Read Khoekhoegowab 2 Korinteǁîn 1 Bible Online

2 Korinteǁîn 1 - Khoekhoegowab bible

2 Korinteǁîn 1

¹Pauluta, Xristub Jesub di apostelta, Elob di ǂâisa xu, tsî ǃgâsab Timoteub tsîkhom, Elob di ǀhaohâb Korintes tawa hâb ǃoa tsî Axajab hoaragab ǃnâ hâ ǃanun hoan ǃoa.

²ǀKhomma ab hâǀkhā du, tsî ǂkhîba Elob sada ǁGûb tsî ǃKhūb Jesub Xristuba xu!

³Ab karehe Elob tsî ǁGûb sada ǃKhūb Jesub Xristub dib, ǁGûb ǀkhomxaǂgaosigu dib tsî Elob ǁkhaeǂgaob hoab diba,

⁴sige ǁgâiǀāb hoab ǃnâ sige ra ǁkhaeǂgaoba, sige nî ǁkhāti mâ ǁgâiǀāb hoab ǃnâ hâna ǁkhaeǂgao ǁkhāse, ǁnā ǁkhaeǂgaob ǀkha, ǁîb ǀkha ge aitsama Elob xa ra ǁkhaeǂgaoheba.

⁵Xristub di tsâgu sige ǃnâ a ǃnāsas ǁkhās khami ge ge ǁkhāti kaise ra ǁkhaeǂgaohe Xristuba xu.

⁶O ǁgâiǀāhe ge karao, o i ge sadu ǁkhaeǂgaos tsî ǃgâiǃōb tsîra ǃoa ra ī, ǁkhā tsūǀkhāgu sige on ra tsâgu di sâsasib ǃnâ ra sîsenǂuihera; tsî ǁkhaeǂgaohe ge karao, o i ge ǁkhāti sadu ǁkhaeǂgaos tsî ǃgâiǃōb tsîra ǃoa ī.

⁷Tsî sige ǃâubasens, sadu ǂama ge ūhâs ge mâǁapo hâ, ǂan ge a amaga, tsūǀkhāgu ǃnâ du ra amǃnâxas ǁkhās khami du ǁkhāti ǁkhaeǂgaos ǃnâ ra amǃnâxa ǃkhaisa.

⁸ǂGao tama ge hâ xui-ao, ǃgâsago, ǀūǂamse du nî hâsa sige ǁgâiǀāb xa, Asiab ǃnâ sige ǂama ge hāba, sige ǀgaiba ǃnā hâse ge ge ǃgomǃgomhe hâ i ǃkhaisa, sige ûib xa ge ge îganǀgēs kōse:

⁹Ā, ǀnai ge ge sige ǃnâ ǁōb ǀgoraǃgâsa ǃhoabasen hâ i, sige ǁkhā ge ai ge ǂgomaiǂnûisen tidega, ge ga Elob, ǁō hâna ra ǂkhaiǂkhaib ai ǂgomaiǂnûi,

¹⁰nētikō kai ǁōba xu ge ore geb, tsî ǃaruǀî nî oreba; tsî ge ge ǁîb ai ǂgomǃgâ hâ, aiǃâb ǃoab nî ǁkhāti ore ge ǃkhaisa,

¹¹sadu on ra huiǀhao amaga sige du ra dība ǀgores ǀkha, ǁnā hōs, ǂgui khoen di ǀgorede xu sige ra ūhābahes ǂama nî ǁkhāti ǂguina xu sige ǃaroma ganganhese.

¹²Sige koasens kom nēsao: Sige ǂâis di ǃkhō-amsa, ǀguiǃnâxasib tsî ǂhauǃnâxasib Elob dib ǃnâ, ǁgans di gā-aisib ǃnâ tama i tsî Elob ǀkhommi ǃnâ ge ge ǃhūbaib ai tanisen ǃkhaisa, tsî ǃgōsase sadu tawa.

¹³ǀNî xūna ge ge sado xoaba tama xui-ao, khomai tsî du ra mûǂan xūn ǀguina; tsî ta ge ra ǃâubasen, ǀams kōse du nî ǁîna mûǂan ǃkhaisa;

¹⁴ǃkhareǃkharese du ge sige ona mûǂans ǁkhās khami, sadu di koasen ge a ǃkhaisa, sadu on a sige dis ǁkhās khami ǃKhūb Jesub di tsēs ai.

¹⁵Tsî nē mûmâinǃgâs ai ta ge ge ǂâibasen, aibe ta nî sadu tawa sīsa, ǀgamǁî ǀkhom-e du nî hōga.

¹⁶Tsî ta nî sado-ū Masedoniab ǃoa ǃganuse, tsî ta nî ǁkhawa Masedoniaba xu sadu tawa hāse, tsî ta nî sado xu Judeab ǃoa ǃgû-ūhese.

¹⁷Tsî nēsa ta ge ǂâibaseno, supuǂâixasib ǀkha ta kha ǁîsa ge dī? Tsî ǂâibasen ta ra-e, ǁgans ǃoa ta kha ǁî-e ra ǂâibasen, tita tawas nî āsa, āse tsî hî-îsa, hî-îse īse?

¹⁸Tsî Elob ge a ǂgomǂgomsa, os ge sige mîs sadu ǃoa ge īsa āse tsî hî-îse ī tama ge i,

¹⁹Elob di Ôab Jesub Xristub, sadu ǃnâ sige, tita tsî Silvanub tsî Timoteub tsîge xa ge aoǁnâheb, ǁîb ge āse tsî hî-îse ī tama ge i, tsîb ge ǁîb ǃnâ āse ge ī;

²⁰Elob di mîmâidi hoadi ge a ǁîb ǃnâ Ā tsî Amen, Elob nî sige xu ǂkhaiǂkhaihega.

²¹Tsî Elob ge a ǁNāb, sige sadu ǀkha Xristub ǃnâ ra ǀgaiǀgaib, tsî sige ge ǂkhauǀkhāb,

²²sige ǁkhāti ge ǀgaiǀgaib, tsî mâiǁkhaes Gagab disa sige ǂgaogu ǃnâ ge māba.

²³Tsî ta ge Eloba ǀhûǀguitimî-aose ra ǂgaiǀî ti ǀoms ǂama, sado ta nî sâuse ta ganupe Korintes tawa sī tama hâ ǃkhaisa;

²⁴sadu ǂgomsa ge nî gaoǂamse tama; sadu ǃgâiaǂgaob di sîsenǀhao-aoge komo; ǂgoms ǃnâ du kom mâo.