Read Khoekhoegowab 1 Korinteǁîn 6 Bible Online

1 Korinteǁîn 6 - Khoekhoegowab bible

1 Korinteǁîn 6

¹Mati i kha khoe-i âdu, nau-i ǃoagu ǂharuguǃkhai-e ūhâ-e a hîtsâ ǁkhā, ǂhanuoǃnân xa ǂhanu-aikaisensa, tsî tare xū-i ǃaroma ǃanun xa tama?

²ǂAn tama du kha hâ, ǃanun nîra ǃhūbaiba ǀgoraǃgâ ǃkhaisa? Tsî sadu xab ga ǃhūbaiba ǀgoraǃgâheo, ǁnâi ǁkhā tama du hâ, hoan xa ǂkhari ǂhanuǃkhairode ǀgorasa?

³ǂAn tama du kha hâ, ǀhomǃgāga da nîra ǀgoraǃgâ ǃkhaisa? Matikōse da nēs ǃgâ-ai nē ǃhūbaib dina a ǀgoraǃgâ ǁkhā?

⁴Nē ǃhūbaib din ǂama du ga ǂnoaguo, o du ge ǀhaohâb ǃnâ ǃharaxūhesase īna ū, tsî ǁîn ǂama nî mâi.

⁵Taob ase ta nēsa ra mîba du. Okha ǁnâi sadu ǃnâ i ǀgui-i xare-e hâ tama hâ, gā-ai-e? ǀGui-i xawe-e hâ tama hâ, ǁî-i ǃgâsan ǁaegu a ǀgoraǃgâ ǁkhā-e?

⁶Ob ge nē ǃgâsaba nau ǃgâsab ǀkha ra ǂnoagu ǂgomoǃnân aiǃâ.

⁷Tsî i ge hoaragase tsū ǂū-e sadu ǃnâ hâ, ǂhanub ǂnoagu-aide du ūhâbagu hâ ǃkhaisa. Tarexa du ǁnās ǃgâ-ai ǂkhababa taniǀnam tama hâ? Tarexa du ǁnās ǃgâ-ai ǂkhôa-e taniǀnam tama hâ?

⁸Xawe du ge sado ǂkhababa ra dī, tsî ǂkhôasa ra dī, tsî du ge ǁîsa ǃgâsan ǃoagu ra dī.

⁹ǁNâi ǂan tama du kha hâ, ǂhanuoǃnân gaosib Elob diba ǀumi tide ǃkhaisa? Tā ǁhapu re: ǀAi-aon karao, ǁgôatsuiǁgoana ra ǃoaban karao, ǃgameba ra khôan karao, ǁgaiǁgaisana ra dīn karao, aoregu ǀkha ra ǁgoegu karao,

¹⁰ǃnari-aon karao, xūǃgunuxan karao, ǀhorosemân karao, ǃkhāǃkhā-aon karao, ǁkhâuǁnâ-aon karao, ǁîn ge Elob gaosiba ǀumi tide.

¹¹Tsî ǁnātin ge ǀnîn âdo ge ī i; xawe du ge ge ǁāhe, xawe du ge ge ǃanuǃanuhe, xawe du ge ge ǂhanu-ai kaihe ǃKhūb Jesub Xristub di ǀons ǃnâ, tsî sada Elob di Gagab ǃnâ.

¹²Hoa xūna ta mā-amhe hâ; xawen ge hoana harebe tama hâ. Hoa xūna ta mā-amhe hâ; xawe ta ge ǀgui-i ân xa gaobakaisen tide.

¹³ǂÛn ge ǃnāba hâba, tsî ǃnāb ge ǂûna hâba; xawe Elob ge nēb tsî naun tsîna nîra hîkākā. Tsî soros ge ǀaiba hâba tama i tsî ǃKhūba hâba, tsî ǃKhūb ge sorosa hâba.

¹⁴Tsî Elob, ǃKhūba ge ǂkhaiǂkhaib ge ǁkhāti sada nîra ǂkhaiǂkhai ǁîb di ǀgaib ǀkha.

¹⁵ǂAn tama du kha hâ, sorodi âdu a Xristub di uniǁae ǃkhaisa? ǁNâi Xristub di uniǁaede ū tsî ta kha ǁîde ǀai-ao-i di uniǁaese nî dī? Tātsē!

¹⁶ǂAn tama du kha hâ, ǀai-aosa ra ǂae-aib a ǁîs ǀkha ǀgui soro ǃkhaisa? ǁÎ ǀgamra nî ǀgui ǁgan, ti ra mîhe xui-ao.

¹⁷Xawe ǃKhūba ra ǂae-ai-i ge ǁîb ǀkha a ǀgui gaga.

¹⁸ǁHâxū ǀaiba re. Khoe-i ra ǁore ǁore-ai-i hoa-i ge sorosa xu ǃauga hâ-e; xawe ǀaiba ra dī-i ge ǁî-i soros ǂûs ǃoagu ra ǁore-e.

¹⁹Tsî ǂan tama du kha hâ, soros âdu a sadu ǃnâ ǁan hâ ǃAnu Gagab di tempel ǃkhaisa, ǁîba du Eloba xu ūhâba, tsî sadu ǂûdu di tamadu hâ ǃkhaisa?

²⁰ǃGomǀgausase du ǁamahe hâ, xuige Eloba ǂkhaiǂkhai sadu soros tsî sadu gagas tsîra, hîa a Elob dira ǃnâ.