Read Khoekhoegowab 2 Korinteǁîn 13 Bible Online

2 Korinteǁîn 13 - Khoekhoegowab bible

2 Korinteǁîn 13

¹ǃNonaǁî ǃnās ge nēsa, sadu tawa ta ra sīsa; ǀgam tamas ka io ǃnona ǀhûǀguitimî-aon di ams ǃnâ i ge mâ mî-i hoa-e ra mâ.

²ǀNai ta ge mî, tsî ta ǀgamǁî ǃnāsa ǀnai ra mî, hâ ta axase, tsî ta nēsi sadu tawa ta hâ tama o ra xoaba du, aibe ge ǁore du tsî naudu hoado; ǁkhawa ta ga sīo, o ta sâu du tide.

³Tita ǃnâ ra ǃhoa, Xristuba du nî ǃâitsâ ǃkhaisa du ra ôa-am amaga, sadu ǃnâ ǂkhabusa tamab, tsî sadu ǃnâ a ǀgaisaba.

⁴Tsî ǂkhabusasib ǀkhab ǃgâuhe hâ, xaweb kom Elob di ǀgaiba xu ûi hâo. Tsî sige on ge ǁîb ǃnâ a ǂkhabusa, xawe ge kom ǁîb ǀkha sadu ǃnâ nîra ûio Elob di ǀgaiba xu.

⁵ǁÎ-aitsama ôaǃnâsen du re, ise du ǂgoms ǃnâ hâsa, ǁî-aitsama ǃâitsâsen du re. Aitsama du kha ǁnâi ǂansen tama hâ, Jesub Xristub sadu ǃnâ hâsa? ǀNîsi du ga aoxūhesa tama io.

⁶Xawe ta ra ǃâubasen, mûǂan du nîsa sige aoxūhesa tama ǃkhaisa.

⁷Tsî ta ge Eloba ra ǀgore, ǂkhaba-i xare-e du dī tide ǃkhaisa, sige nî ǃâitsâhe hâse hōhes ǃoa tama, xawe du nî sado ǃgâiba dīga, tsî ge nî sige aoxūhesase īga;

⁸xū-i xare-e ge amab ǃoagu a dī ǁoa xui-ao, xawe amab ǃaroma ge ge xū-e a dī ǁkhā.

⁹Tsî ge kom ra ǃgâiaǂgao-o, sige ga ǂkhabusa tsî sadu ga ǀgaisa ǃnubai; tsî ge nēsa ǂgaoba du hâ: Sadu di dīǀoaǀoahesa.

¹⁰ǁNā-amaga ta nēna ǀkhai ta a hîa ra xoa, î ta tā, hâ ta a hîa, ǁkhōse sîsenū dusa ǂhâ ǁnā ǀgaib, ǃKhūb ge tita māb ǃoa ǂnubikhâis ǃoa tsî hîǀhurus ǃoa tama.

¹¹ǃAruǀî, ǃgâsago, ǃgâiaǂgao re, dīǀoaǀoasa re, ǁnamakaisen re, ǀguiǂâixa re, ǂkhîbagu re, tsî Elob ǀnammi tsî ǂkhîb tsîkha dib ge sadu ǀkha nîra hâ.

¹²Tawedegu re ǃanu ǁoa-i ǀkha. ǃAnun hoan ra tawede du.

¹³ǀKhommi ǃKhūb Jesub Xristub dib, tsî ǀnammi Elob dib, tsî ǀhûhâsib ǃAnu Gagab diba ab sadu hoadu ǀkha hâ! Amen.