Read Khoekhoegowab 2 Korinteǁîn 12 Bible Online

2 Korinteǁîn 12 - Khoekhoegowab bible

2 Korinteǁîn 12

¹Koasens ge tita harebeba tama hâ; aidi tsî ǂhaiǂhaidi ǃKhūb didi kōse ta kom nî sīo.

²Khoeba ta ge a ǂan Xristub ǃnâ, disihakaǀa nî ī kurigu aiǃâ (iseb soros ǃnâ ge hâ isa ta a ǀū, iseb soros ǃauga ge hâ isa ta a ǀū; Elob ge a ǂan), ǁîb ge ǃnonaǁî ǀhommi kōse ge ǂgaeǃapahe;

³tsî ta ge ǁnā khoeba a ǂan (iseb soros ǃnâ, iseb soros ǃauga ge hâ isa ta a ǀū; Elob ge a ǂan),

⁴ǁîb ge paradais ǃnâ ge ǂgaeǃapahe tsî ǃhoaǂuiheǁoasa mîde ge ǁnâu, khoe-i nî ǁîde mîsa mā-amhe tamade;

⁵ǁnāti īb xa ta nî koasen; tita xa ta aitsama koasen tide, ti ǂkhabusasigu ǀguigu xa.

⁶Koasen ǂgao ta kara, xawe ta ge gâre khoese ī tide; amaba ta nî mî xui-ao; xawe ta ra ūdawasen, khoe-i xare-i tita xa ǃnāsase ǂâi tidega, tita tawa i ra mûs tsî tita xa i ra ǁnâus ǂamai.

⁷Tsî ǃnāǂamsa ǂhaiǂhaidi xa ta ǀgapiǀgapisen tidese, ta ge ǀā ǁkhū-e ti ǁgans ǃnâ ge māhe: Satanni di ǀhomǃgāba, ǃoms ǀkhab nî ǂnau tega, ǀgapiǀgapisen ta tidese.

⁸ǁÎs ǃaroma ta ge ǃnona ǃnādi kōse ǃKhūba gere ǀkhoma, tita xub nî bēga;

⁹ob ge tita ǁga ge mî: Ti ǀkhommi ge ǂâuba tsi hâ, ti ǀgaib ra ǂkhabusasib ǃnâ ǀoa xui-ao. O ta ge ǁnās ǃgâ-ai ti ǂkhabusasigu xa koasen ǂgao hâ, Xristub di ǀgaib nî tita ǃnâ ǁanse.

¹⁰ǁNā-amaga ta ǃgâiǃgâisen-e ūhâ ǂkhabusasigu ǃnâ, tsî tsūdīhedi ǃnâ, tsî ǂhâgu ǃnâ, tsî ǃgôaǃgondi ǃnâ, tsî ǂōǂōsigu ǃnâ Xristub ǃaroma; ǂkhabusa ta ka, ǃnubai ta a ǀgaisa xui-ao.

¹¹Koasen raǃâ ta go gâre; sadu ge tita ǁîs ǃoa ge ǁgari. Anu i kom ga hâo, sadu xa ta nî karehesa; xū-i xare-i ǃnâ ta hoagu xa kai apostelgu ǃgâ-ai ǂkhari tama ge hâ i amaga, xū tama ta hâ xawe.

¹²Saodi aposteli didi kom sadu ǃnâ ge īo, hoa sâsasib ǃnâ, saodi tsî buruxa dīgu tsî ǀgaisa dīgu tsîn ǀkha.

¹³Mâ xū-i ǃnâ du kha ge tôatôahe nau ǀhaohâgu xa, nēs: Tita ǂûta ge sado ǃgomsi-e mā tama is ǀguis? ǀÛba te re nē ǂkhabasiba.

¹⁴Mû, ǃnonaǁî ǃnāsa ta ǀnai ǂhomisen hâ, sadu tawa ta nî sīsa, tsî ta ǃgomǃgom ǀkha du tide; sadu xūna ta ôa tama i, tsî ta sado ra ôa xui-ao. ǀGôan ge ǁgûna ǁuiba ǀhaoǀhaoba tide, xawe ǁgûna ǀgôana xui-ao.

¹⁵O ta ge kaise māsen ǂgao hâ, sadu ǀomdi ǃaroma ta nî ǁguibahe ǃkhaisa; ǃnāǂamsase ta sado a ǀnam, xawe ta ǂkharirose ra ǀnamhe.

¹⁶As ǁnāti ī, tita ge sado ǃgomba tama ge hâ i; xawe gā-ai ta ge i amaga ta ge gās ǀkha ge ǃkhō du.

¹⁷Xare ta kha sadu ǃoa ta ge sîgu di ǀguib xaweb ǃnâ-ū sado xu ti harebesa ge ôa?

¹⁸Tituba ta ge ǂgan, tsî ta ge ǁîb ǀkha ǃgâsaba ge sî; xareb kha Tituba ǁîb di harebesa sadu tawa ge ôa? ǁKhā Gagab ǀguib ǃnâ tanisen tama khom hâ? ǁKhā daogu ǀguigu ǃnâ ǃgû tama khom hâ?

¹⁹ǁKhawa du kha ǂâi hâ, sadu tawa ge gere ǀhapiokaisensa? Elob di ais aiǃâ ge nēna Xristub ǃnâ ra ǃhoa, tsî hoana, ǀnamsabedo, sadu di ǂnubikhâihesa ǃoa;

²⁰ǃao ta ra xui-ao, sī ta ka ǃnubai ta nî sado ǀnîsi ǂgao tama ta hâ khami hō ǃkhaisa, tsî du nî tita ǀnîsi ǂgao tama du hâ khami hō ǃkhaisa, în tā ǁnāpa hâ: ǂNoagudi, tsî tauxasib, tsî ǁaib, tsî ǀgorasens, tsî ǀhoeb, tsî ǂgāǁaredi, tsî khūkhūsendi tsî khâikhâisendi tsîna;

²¹îb ti Eloba, sī ta kao, tā ǁkhawa sadu tawa ǃgamǃgam te, î ta tā ǂguin ǂama ǃhausen, aibe ge ǁore tsî ǃhobasen tamana, ǃanuoǃnâsib tsî ǀaib tsî ǁgans ǁoren, hîan ge dīna xu.