Read Khoekhoegowab 2 Korinteǁîn 6 Bible Online

2 Korinteǁîn 6 - Khoekhoegowab bible

2 Korinteǁîn 6

¹Tsî ge sige sîsenǀhao-aose ra ǁnama du, Elob ǀkhomma du ǁause hō tidesa;

²nētib ra mî xui-ao: ǃKhōǃoaǁaeb ǃnâ ta ge ǁnâu-am tsi, tsî ǃgâiǃōsib di tsēs ai ta ge hui tsi. Mû, nēsib ge ǃgâi ǃkhōǃoaǁaeba hâ, nēsis ge ǃgâiǃōsib di tsēsa hâ.

³Sige ge khoe-i xare-e xū-i xare-i ǀkha ǃnôa kai tama hâ, ǃoabas âge ǃkhāǃkhāhe tidega;

⁴tsî ge ge hoan ǃnâ Elob di ǃoabasabese ra ǁgausen, kai ǃnūǃnâxasib ǀkha, ǁgâiǀāgu ǃnâ, ǂhâgu ǃnâ, ǂōǂōsigu ǃnâ,

⁵ǂnauhes ǃnâ, ǃkhōsis ǃnâ, gongonǃnâdi ǃnâ, sîsenni ǃnâ, ǂkhaikarihâs ǃnâ, ǂûtamahâs ǃnâ,

⁶ǃanusis ǃnâ, ǂans ǃnâ, ǃnūǃnâxasib ǃnâ, khoexasib ǃnâ, ǃAnu Gagab ǃnâ, hînao ǀnammi ǃnâ,

⁷mîs amab dis ǃnâ, ǀgaib Elob dib ǃnâ, ǁâtanin ǂhanu-aisib din ǀkha amǀkhāb ǁôab ai tsî ǁareǀkhāb ǁôab ai,

⁸ǃgôasib tsî sorab ǃnâ, tsū tsî ǃgâi gomgu ǃnâ; ǂgaeǂhapu-aose, xawe ama-aise;

⁹ǂansabe tamase, xawe ǂansabese; ǁō rase, tsî mû, ûi ge hâ; ǁkharahe rase, xawe ǃgamhe tamase;

¹⁰ǃoa hâse, xawe hugaǀgui ra ǃgâiaǂgaose; ǀgâsa khoese, xawe ǂguina ra ǃkhūǃkhūse; xū-i xare-e ūhâ tamase, xawe hoana ūhâse.

¹¹Sige ams ge sadu ǃaroma khowahe hâ, Korinteǁîdo, sige ǂgaob ge haraharasen hâ.

¹²Sige ǃnâ du ge ǂō tama hâ, xawe du ge sadu ǃnāb ǃnâ a ǂō.

¹³ǁKhā-e dīdawa-am re, (ǀgôan ǃoas axase ta ra ǃhoa), î du sado ǁkhāti haraharahe!

¹⁴Î du ǂgomoǃnân ǀkha tā ǁkhā ǃnao-e ǂgaeǀhao. Mâ amǃnâ-eb kha ǂhanu-aisiba ǂhanuoǃnâsib ǀkha ūhâ? Tsî mâ ǀhûǁare-eb kha ǃnâba ǃkhaenab ǀkha ūhâ?

¹⁵Tsî mâ ǃkhō-amgu-eb kha Xristuba Beliali ǀkha ūhâ; tsî mâ amǃnâ-e i kha ǂgomsa-e ǂgomoǃnâ-i ǀkha ūhâ?

¹⁶Tsî mâ ǁnâugu-eb kha Elob tempela ǁgôatsuiǁgoagu ǀkha ūhâ? Sadu kom ûitsama Elob di tempeldo, Elob ge mî khami: ǁÎn ǃnâ ǁan tsî ta nî ǁîn ǀkha ǃgû, tsî ta nî tita ǁîn di Elo, tsîn nî ǁîna ti ǁae.

¹⁷ǁNā-amaga ǁîna xu ǃgûǂoa, î du khaisen, tib ra ǃKhūba mî; î du ǃanuoǃnâ-i xare-e tā tsâǀkhā, o ta ge nî ǃkhōǃoa du.

¹⁸O ta ge nî tita sadu Î, o du ge nî sado ti ôa, tib ra Hoaǀgaixa ǃKhūba mî.