Read Khoekhoegowab 2 Korinteǁîn 7 Bible Online

2 Korinteǁîn 7 - Khoekhoegowab bible

2 Korinteǁîn 7

¹Tsî ǁnāti ī mîmâide da ūhâ amaga, ǀnamsabedo, a da ǁgans tsî gagas tsîra di ǂnaoǂnaosensa xu ǃanuǃanusen, î da ǃanuǃanusensa eloǃaoǃgâsib ǃnâ dīǀoaǀoa.

²A ge sige sadu tawa ǂgâǃkhai-e hō! Khoe-i xare-e ge ge tôasi kai tama hâ, khoe-i xare-e ge ge ǂkhôa tama hâ, khoe-i xare-e xu ge ge ǃkhūkaisen tama hâ.

³ǀGoraǃgâ du ta nîse ta ǁîsa mî tama; ǀnai ta kom go mîo, sige ǂgaob ǃnâ du hâ ǃkhaisa, ǀhûpe ǁōs tsî ǀhûpe ûis tsîra ǃoa.

⁴Kai ǁkhoaǂgaosib ǀkha ta sadu ǃoa ra ǃhoa, kaise ta sadu xa ra koasen; ǁkhaeǂgaob xa ta ǀoa hâ, ǃnāǂamsase ta ra ǃgâiaǂgao hâǃnâ ge a ǁgâiǀāgu hoagu ǃnâ.

⁵Masedoniab tawa ge ge sīo, os ge sige sorosa sâ-e ūhâ tama ge hâ i, tsî ge ge hoan ǃnâ ǁgâiǀāhe ge hâ i; ǃaugaba ǃoab ge ǂnoagub, tsî ǃnāb ǃnâb ge ǃaoba ge hâ i;

⁶xawe Elob ǃgamǃgamsensana ra ǁkhaeǂgaob ge sige ge ǁkhaeǂgao Titub di hās ǀkha;

⁷tsî ǁîb di hās ǀguis ǀkha tama i, tsî ǁkhāti ǁnā ǁkhaeǂgaos, ǁîs ǀkhab ge sadu ǃnâ ǁkhaeǂgaohe hâ is ǀkha, sigeb ge ǂhôao sadu di ǁkhoreb xa, tsî sadu di āb xa, tsî tita ǂama du ūhâ ôasasib xa; o ta ge ǁnās ǃgâ-ai ge ǃgâiaǂgao.

⁸Nau ǂkhanis ǀkha ta ge sado ge ǃoaǃoa, xawe ta ǁîsa nēsi ǃhausen tama; tsî ǃhausen ta ge xawe ta ra mû, nau ǂkhanis ge ǁaerob ǀguiba sado ǃoaǃoa ǃkhaisa.

⁹O ta nēsi ra ǃgâiaǂgao, ǃoa kaihe du ges ǂama tama i, tsî ǃhobasens ǃoa du ge ǃoa kaihes ǂama; elosise du kom ge ǃoa kaiheo, sige xu du xū-i xare-i ǃnâ ǂkhôaǂkhôahe tidega;

¹⁰elosi ǃoasib ǃgâiǃōsib ǃoa garu ǃhobasens, tātsē ǃhausenhe tidesa ra sîsen xui-ao; xawe ǃhūbaib di ǃoasib ge ǁōba ra sîsen.

¹¹Mû, ǁîs ǁkhās, elosise du ge ǃoaǃoahes, ge matikō kai ôasasi-e sadu ǃnâ sîsen ǃkhaisa! ǁÎs tawa: ǃEreambasens, tsî ǀaraǂamsens, tsî ǃaob, tsî ǁkhoreb, tsî ôasasib, tsî ǂgōǀausens tsîna. Hoan ǃnâ du ge nē dīs ǃnâ du a ǃanu ǃkhaisa ge ǁgausen.

¹²ǁNā-amaga, sado ta ge xoaba, xawe ta ge ǁîsa ǂkhabase ge dīb ǃaroma dī tama i, tsî ǁkhāti ǂkhabase ge dī-ūheb ǃaroma tama i, tsî ta ge ge dī, sige du ūba hâ ôasasib nî sadu ǃnâ ǂhaiga Elob di ais aiǃâ.

¹³ǁNā-amaga ge ge ǁkhaeǂgaohe sado xu ge hā ǁkhaeǂgaos ǀkha. Tsî ge ge ǁnās ǃgâ-ai ge ǃgâiaǂgao kaihe Titub di ǃgâiaǂgaob ǀkha; ǁîb di gagas ge sadu hoado xu khoakhoahe hâ i xui-ao.

¹⁴Sadu xa ta ge ǁîb aiǃâ koa xū-i hoa-i ǃnâ ta ge tao kaihe tama hâ; tsî hoana ge ge amab ǃnâ sadu ǃoa ǃhoas ǁkhās khamis ge ǁkhāti Titub ai ge ge koasen koasa ge ama kai xui-ao.

¹⁵Tsî ǂgaob âb di ǀnammi ge sadu ǃoa ra ǃnāǂam, sadu hoadu di ǁnâuǀnamxasib xab ra ǂâiǂâiseno, mati du ge ǃaob tsî ǀkhūb tsîkha ǀkha ǃkhōǃoa bi ǃkhaisa.

¹⁶O ta ra ǃgâiaǂgao, hoan ǃnâ ta sadu ai mûmâinǃgâ ǁkhā ǃkhais xa.