Read Khoekhoegowab 1 Korinteǁîn 9 Bible Online

1 Korinteǁîn 9 - Khoekhoegowab bible

1 Korinteǁîn 9

¹Apostel tama ta tita? ǃNorasa tama ta hâ? Sada ǃKhūb Jesub Xristuba mû tama ta hâ? Ti sîsen tamado sado ǃKhūb ǃnâ.

²Nauna ta apostelse ība tama xawe ta ge sado apostelse ība; ti apostelsis di ǁgauǂuidu kom sado ǃKhūb ǃnâo.

³Nēs ge ti ǃereambasensa, tita ra ǀgoraǃgân ǃoagu:

⁴ǃNorasasiba kha ūhâ tama ge hâ, ǂû tsî ge nî āse?

⁵ǃNorasasiba kha ūhâ tama ge hâ, ǃgâsasa ge nî taras ase ǃgûma-ūsa, nau apostelgu tsî ǃKhūb di ǃgâsagu tsî Kefab on ra dī khami?

⁶Tita tsî Barnabab tsîkhom ǀguikhoma kha ǁnā ǂhanuba ūhâ tama hâ, sîsenbasen khom tidesa?

⁷Tari-e torob ǃnâ ra ǃoaba ǁî-i amǃnâs ǂûs ai? Tari-e ǂauxûiǂûǃhana-e ra ǂgā, tsî ǁî-i ǂû-i xa ǂû tama hâ? Tsî tari-e gūna ǃûi tsî gūdi di dai-i xa ā tama?

⁸Khoe-i dommi ǃoa ta ǁîna ra mî? ǂHanuba kha ǁîn ǁkhāna mî tamab hâ?

⁹Moseb di ǂhanub ǃnâ i kom xoamâihe hâo: “Dāǃnâ ra gomab di amsats ge ǃgae ǂgan tide!” Gomagu xasa Elob ra ǂhansensa?

¹⁰Hoaragaseb sada ǃaroma ǁîsa mî tama hâ? Ā, sada ǃaromas kom xoahe hâo, ǃhūǃgao ra-i ǃâubasens ai nî ǃhūǃgao ǃkhaisa, tsî ǃâubasens ai ra dāǃnâ-i ge ǁî-i ǃâubasensa nî amǃnâxa-e.

¹¹Sige ga gagasi xūna tsoroba duo, kai xū-e kha, sige ga sadu sorosi xūna ǃgaobaseno?

¹²Naun ga ǁnā ǀgaiba sadu ǂama ūhâo, tare xū-i ǃaroma ge kha sige ūhâ tide? Xawe ge ge ǁnā ǀgaiba sîsenǂui tama hâ; tsî ge ge hoana ra tani, ǂhanixū-i xare-e ge ǃgâiǂhôas Xristub disa dība tidese.

¹³ǂAn tama du kha hâ, ǁnān ǃanu xūna ra ǃoaban ra ǃanun xa ǂû ǃkhaisa; tsî ǁnān, altarsa ra ǃoaban ra altars ǃnâ amǃnâxa ǃkhaisa?

¹⁴ǁNās ǁkhās khamib ge ǃKhūba ge ǂnûiǂgā, ǃgâiǂhôasa ra aoǁnâgu nî ǃgâiǂhôasa xu ûisa.

¹⁵Xawe ta ge tita sadu xūn nēn xa xū-i xare-e ūbasen tama hâ. Tsî ta ǁîna ǁkhāti xoa tama, tita ǀkha i nî ǁnāti ǃnaese. ǁŌs ga ǃgâiba te, khoe-i nî koasens âtasa ǁaudība tes xa.

¹⁶ǃGâiǂhôasa ta kara aoǁnâ xawes ge koasa ti tama hâ; ǁîsa ta kom ǁgui-aihe hâo; tsî tsūba te, ǃgâiǂhôasa ta ga aoǁnâ tama io.

¹⁷Dī si ǂgao ta kao, o ta amǃnâ-e ūhâ; tsî dī si ǂgao tama ta ga i, xawe ta ǂhûiǂuisa ǂgomǃgâbahe hâ.

¹⁸Tarebe amǃnâ-e ta ǁnâi ūhâ? Nē-i: ǃGâiǂhôasa ra aoǁnâǃâ ta nî Xristub di ǃgâiǂhôasa mādawa-ams ose mâise, ti ǀgaib, ǃgâiǂhôas ǃnâ ta ūhâba ta sîsenūsā tidega.

¹⁹Mâ khoen hoana xu ǃnoraǃnorahe hâse ta ge hoana ǃgāse ība, ǃnāsa ǂguin âna ta nî hōse;

²⁰Jodeǁîna ta ge Jodeǁî kaiba, Jodeǁîna ta nî hōse; ǁnān, ǂhanub ǃnaga hâna ta ge ǂhanub ǃnaga hâse iba, ǂhanub ǃnaga hâna ta nî hōse;

²¹ǁnān, ǂhanub ose hâna ta ge ǂhanub ose hâ-i ase iba (ǂhanub ose ta Elob aiǃâ hâ tama, xawe Xristub di ǂhanub ǃnâ ta hâ), ǂhanub ose hâna ta nî hōse.

²²ǂKhabusana ta ge ǂkhabusa kaiba, ǂkhabusana ta nî hōse; hoana ta ge hū kaiba, mâ dommi hoab ai ta nî ǀnîna ǃgâiǃō kaise.

²³Tsî ta nēsa ǃgâiǂhôas ǃaroma ra dī, ǁîs on ǃnâ ta nî amǃnâxaga.

²⁴ǂAn tama du kha hâ, ǃkhoeǃnâdaob ǃnâ ra ǃkhoen hoatsama ra ǃkhoe, xawe i ǀgui-i ǀgui-e dansa ra hō ǃkhaisa? Nēti ǁnâi ǃkhoe re, sadu nî ǁîsa hōse.

²⁵Tsî ǃkham ra-i hoa-i ge hoana xu ra ūdawasen; nēn ra ǁîsa dī, ǁgao nî kron-en nî hōse; xawe sada ǁîsa ra dī, ǁgaoǁoasa-e ta nî hōse.

²⁶O ta tita nēti ra ǃkhoe, bupeb ai tama, o ta nēti ra ǃkham, ǂoab ǃnâ ra ǂnause tama;

²⁷xawe ta ti sorosa ra dā tsî ra ǃgādī, î ta tita, nauna ta ra aoǁnâba hîa, ǁî-aitsama tā aoxūhesa anu.