Read Khoekhoegowab 2 Korinteǁîn 8 Bible Online

2 Korinteǁîn 8 - Khoekhoegowab bible

2 Korinteǁîn 8

¹Tsî ta ge ra ǂanǂan du, ǃgâsado, ǀkhommi Elob dib, Masedoniab di ǀhaohâgu ge māheba;

²matib ge ǁîn di ǃgâiaǂgaoba ǃnāǂam ǃkhaisa, ǂgui ǁgâiǀāgu ǀkhan ge ǃâitsâheo, tsî matib ge ǁîn di ǃgam ǀgâsiba ǃnāǂam ǃkhaisa, ǃkhū hâsen nî ǃgâidīse.

³ǁKhāsiba ǃoa, ǁîsa ta ra ǃkhō-am, ā, ǁkhāsib ǂamain ge māsenxa i;

⁴tsîn ge kai ǂgaoǀkhās ǀkha sige gere ǀkhoma, nē ǀkhaeb, tsî nē ǃoabas, ǃanuna ra ǃnaebas di amǃnâsa ge nî ǃkhōǃoa ǃkhaisa;

⁵tsîn ge nēsa ge dī, sige ge ǃâubasen hâ i khami tama, xawen ge aibe ǁî-aitsama ǃKhūba ge māsen, tsî ǁnās khaoǃgâ sige Elob di ǂâisa xu.

⁶ǁNā-amaga ge ge Tituba ge ǁnama, aibeb ge tsoatsoa khamib nî ǁkhāti sadu ǃnâ nē ǀkhaeba dīǀoaǀoasa.

⁷O hoan ǃnâ du ǃnā hâ khami ǂgoms ǃnâs karao, mîs ǃnâs karao, ǂans ǃnâs karao, ôasasib hoab ǃnâs karao, sige ǃoa du ūhâ ǀnammi ǃnâs karao, î du ǁnās ǁkhās xase nē ǀkhaeb on ǃnâ ǃnā.

⁸Mîmās axase ta ǁîsa mî tama, xawe ta naun a ôasa amaga sadu di ǀnammi ona ra ǃâitsâ, iseb a ǂhauǃnâ ǃkhaisa;

⁹ǂan du a xui-ao ǀkhommi sada ǃKhūb Jesub Xristub diba, matib ge, ǃkhūb hâ hîa sadu ǃaroma ǀgâ ǃkhaisa, ǁîb di ǀgâsiba xu du nî sado ǃkhūga.

¹⁰Tsî ta ge nēs ǃnâ ti ǂâisa ra mî, ǁîs a harebeba du ǃkhaisa, sadu, dīs ǀguisa tama i tsî ǂâibasens tsîna nau kuriba xu tsoatsoa hâdo.

¹¹Î du nēsi dīb ona ǀoaǀoa, îb ǁkhāti dīǀoaǀoasiba ī, ū du hâna xu, māsenxasib ǂâis dib ge hâ is ǁkhās khami.

¹²Māsenxasib ga aibe hâo, o i ge khoe-e a ǃkhōǃoasa, ū i hâs ǃoa tsî ūhâ tama i hâs ǃoas ose.

¹³ǁNāti ī tama: Naun nî supusupubahega, tsî sadu nî ǁgâiǀāhega;

¹⁴xawe ǀguiti-īse i nî īga, îb sadu ǃnāǂamsiba nē hâ ǁaeb ǃnâ ǁîn di tôasiba ǀoaǀoa, îb ǁkhāti naun di ǃnāǂamsiba sadu di tôasiba ǀoaǀoa, ǀguitikōsib nî hâse,

¹⁵xoamâihe hâ khami: “ǀOasase ge ǀhaoǀhao-i ge ǃgau tama-e, tsî ǀorose ge ǀhaoǀhao-i ge tôasi tama-e,” ti.

¹⁶Tsî Eloba ab ganganhe, ǁkhā ôasasi-e sadu ǂama Titub di ǂgaob ǃnâ ge māba.

¹⁷Ob ge ǁnamasa ǃkhōǃoa, tsî ǃhaese māsenxase sadu ǃoa ge dāǁnâ, ôasab a amaga.

¹⁸Tsî ge ge ǁîb ǀkha ǁkhāti ǃgâsaba ge sî, ǃgâiǂhôas ǃnâ ǀhaohâgu hoagu tawa koasa ūhâba;

¹⁹tsî nēs ǀguisa tama i, tsîb ge ǁkhāti ǀhaohâgu xa ge ǃkhōǂuibasenhe, sige ǀkhab nî dāǁnâsa ǁnā ǀkhaeb ǀkha, sige xu ra ǃoabaheba ǃKhūb ǂûb di ǂkhaisib tsî sadu māsenxasib dib ǃoa,

²⁰nēsa ra ǂanbasenǃâ, khoe-i xare-i sige nē ǀkhaeb, sige xu ra ǃoabaheb ǂama ǃkhāǃkhā tidese,

²¹îǂhôase ra sîsen ǂgao khoese, ǃKhūb ǀguib aiǃâ tama i, tsî khoen tsîn aiǃâ.

²²Tsî ge ge ǁîkha ǀkha ǁkhāti sige ǃgâsaba ge sî, ǃnuriǃnāde ge ge ǃâitsâba, ôasab a ǃkhaisa; tsîb ge nēsi ǁnās ǃgâ-ai a ôasa sadu aib ūhâ ǂgomǃgâsa xu.

²³Titub xas karao, ti horesa tsî sadu ǃnâ ti sîsenǁare-aob ge ǁîba; nau ǃgâsagu xas karao, ǀhaohâgu di sîsabe tsî Xristub di ǂkhaisi gu ge ǁîga.

²⁴ǁÎga ǁnâi ǁgauǂuis sadu ǀnammi disa ǁgau tsî sadu xa ge ra koa koas disa ǀhaohâgu tsîn di ais aiǃâ.