Read Khoekhoegowab 2 Korinteǁîn 5 Bible Online

2 Korinteǁîn 5 - Khoekhoegowab bible

2 Korinteǁîn 5

¹ǂAn da a xui-ao, sada ǃhūsi ommi ga khôaǁnâhe xawe da om-i, Eloba xu hâ-i, ǃomgu ǀkha dīhe tama-i, ǀamose ǀhommi ǃnâ nî hâ-e ūhâ ǃkhaisa.

²Nēb ǃnâ ta kom ra ǀhâimâinǀomo, ǁnā ommi ǀhomma xu hâb ǀkha da nî anahe ǃkhaisa ra ǁkhoreǃâ;

³anahe da ka, o da kom ǀōǀkhāse hōhe tideo.

⁴Nē sorosi ommi ǃnâ da hâ hîa da ra ǀhâimâinǀom tsî da ǃgomǃgomhe hâ xui-ao; ǂgaeǂuiǀkhāhe tama i tsî ǂgaeǂgāhe ǂgao da ra amaga, ǁōsa-i nî ûib xa harahese.

⁵Tsî ǁîs ǁkhāsa ǃoa ra ǁāǁā dab ge Elob, ǁkhāti mâiǁkhaes Gagab disa ge mā daba.

⁶O da ge mâ ǁaeb hoab ai a ǃgâiǂâixa, tsî da ge a ǂan, soros ǃnâ da ǁan hâ hîa da ǃKhūba xu ǃnūse hâ ǃkhaisa,

⁷ǂgoms ǃnâ da ra ǃgû xui-ao tsî ǃgapaǀîs ǃnâ tama,

⁸xawe da ge a ǃgâiǂâixa, tsî da ra ǁkhore, sorosa xu ǂoa tsî ǃKhūb tawa ǁansa.

⁹ǁNā-amaga da ǁkhāti ra ǃhaeǃhaesen, ǃKhūb tawa da hâs karao, ǃnūse ǁîba xu da hâs karao, ǁîba da nî ǃgâiǃgâisase ībasa.

¹⁰Sada hoada ge Xristub di ǂhanuǂhanutrons aiǃâ nîra ǂhai xui-ao, mâ-i hoa-i nî ǃkhōǃoaga ǁî-i ûib ǃnâ i gere sîsenǂuin ǃoa, ǃgâin karao, ǂkhaban karao.

¹¹Tsî ǃKhūb ǃaoba ge a ǂan amaga ge ge khoena ǂgoms ǃoa ra ǃhoadanba, tsî ge ge Eloba a ǂhaisaba; tsî ta ra ǃâubasen, sadu ǂâidi on ǃnâ ge a ǂhaisa ǃkhaisa;

¹²sige ge ǁkhawa ǁî-aitsama sadu aiǃâ koasen ǂgao tama xui-ao, tsî ge ge ǃgâi ǁae-e ra mā du, sadu nî sige xa koasensa, ǃereamxū-e du nî ūhâbase ǁnāgu, ais ǃnâ ra koasen gu, xawe ǂgaob ǃnâ ǁnāti ī tama gu ǃoagu.

¹³ǃKhausa ge kao, o ge kom Eloba ǃkhausabao; tsî ǀgaus ai ge ga hâo, o ge kom sado ǀgaus ai hâbao.

¹⁴ǀNammi Xristub dib sige ra ǁgari xui-ao;

¹⁵nēsa ge ra ǂgom amaga, ǀguib ga hoana ǁōbao, on ge hoana ǁō ǃkhaisa. Tsîb ge hoana ge ǁōba, în ûitsamana tā ǁî-aitsama ûibasen, în ǁîna ge ǁōbab tsî ǁîna ge khâibaba ûiba ti.

¹⁶ǁNā-amaga ge ge sige nēsisa xu khoe-i xare-e ǁgans ǃoa ǂan tama; tsî ge ga Xristuba ǁgans ǃoa ǂan hâ i xawe ge ge nēsi ǃaruǀî ǁnāti ǂan bi tama hâ.

¹⁷ǁNā-amaga, khoe-i ga Xristub ǃnâ hâo, o i ge a ǀasa kurusabe; ǀoron ge go ǃgôa-ī, mû, hoan ge go ǀasa kaihe.

¹⁸Tsîn ge nēn hoana Eloba xu ra ī, Jesub Xristuba xu sada ǁîb ǀkha aitsama ge ǂkhîbagu kaib, tsî sige ǃoabas ǂkhîbagus disa ge māba.

¹⁹Elob ge Xristub ǃnâ hâ i xui-ao, ǃhūbaiba ǁîb ǀkha aitsama ra ǂkhîbagu kaiǃâ, ǁoren âna ǁîna ǃgôaba tamase, tsîb ge ǂkhîbagus di mîsa sige ǃnâ ge ǁgui.

²⁰O ge ge Xristuba ra sîsenba, Elob ra sige xu ǁnama axase; o ge Xristub ǃās ǃnâ ra ǀkhoma: Elob ǀkha ǂkhîbagukaisen re! ti.

²¹ǁNāb, ǁore-i xare-e ǂan tama ge hâ ibab sada ǃaroma ǁorese ge dī xui-ao, sada nî ǁîb ǃnâ Elob di ǂhanu-aisi kaihese.