Read Khoekhoegowab 2 Korinteǁîn 9 Bible Online

2 Korinteǁîn 9 - Khoekhoegowab bible

2 Korinteǁîn 9

¹Tsî ǁnā ǃoabas, ǃanuna ra ǃnaebas xa ǃaruǀî xoaba dusa ta ǂhâba tama;

²sadu ǂâis di māsenxasiba ta a ǂan xui-ao, ǁîb xa ta Masedoniaǁîn tawa sadu ǂama ra koab, Axajab ge nau kuriba xu ǂhomisen hâ i ǃkhaisa, tsî ôasasib, sado xu ge ǂoab ge ǂguina ge ǂkhai kai.

³O ta ge ǃgâsaga ge sî, sige koas, sadu xa ge ra koas ǁau tidese nē ǃâs ǃnâ, ǂhomisen hâse du nî hâga, mî ta go khami;

⁴î-i tā ī, Masedoniaǁîn ga tita ǀkha sī, tsî da ga ǂhomisen tama hâse hō duo, sige (sado ta mî tide), nî taotaohe ǃkhaisa.

⁵O ta ge ǂhâǂhâsase go ūhâ i, ǃgâsaga ǂgansa, aibe gu nî sadu tawa sī, tsî gu nî sadu xa aimîmâihe hâ ǀkhaeba ǁāǁā ǃkhaisa, îb ǂhomihe hâ ǀkhaeb ase ī tsî ǁgariǁnâhe hâ xū-i ase tama.

⁶Tsî ta nēs xa ra mî: ǀOrose ra tsoro-i, ǁnā-i ge ǁkhāti ǀorose nîra ǃgao, tsî ǀoasase ra tsoro-i, ǁnā-i ge ǁkhāti ǀoasase nîra ǃgao.

⁷A i mâ-i hoa-e ǂgaob ǃnâ i go ǂâibasen khami dī, ǀaraǂams ǀkha tama tsî ǁgarihesa xu tama; ǃgâiaǂgaoxase ra mā-eb Eloba ǀnam xuige.

⁸Tsî Elob ge a ǁkhā, mâ ǀkhommi hoaba sado hāǂam kaisa, mâ ǁaeb hoab ai du nî ǀoasase ūhâse, tsî hoa ǃgâidīb ǃnâ du nî ǃnāse;

⁹xoamâihe hâ khami: “ǁÎb ge ge tsoro, ǁîb ge ǀgâsana ge mā; ǁîb di ǂhanu-aisib ge ǀamosib kōse ra hâ,” ti.

¹⁰Tsî ǁNāb tsoro-aoba ǃkhomma ra māb, ǁîb kom ǁkhāti pereba ǂûse ra māo, tsîb kom sadu ǃkhomma nî ǀaro-o, tsîb kom ǂhanu-aisib di ūǀkhīde nî ǂguiǂguio,

¹¹hoan ǃnâ du nî ǃkhūse ǃgâidīb hoab ǃoa, sige xu gangansa ra sîsenǂuiba Elob ǃoa;

¹²ǃoabas nē ǃgâidīb dis ǃanun di tôasib ǀguiba ǀoaǀoa tama xui-ao, tsîs ra ǃnā, ǂguin Eloba ǁîs ǃaroma ra gangan xui-ao.

¹³Nē ǃoabas di ǁgauǂuisensa xun ra Eloba kare xui-ao sadu ǁnâuǀnamsa ǁguiǁnâs ǃgâiǂhôas Xristub dis ǃaroma, tsî ǃgâidīs, ǁîn tsî naun hoan ra amǃnâxas ǃaroma,

¹⁴tsî sadon ra dība ǀgoresa xu, sado ra ǁkhoreǃâ, hoan ǃnâ hâ ǀkhommi Elob dib, sadu ǀkha hâb ǃaroma.

¹⁵Tsî Eloba ab ganganhe ǁîb di ǃhoaǂuiheǁoasa mās ǃaroma!