Read Khoekhoegowab 2 Korinteǁîn 11 Bible Online

2 Korinteǁîn 11 - Khoekhoegowab bible

2 Korinteǁîn 11

¹ǂGao ta ra, ǂkharirose du nî gâresib ǃnâ tani te ǃkhaisa. Ā, tani te du re!

²Sadu ǂama ta ra tau elosi tauxasib ǀkha xuige. ǀGui aoba ta ge sado mîmâiba xui-ao, ǃanu ǂkhamkhoese ta nî Xristuba mâi-aiǃâ duse;

³xawe ta ra ǃao, ǀaob ge Evasa gāxaǃnâsib âb ǀkha ǂgaeǂhapu khami, ǁnās ǁkhās khami di nî ǁkhāti sadu ǂâide ǁgaoǁgaohe ǃkhaisa tsî Xristub ǃnâ hâ ǀguiǃnâxasiba xu.

⁴Naub ga hā tsî ǀkhara Jesuba aoǁnâo, sige aoǁnâ tamaba, tsî ǀkhara Gagab, hō tama du ge hâ iba du ga ǃkhōǃoao, tsî ǀkhara ǃgâiǂhôas, hō tama du ge hâ isa, o du ga ǃgâise tani;

⁵nēti ta ra ǂâi xui-ao, hoagu xa kai apostelgu ǃgâ-ai ta ǂkhari tamasa;

⁶tsî ǃhoas ǃnâ ta a gâre khoe xawe ta ǂans ǃnâ ǁnāti ī tamasa; hoa xūn ǃnâ ge ge hoaragase sadu tawa ge ǂhai.

⁷ǁOre ta ge xare, ǁî-aitsama ta ge ǃgamǃgamsen ǃkhais ǀkha, sadu nî ǀgapiǀgapihega? Xū-i ama tama ta kom Elob di ǃgâiǂhôasa gere aoǁnâba duo.

⁸Nau ǀhaohâga xu ta ge ǃnari, sîsenamǃnâ-e ūs ǀkha, sado ta nî ǃoabase; tsî sadu tawa ta ge hâ i tsî tôasio, o ta ge khoe-i xare-e ǂhani tama ge hâ i;

⁹ti tôasiba gu ge Masedoniaba xu ge hā ǃgâsaga ǀoaǀoa xui-ao, tsî ta ge hoan ǃnâ sado ǃgomǃgomba tamase ge tanisen, tsî ta nî ǃaruǀî ǁnāti tanisen.

¹⁰Xristub di amab ge tita ǃnâ hâ, os ge nē koasensa Axajab di ǀkharigu ǃnâ tita xu ūǁnâhe tide.

¹¹Tare xū-i ǃaromasa? Sado ta ǀnam tama amagasa? Elob ge a ǂan.

¹²O ta ge dī ta ra-e ǃaruǀî nîra dī, koasenǃkhai-e ta nî ǃgaoǁnâse ǁnāgu, koasenǃkhai-e ra ôa-amga, koasen gu ran ǃnâ gu nî sige ǁkhāge khami hōhega.

¹³ǁNāti ī ǂkhaba apostelgu ge gāxaǃnâ ra ǃoabasabegu, Xristub di apostelse ra dīsenga.

¹⁴Tsî ǁnās ge buruxa tamasa; Satanni ǂûb kom ǃnâb di ǀhomǃgāse ra dīseno;

¹⁵o i kom kai xū tamao, ǁîb ǃgāgu on ga ǂhanu-aisib di ǃgāse dīseno; ǁîgu ǀams ge ǁîgu di sîsengu khami nîra ī.

¹⁶ǁKhawa ta ra mî, a-i tā khoe-e tita gâre khoese ūhâ; tsî ǁnā tamas ka io, ǁnâi gâre khoese ǃkhōǃoa te, î ta ǁkhāti ǂkharirose koasen.

¹⁷Mî ta ra-e ta ǃKhūba xus axase mî tama tsî gâresib ǃnâs axase, nē mûmâinǃgâs koasens ǁkhā ta as dis ǃnâ.

