāhe, mâb hoab nî ǂgomǂgomsase hōhe ǃkhaisa.

³Tsî i ge tita xūba tama, sadu xa ta ra ǀgoraǃgâhe ǃkhaisa, tsî khoesi ǀgoraǃgâ-i hoa-i xa ta ra ǀgoraǃgâhe ǃkhaisa; ā, tita ge ǁî-aitsama ǁkhāti ǀgoraǃgâsen tama hâ.

⁴Xū-i xare-e ta tita ǂan tama; xawe ta ge ǁîs ǀkha ǂhanu-ai kaihe tama hâ; tsî ǃKhūb ge tita nîra ǀgoraǃgâba.

⁵ǁNā-amaga tā ǀgoraǃgâ, ǁaeb hā tama hâ hîa, ǃKhūb nî hās kōse, ǁîb ǁkhāti ǂganǃgâsana ǃkhaenaba xu ǃnâb ǃoa nîra ūhāb, tsî ǂgaogu di ǀapeǀape-aide nîra ǂhaiǂhaiba; o i ge mâ-i hoa-e ǁnāǃnubai Eloba xu karesa nîra hō.

⁶Tsî nēsa ta ge, ǃgâsado, tita ǂûta tsî Apolob tsîkhom ai ǂkhō-ais ase go mî sadu ǃaroma, sikhom tawa du nî ǁkhāǁkhāsenga, xoahe hâs ǂamai du ūhâsen tide ǃkhaisa; î du tā ǀnî-e nau-i ǂama khūkhūsen ǀguib âkhom ǃaroma.

⁷Tari-e satsa aiǂhanuba ra mā? Tsî tare-ets ūhâ, ǃkhōǃoa tamats hâ-e? Tsîts ga ǁî-e ǃkhōǃoa hâo, matits kha ǁnâi ra koasen, ǃkhōǃoa tamats hâs ǁkhās khami?

⁸ǀNai du ǁâ hâ, ǀnai du ǃkhū hâ; sige ose du gere gao; tsî amase, î du ga gao, sige on nî sadu ǀkha gaoǀhaose.

⁹Nēti ta ra ǂâi xui-ao, Elob ge sige apostelge ǀams ai ǁōba anu hâse mâi ǃkhaisa; ǃgapaǀîxū kaiba ge ge sige ǃhūbaib tsî ǀhomǃgāgu tsî khoen tsîna xui-ao.

¹⁰Sige ge a gâre Xristub ǃaroma, tsî sadu ge a gā-ai Xristub ǃnâ; sige ge a ǂkhabusa, tsî sadu ge a ǀgaisa; sadu ge a mûhesa, tsî sige ge a ǃharaxūsa.

¹¹Nē iri kōse ge ge ǃâs tsî ǁgâs xa ra tsâ, tsî ge ge a ǀōǀkhā, tsî ge ge ra ǂnauhe, tsî ge ge a hâǃkhaio;

¹²tsî ge ge sige ǃomgu ǂûgu ǀkha ǃgomse ra sîsen; ǀauhe ge ra, xawe ge ra ǀkhae; ǃgôaǃgonhe ge ra xawe ge ra taniǀnam;

¹³ǃkhāǃkhāhe ge ra xawe ge ra ǀgore; ǀnapuǂuihe ra xū-i ǃhūbaib di-i ase ge go ī, tsî hoan di ǁkhâuǁnâxūse nēsis kōse.

¹⁴Sado ta nî taotaose ta nēna xoa tama hâ, xawe ti ǀnam ǀgôadu ase ta ra ǁnama du.

¹⁵Disiǀoadisi ǁkhāǁkhā-aoga du ga Xristub ǃnâ ūhâ, xawe du ǂgui ǁgûga ūhâ tama xui-ao; tita kom Xristub Jesub ǃnâ sado ge ôao ǃgâiǂhôas ǃnâ-ū.

¹⁶ǁNā-amaga ta ra ǁnama du: Ti ǁgaeǁgae-ao kai re ti.

¹⁷ǁNā-amaga ta ge Timoteuba sadu ǃoa ge sî, ti ǀnamǀnamsa tsî ǂgomǂgomsa ǀgôaba ǃKhūb ǃnâ, ǂâiǂâi ǃnâ dub nîga ti daogu Xristub ǃnâ hâgu xa, ǀhaohâgu hoaga ta mâ ǃkhai-i hoa-i ai ra ǁkhāǁkhā khami.

¹⁸Sadu tawa ta sī tide xū-i khamin ra ǀnîna khūkhūsen;

¹⁹xawe ta ge ǃhaese sadu tawa nî sī, ǃKhūb ga ǂgao-o, o ta ge nî ǁnâuǃā khūkhūsen ran di mîde tama i, tsî ǁîn di ǀgaiba;

²⁰Elob gaosib mîs ǃnâ mâ tama i, tsî ǀgaib ǃnâ mâ xui-ao.

²¹Mati du kha ra ǂgao? Haib ǀkha ta sadu tawa nî sī? ǀNammi tsî tsamtsiǃnâ gagas ǀkha ta nî sī?