Read Khoekhoegowab 1 Korinteǁîn 5 Bible Online

1 Korinteǁîn 5 - Khoekhoegowab bible

1 Korinteǁîn 5

¹Mâ ǃkhai-i hoa-i ai i ge ra ǁnâuhe, ǀaib sadu ǃnâ hâsa, tsî ǁnāti ī ǀai-ai-i, ǀūben xawen ǃnâ ǂgaihe tama-e, ǀguib ǁgûb âb di tarasa ūhâ ti.

²Tsî du kha ganupe ra khūkhūsen ǁîs ǂama du nî ǃhausens ǃās ǃnâ, îb ǁnā sîsenna ge dība sadu ǁaeguba xu ūbēhe ti?

³O ta ge tita, soros ǀkha ta a ǀkhai xawe gagas ǃnâ ǁnāpa hâ ta axase ǀnai go ǂâibasen, ǁnāpa ta hâs ǁkhās khami ta ge nē ǃkhaisa ge dība:

⁴Sada ǃKhūb Jesub Xristub di ǀons ǃnâ, sadu tsî ti gagas tsîn ga ǀhû ǃnubai, sada ǃKhūb Jesub Xristub di ǀgaib ǀkha.

⁵ǁNāti ība Satanna māǁnâsa, ǁgans di ǁgaoǁgaohesa ǃoa, gagas nî sâuhega, ǃKhūb Jesub di tsēs ai.

⁶Sadu koasens ge ǃgâi tama hâ. ǂAn tama du kha hâ, ǂkhari ǀkhuruǀkhuruperero-i ǀâpereb hoaba ra ǀkhuru kai ǃkhaisa?

⁷ǁNā-amaga ǀoro ǀkhuruǀkhurupereba ǃanuǃanuǂuiǃnâ, ǀasa ǀâpere kai du nîga, ǀkhuruoǃnâ du a khami; sada Pasxaǁkhaob on ge sada ǂābahe xuige, ǁnāb ge a Xristu.

⁸A da ǁnâi Pasxakaitsēsa tsēdī ǀoro ǀkhuruǀkhurupereb ǀkha tama, tsî ǁkhāti ǁoreb tsî ǂkhabab tsîkha di ǀkhuruǀkhurupereb ǀkha tama, î da dī ǀkhuruoǃnâ peregu ǂhauǃnâsib tsî amab tsîkha digu ǃnâ.

⁹Nau ǂkhanis ǃnâ ta ge sado ge xoaba, ǀai-aon ǀkha du habagu tide ǃkhaisa.

¹⁰ǁNāti ta mî tama, hoaragase du nē ǃhūbaib di ǀai-aon, tsî xūǃgunuxan, tsî ǁkhâuǁnâ-aon, tsî ǁgôatsuiǁgoana ra ǃoaban tsîn ǀkha habagu tidesa; ǁnās karao, o du nî ǃhūbaiba xu ǂoa.

¹¹Xawe ta ge sado ge xoaba, habagu du tidesa, khoe-i ga ǃgâsase ǂgaisen, tsî i ga ǀai-ao, xūǃgunuxa, ǁgôatsuiǁgoaǃoaba-ao, ǃkhāǃkhā-ao, ǀhorosemâ tsî, ǁkhâuǁnâ-ao-o: ǁNāti ī-i ǀkha du ǂûs xawesa hî tide ti.

¹²Tare-e ta ǃauga hân ǀkha ǁae hâ, o ta ǁîna nî ǀgoraǃgâ? Sado kha sadu ǀhaohâb dina ǀgoraǃgâ tama du hâ?

¹³Xawe ǃauga hânab ge Eloba nîra ǀgoraǃgâ. Nē ǂkhaba khoeba sadu ǁaeguba xu ǂoa kai.