¹⁸ǂGuigu ǁgans ǃoa ra koasen amaga ta ge tita ǁkhāti nî koasen.

¹⁹Gâre khoena du kom ra tanio, gā-ai du a amaga.

²⁰Tani du kom rao, khoe-i ga sado ǃgā dīo, khoe-i ga hapu duo, khoe-i ga sado ūǀhanao, khoe-i ga ǃguriǃguriseno, khoe-i ga ais ǃnâ ǂnau duo.

²¹Ti taosib ase ta ra mî, sige ge nēsa ǂkhabusaba ī. ǁÎ-i ǃnâ i ga khoe-e ǂgapa (gâresib ǃnâ ta kom ra ǃhoao), ǁî-i ǃnâ ta tita ona a ǂgapa.

²²Hebreǁîgu karao? Tita tsîn. Israelǁîgu karao? Tita tsîn. Abrahammi surigu karao? Tita tsîn.

²³Xristub ǃgāgu karao? (Gârese ta kom ra ǃhoao): Tita ge ǃnā hâ ta: Sîsenni ǃnâ ǃnā hâ ta, ǂnaudi ǃnâ ǃnā hâ ta, ǁîgu ǃgâ-ai ǃnāsase ge ǃkhōhe hâ ita, ǃnurise ǁōb tsūǃgâgu ǃnâ ge hâ ita;

²⁴Jodeǁîna xu ta ge koro ǃnādi kōse hakadisi ǂnaude ǀguis ǀguisa ūǂuisase ge hō;

²⁵ǃnona ǃnādi kōse ta ge haigu ǀkha ge ǂnauhe, ǀgui ǃnāsa ta ge ge ǀuiǁhomhe, ǃnona ǃnāde ta ge doe-ommi khôas ǃnâ ge tsūǀkhā, tsēs tsî tsuxub tsîra ta ge hurib di ǃgammi ǃnâ ge hâǂui.

²⁶ǃNuriǃnāde ta ge daob ai ge hâ i; ǃaorosasib ǃāgu dib ǃnâ, ǃaorosasib ǃgamaon dib ǃnâ, ǃaorosasib ti ǁaes dib ǃnâ, ǃaorosasib ǀūben dib ǃnâ, ǃaorosasib ǃnâ ǃādi ǃnâ, ǃaorosasib ǃnâ ǃgaroǃhūb ǃnâ, ǃaorosasib ǃnâ hurib ai, ǃaorosasib ǃnâ ǂkhaba ǃgâsagu ǁaegu;

²⁷ǃgom sîsenni tsî ǀhupub tsîkha ǃnâ, kaise ǂkhaikari hâs ǃnâ, ǃâs tsî ǁgâs ǃnâ, kaise ǂûtamase hâs ǃnâ, ǃkhaib tsî ǀōǀkhāsib tsîkha ǃnâ;

²⁸nēn xōǀkhās ge ǂhansens tsēkorobe ta ǀhaohâgu hoagu ǂama ūhâsa.

²⁹Tari-e a ǂkhabusa, tsî ta tita ǂkhabusa tama hâ? Tari-e ra ǁgonǁgonǂgaohe, tsî ta tita khau tama hâ?

³⁰Koasen ta nîs karao, o ta ge ti ǂkhabusasigu xa nî koasen.

³¹Elob tsî ǁGûb sada ǃKhūb Jesub Xristub dib, ǀamosib kōse ǀkhaehesab ge a ǂan, ǂhumi tama ta hâsa.

³²Damaskus tawab ge gao-aob Aretab di ǃāǃkhōmâi-aoba Damaskuǁîn di ǃāsa ge ǃûi, titab nî ǃkhōga;

³³o ta ge mûǂuidaosa xu ǀharu-i ǃnâ ǂnubiǂgoaba-ū ge ǁgôa kaihe, tsî ǁîb di ǃomkha xu ge ǁhâ.