Read Khoekhoegowab 1 Korinteǁîn 7 Bible Online

1 Korinteǁîn 7 - Khoekhoegowab bible

1 Korinteǁîn 7

¹Tsî xoaba te du ge xūn xa ta ra ǃeream: Khoe-e i ge a ǃgâiba, tara-i ose hâsa.

²Xawe ǀaigu ǃaroma ab mâb hoaba ǁîb taras ǂûsa ūhâ, tsî mâs hoasa as ǁîs di aob ǂûba ūhâ.

³Ab aoba tarasa ǃgameba anu-e dība, ǁnās ǁkhās khami as tarasa aoba dība.

⁴Taras ge ǁîs di soros ǂûs ǂama ǀgai-e ūhâ tama hâ, xawe aoba; tsî ǁnās ǁkhās xaseb ge aoba ǁîb di soros ǂûs ǂama ǀgai-e ūhâ tama hâ, xawe tarasa.

⁵Tā ǂgaedawasenxugu ro re, ǁaeb kōse i ga hoaro di ǁnâugus ǀkha ī tama io, ǂûtamahâ tsî ro nî ǀgorese; î ro ǁkhawa ǀhû, Satanni ǃâitsâ ro tidese, saro ūdawasenǁoasiba xu.

⁶Nēsa ta mā-ams ase ra mî, tsî mîmās ase tama.

⁷ǂGao ta ra xui-ao, khoen hoan ga tita ǂûta ī khami īsa; xawe mâ-i hoa-i ge ǁî-i hōs ǂûsa Eloba xu ūhâ, ǀgui-e nēti, tsî nau-e ǁnāti.

⁸O ta ge ǃgame taman tsî ǃoataradi tsîna ra mîba ǁîna i a ǃgâiba ǃkhaisa tita hâ khamin ga hâsa.

⁹Tsî ūdawasen ǁoan kao, an ǃgame; ǃgames ge turab xa khaus ǃgâ-ai a ǃgâi xuige.

¹⁰Tsî ǃgame hâna ta tita mîmā tama, xawe ǃKhūb ra ǁîna mîmā, taras aoba xu ǀgora tidesa;

¹¹tsî ǀgoras ga os nî ǃgame tamase hâ, tsî ǁnā tamas ka io, as aob ǀkha ǂkhîbagusa dī; îb aoba tarasa tā ǁnāxū.

¹²Tsî nauna ta ge tita ra mîba, ǃKhūb mî tama: ǃGâsab ga ǂgomoǃnâ tarasa ūhâ, tsîs ga ǂkhî ǁîb ǀkha ǁansa, ab ǁîsa tā ǁnāxū.

¹³Tsî taras ga ǂgomoǃnâ aoba ūhâ, tsîs ga ǂkhî ǁîb ǀkha ǁansa, as ǁîba tā ǁnāxū.

¹⁴ǂGomoǃnâ aob ge taras ǃnâ ǃanuǃanuhe hâ, tsî ǂgomoǃnâ taras ge aob ǃnâ ǃanuǃanuhe hâ amaga. ǁNāti i ga ī tama io, on ga sadu ôana ǃanuoǃnâ hâ; xawe nēsin ge a ǃanu.

¹⁵Tsî ǂgomoǃnâ-i ga ǀgorao, a-i ǀgora. ǃGâsab kas, ǃgâsas kas ge, ǁnās ga io, ǃgaehe tama hâ. Xaweb ge Eloba ǂkhîb ǃoa ge ǂgai da.

¹⁶ǂAns a xare, sas tarasa, aobas nî ǃgâiǃō kai ǃkhaisa? Tsî ǂants a xare, sats aotsa, tarasats nî ǃgâiǃō kai ǃkhaisa?

¹⁷A-i ǁnâi mâ-i hoa-e Elob ge ǂhûiǂui-i khami, a-i mâ-i hoa-e ǃKhūb ge ǂgai-i khami tanisen. Tsî ǁnāti ta ǀhaohâgu hoagu ǃnâ ra ǂnûiǂgā.

¹⁸ǃGaohe hâse-i ga khoe-e ǂgaiheo, a-i tā ǃgaohesa dī-unukaisen; aikhōb ǃnâ i ga khoe-e ǂgaiheo, a-i tā ǃgaokaisen.

¹⁹ǃGaos ge xū tama, tsî aikhōb ge xū tama; xawe Elob mîmāde dīs ge a hū.

²⁰A-i mâ-i hoa-e ǁîs ǀkha i ǂgaihe hâ ǂgais ǃnâ hâ.

²¹ǃGāsets ga ǂgaiheo, tā ǁîs xa ǂhansen; tsîts ga ǃnora ǁkhā, o ǁnā soasa sîsenū.

