Read Khoekhoegowab 2 Korinteǁîn 10 Bible Online

2 Korinteǁîn 10 - Khoekhoegowab bible

2 Korinteǁîn 10

¹Tsî tita Pauluta ge sado ra ǂgan Xristub di tsamtsiǃnâsib tsî khoexasib tsîkha ǀkha, sadu aiǃâ ǃgamǃgamsens ǀkha hâ ta, xawe ǀkhai ta ka o sadu ǃoagu a ǁkhoa ta;

²o ta ra ǀkhoma, î ta ǁnāpa hâse tā ǁkhoa ǁnā ǁkhoaǂgaosib ǀkha, ǁîb ǀkha ta ǀnîna ra sîsenū, tita ra ǃgôaheb, sige ǁgans ǃoa ra tanisen ti ǂâi hâgu xa.

³Tsî ǁgans ǃnâ ge ra ǃgû, xawe ge ge ǁgans ǃoa ǃkham tama hâ:

⁴ǁÂtanin sige ǃkhams din ge ǁgans di tama hâ, tsîn ge Elob ǃnâ a ǁkhā, ǀgaisa hâǃkhaide hîkākāsa;

⁵ǀapede ra hîkākāse, tsî mâ ǀgapib hoab, Elob ǂans ǃoagu ra khâib tsîna, tsî ge ge mâ ǂâis hoasa Xristub di ǁnâuǀnamxasib ǃnâ ra ǃkhō;

⁶tsî ge ge ǂhomisen hâ, ǁnâuoǃnâsib hoaba ǀkhaosa, sadu ǁnâuǀnamxasib ga ǀoao.

⁷ǃAugakam īsiba du kha ra kō? Khoe-i ga ǁî-aitsama Xristub dise ūhâseno, a-i ǁkhāti ǁî-e xu aitsama ǂâi, ǁî-i a Xristub di khami ge ǁkhāti sige ona Xristub di ǃkhaisa.

⁸Tsî ta ga ǃgāse, ǃnā hâse sige ǀgaib xa koaseno, ǃKhūb ge sige māba sadu ǂnubikhâihes ǃoa tsî sadu hîǀhuruhes ǃoa tama, o ta ga tao kaihe tama i hâ;

⁹ǁnāti ta ī tidega, ǂkhanidi ǀguidi ǀkha ta ra ǃaoǃao du ǂgao khami.

¹⁰ǂKhanidi ge ǃgom tsî a ǀgaisa, ti gu kom ra mîo, xawe sorosi hâs âb ge a ǂkhabusa, tsî ǃhoas âb ge xū-e harebe tama hâ.

¹¹A i ǁnāti ī-e ǂâiǂâisen, mîs ǀkha ge ǂkhanidi ǃnâ ǀkhai ge a hîa īs ǁkhās khami ge ǁkhāti sîsenni ǃnâ ī khami.

¹²Sige ge ǁî-aitsama koasen tsî ǁgaeǁgaesenǀhaotsâ tama hâ ǁnāgu, ǁî-aitsama ra koasen gu ǀkha; ǁî-aitsama gu ǁîgu ǀkha ra ǀnōsen, tsî ǁî-aitsama gu ǁîgu ǀkha ra ǁgaeǁgaesen amaga gu ge xū-e ǁnâuǃā tama.

¹³Xawe ge sige ǀgaus ose koasen tide; tsî ge ge nî koasen ǁnā ǀgaus sîsenǃkhais dis, Elob ge ǁîsa sige ǀguirobas ǃoa, sadu tsîn ǃoa ge ge sī ǃkhaisa.

¹⁴Kaise ge ǃāǂuisen tama hâ, sadu tawa sī tama hâge axase; sadu on tawa ge kom ge sīo Xristub di ǃgâiǂhôas ǀkha;

¹⁵tsî ge ge ǀgaus ose koasen tama hâ naugu di sîsenni ǃnâ, tsî ge ge ǃâubasensa ūhâ, sadu ǂgoms ga ǀomo, o ge ge sadu ǃnâ ǃnāǂamsase nîra kaikaihe sige di dommi ǃoa,

¹⁶o ge ge sadu nau ǀkhāb ai hân tsîna ǃgâiǂhôasa nîra aoǁnâba, ǀkhara sîsenǃkhais, ǀnai ǁāǁāhe hâs ǃnâ ge koasen tidega.

¹⁷Tsî koasen ra-e, a-i ǃKhūb ǃnâ koasen!

¹⁸ǁÎ-aitsama koasen tama i, xawe ǃKhūb ra koa-i ge a ǁkhā.