Read Khoekhoegowab 2 Korinteǁîn 4 Bible Online

2 Korinteǁîn 4 - Khoekhoegowab bible

2 Korinteǁîn 4

¹ǁNā-amaga, nēti ī ǃoaba-e ge ǀkhomxaǂgaosiba xu ūhâ amaga ge tsânaǁkhui tama hâ;

²tsî ge ge ǂganǃgâsigu taotaosaga ge mîǁnâ, tsî ge ge gāxaǃnâsib ǃnâ ǃgû tama, tsî ge ǁkhāti Elob mîsa ǂkhabaǂkhaba tama, xawe ge ge amab di ǂhaiǂhais ǀkha khoen di ǂâis hoas tawa ra mîmāsen Elob aiǃâ.

³Tsî sige di ǃgâiǂhôas ga ǃgū-aihe hâo, os ge kāǁō ran ǃnâ ǃgū-aihe hâ;

⁴ǁîn ǃnâb ge nē ǃhūbaib di eloba ǂgomoǃnân di ǂâide ge ǂgī kai, ǃgāsa ǃnâb ǂkhaisa ǃgâiǂhôas Xristub dis dib ǁîna ǀkhâu-ai tidese; ǁîb ge Elob di īsiba.

⁵Sige ge ǁî-aitsama aoǁnâsen tama xui-ao, xawe ge ge Xristub Jesub a ǃKhū ǃkhais, tsî sige a Jesub ǃaroma sadu ǃoabasabe ǃkhaisa ra aoǁnâ.

⁶ǁNā Elob, ǃkhaenaba xub nî ǃnâba ǀkhī, ti ge mîmāb, ǁîb ge ǁnāb, sige ǂgaogu ǃnâ ge ǀkhâuǂgāba, ǃnâǃnâs Elob ǂkhaisib ǂans dis nî ǀkhīse Jesub Xristub di ais ǃnâ.

⁷Tsî ge ge nē ǁuiba ǃhūxapadi ǃnâ ūhâ, îb ǃnāǂamsasib ǀgaib diba Elob di tsî sige di tama ti.

⁸Sige ge hoan ǃnâ ra ǁgâiǀāhe, xawe ge ge ǂkhabuǂâi tama hâ; îganǀgē ge ra, xawe ge ge huio tama hâ;

⁹ǃgôaǃgonhe ge ra, xawe ge ge ǁnāxūǃgâhe tama hâ; aoǁguihe ge ra, xawe ge ge hîkākāhe tama hâ;

¹⁰hugaǀgui ge ǃKhūb Jesub di ǁōba sige soros ǃnâ ra tanima, Jesub di ûib nî ǁkhāti sige soros ǃnâ ǂhaiga;

¹¹hugaǀgui ge kom sige ûitsamage ǁōb ǃnâ ra māǁnâhe Jesub ǃaromao, Jesub di ûib nî ǁkhāti sige ǁōsa ǁgans ǃnâ ǂhaiga;

¹²ob ge ǁōba sige ǃnâ, xaweb ge ûiba sadu ǃnâ ra sîsen.

¹³ǁKhā gagab ǂgoms diba ge ūhâ amaga, xoamâihe hâ khami: “ǂGom ta ge, amaga ta ge ǃhoa,” ti; o ge sige ona ra ǂgom, tsî ge ǁnā-amaga ra ǃhoa;

¹⁴ǂan raǃâ, ǃKhūb Jesuba ge ǂkhaiǂkhaib ge ǁkhāti sige Jesuba xu ǂkhaiǂkhai, tsî nî sige sadu ǀkha mâi-aiǃâ ǃkhaisa;

¹⁵nēn hoan sadu ǃaroma ra ī xui-ao, ǀkhommi nētikō ǂguin ǃnâ ge sīb nî gangansa ǃnā kaise Elob di ǂkhaisiba ǃoa.

¹⁶ǁNā-amaga ge ǂkhabuǂâi tama hâ; tsî sige di ǃaugakam khoeb ga ǁgaoǁgaohe xaweb ge ǃnāb diba tsēsa xu tsēs ǃoa ra ǀasa kaihe.

¹⁷Nē mûsǀapirob ai hâ ǁgâiǀāb âgeb, ǃhaese ra ǃgû-īb ge ǀamo tsî ǃnā hâ ǃgomǀgausa ǂkhaisiba sige ra sîsenba xui-ao

¹⁸sige, mûsa xūn ai kō tamage tsî mûǁoasa xūn ai ra kōge; mûsa xūn ge a ǁaeb di, xawe mûǁoasan ge a ǀamo xui-ao.