²²ǃKhūb ǃnâ ǃgāse ǂgaihe hâ-i ge a ǃKhūb di ǃnorasa xuige; ǁnās ǁkhās xase i ge ǃnorasase ǂgaihe hâ-e a Xristub di ǃgā.

²³ǃGomǀgausase du ǁamahe hâ, xuige tā khoen di ǃgā kai re.

²⁴Mâ-i hoa-e, ǃgâsado, ǁîs ǃnâ i ǂgaihe hâsa, a-i Elob aiǃâ ǁîs ǃnâ hâ.

²⁵Tsî ǂkhamkhoedi ǂama ta ǃKhūb di mîmā-e ūhâ tama hâ; o ta ti ǂâisa ra mî, ǃKhūb ǃnâ ǀkhomma ge hō ta axase, ǂgomǂgomsa ta nîga.

²⁶O ta ra ǂâi, ǃgâi i a ǃkhaisa ǃgoaxa tsūǀkhāb ǃaroma, khoe-i nî ǁnāti hâs a ǃgâi ǃkhaisa.

²⁷Taras ǀkhats ga ǃgaeǀhaohe hâo, tā xoresensa ôa-am re; tsî taras osets ga hâo, tā tara-e ôa.

²⁸Tsî ǃgamets ga xawets ǁnās ǀkha ǁore tama; tsî ǂkhamkhoes ga ǃgame xawes ǁore tama; xawen ge ǁnāti īna ǁgans ǃnâ ǁgâiǀā-e nîra ūhâ; tsî ta sado sâu ǂgao hâ.

²⁹O ta nēsa ra mî, ǃgâsado, ǁaeb a ǃnubu ǃkhaisa; an ǃaruǀî tarade ūhâna ūhâ taman xase ī;

³⁰în ā rana ā taman axase ī; în ǃgâiaǂgao rana ǃgâiaǂgao taman axase ī; în ǁama rana ūhâ taman xase î;

³¹în nē ǃhūbaiba ra ǁae-ūna ǁîba ǁae-ū taman axase î; nē ǃhūbaib di īsib ra ǃgû-ī xuige.

³²Tsî ta ra ǂgao, ǂhansens ose du nî hâsa. ǃGame tamab ge ǃKhūb din xa ra ǂhansen, matib nî ǃKhūba ǃgâibasa;

³³xawe ǃgame hâb ge ǃhūbaib din xa ra ǂhansen, matib nî tarasa ǃgâiǃgâibasa. Taras tsî ǂkhamkhoes tsîra ge a ǃkharaga.

³⁴ǃGame tamas ge ǃKhūb din xa ra ǂhansen, matis nî ǃanu ǃkhaisa, soros ǃnâs kas, gagas ǃnâs kas hoasa; xawe ǃgame hâs ge ǃhūbaib din xa ra ǂhansen, matis nî aoba ǃgâiǃgâibasa.

³⁵Tsî ta ǁîsa sadu di harebes ǃoa ra mî; ǁnoa-e ta nî sadu ai aose tama i, tsî sado anuba hâ-i ǃoa, tsî du nî ǃKhūba ǂhani-i ose ǂae-ai ǁkhās ǃoa.

³⁶Tsî khoe-i ga ǂâi, anu tamase i ra dī ǃkhaisa, ǁî-i di ǂkhamkhoes ga ǂkhamkhoesis âsa īǂamo, tsî i ga ǀkharase ī ǁoao, a-i dī, ǂgao i hâ khami; ǁore tama i hâ, a ra ǃgame.

³⁷Xawe khoe-i ga ǂgaob â-i ǃnâ mâǁapo, tsî i ga ǂhâsi-i xare-e ūhâ tama io, tsî i ga ǁî-i ǂâis ǂama ǀgai-e ūhâo, tsî i ga ǂgaob â-i ǃnâ ǂâibaseno, ǂkhamkhoes â-i ǃgameb ose nî hâsa, ǁnā-i ge ǃgâise ra dī.

³⁸ǁNā-amaga ǃgameb ǃoa ra māǂui si-i ge ǃgâise ra dī-e, tsî ǃgameb ǃoa māǂui si tama-i ge ǁnās ǃgâ-ai ǃgâise ra dī-e.

³⁹Taras ge ǂhanub ǀkha ǃgaehe hâ, ǁîs aob ûi hâs kōse; xawe aob âs ga ǁō, os ge a ǃnorasa, ǂgaos rab hoabas nî ǃgamesa; xawe ǃKhūb ǃnâ ǀgui.

⁴⁰Xawes ga ǁnās ǃgâ-ai ǃgâiǃgâxa, ǃgameb oses ga hâo, ti ǂâisa ǃoa; tsî ta ra ǂâi, tita on Elob Gagaba ūhâ ǃkhaisa.